Pope Leo XIV cu dinh a herh rih caah Assisi khua tlawn ding kha chikkhat a thawn chung

Oct 23, 2026

Holy See Press Office cathanh chuah ning ah Pope Leo XIV cu operation aa tuah hnu dinh a herh deuh rih caah Oct 27 ah Italy ram, Assisi khua i a khualtlawn ding kha a tthial chung. Pope cu Assisi khua i tuah mi “Hriamnam tel loin Daihnak a chuahtertu Daihnak” (Unarmed and Disarmed Peace) meeting ah amah pumpak aa tel kho lai lo nain cu meeting caah a cawlcangtu le meeting chungtel hna sinah thazaang peknak a ngei lai. Cu meeting cu St. Pope John Paul II nih 1986 kum, Assisi khua ah a rak thawkmi Vawleipi Daihnak caah Thlacam ni i kum 40 tlinnak philhlonak ni a si. Vatican cathanh ahcun Pope cu remdaihnak a um lomi nihin ni caan ah ‘Assisi i lungput’ tiah auhmi ton biaruahnak le daihnak caah aa tlakmi biafang hna, tuahsernak hna kawlhawlnak cu a sunglawi mi a hrampi a si tiah a zumhnak kong a langhter. Dr. Luigi Carbone le Professor Stefano Margaritora hna chim ningah cun Pope cu operation tuah a si hnu ah a ttang X-ray an thlak i an chek tikah a dam cuahmah ko ti kha an hmuh. Asinain operation tuahka te lawng a si rih i, i runvennak ah Helicopter in khualtlawnnak kha hrial rih dingin Siibawi hna nih ruahnak an pek. Pope cu Oct 13 ni ahkhan orhlei pang a cuap tanglei kha operation an tuah. Siibawi hna i an langhter ningah hi operation tuahnak thawngin cuap cancer a cang khomi tissue kha kan laak khawh i a hnu chekhlatnak hna in cancer thlopbulnak tuah a herh ti lai lo tiah theih a si.

Source; Holy See Press Office