Fa Ngeih Phungphai

3. Min I Sak Ning

Min cu minung pakhat i kan chanchung lawng hmanh si loin kan thih hnu chan tampi tiang a rung tangmi a si ruangah ro thil bantuk a si ko tiah an ruah. Minung cu vun chim lo, minung nih kan sermi thilri hmanh mi ta le mah ta hliah khawh nak caah min kan sak hna.

Mawtawka, mawtaw cycle hmanh kan duhlmi pumpak min kan sak hna.

An sermak ram nih min an sak.

z.c Made in Germany, Korea… tbk.

An sermak company nih min an sak ṭhan.

z.c. Daewoo, LG, Hundai …tbk.

An sernak mawtawka i a model nih min an sak ṭhan.

z.c Landcruiser, Dyna, Jeep … tbk.

An cawtu ram nih min number an pek ṭhan.

z.c. A/ 0007, B/ 0143 … tbk.

Cucaah mui aa lo tuk mi minung cu pumpak in min ngeih lo awk a ṭha lo. Cu ruangah min hi pumpak ta a si ruangah min kan i saknak sullam hna hi an si. Minsaknak kong ah thil hi tampi in an rak ruah hnu lawngah min hi an rak i sak tawn. Tuan i min an i sak lo ahcun pakhatkhat nih a tawngh sual hna lai tiah ruah a si caah min a ngeih hlan cu pakhatkhat in rak i kawh chung a si tawn. Hi an i kawh chung nak hi pum runvennak ah a si. Cu min cu min ṭhatha an i sak len ko zongah cheukhat cu an thih tiang auhnak ah an hman lan tawn. Abiana ah Pawtei, Pa Hniang, Lunglung, nihih kan chan ah Sonny, Maungmaung ti bantuk pawl.

Fale minsak a hung zat tikah a chungphun, an cingla, laitlai chungin kumkhua upa le tar deuh kha hoih le fial a si ṭawn. Cu hmanh ah upa minchawng ko ah hin fak deuh in ruah a si ṭawn. Min khat lawng si loin kep a si i an duh le pahnih, pathum zong an sak ko hna.

Cu minsak an falmi nih cun zupute an i put i an sak ṭawn hna. Cu zupu cu innpa chakthlang he an din i a saktu nih a minsaknak kong he pehtlai in a sak duhnak kong kha a fianh hna. A minsaktu nih saṭil, thingram, ṭhihlawn an i put ṭawn. Hi bantukin ciammam deuh i an i put in an sak hna ah cun a duh ve lo nih sa i thah le zu aa dah zong an um ve.

Cu bantukin minsaknak ah zupu i put in kal tik le min i sak tikah niam le san, hmet le ngan, mah zawnkhan in i sak a si caah mi nih theih lai hi an i ngaih tuk. Cu a sakmi min cu cuka i a rami le zuding paoh nih, ceihphai le ruahpi cio a si. ‘Minsak aikah’ tiah mah a min saktu kha ngakchia nih a zulh an i tawn.