Vawleicung ram 55% ah Khrihfa hremnak a zual chin

Oct 29, 2026

Vawlei pumpi ah Khrihfa hremnak a zualnak le a karhnak kong cu Aid to the Church in Need (ACN) nih a chuahmi ‘Persecuted and Forgotten? A Report on Christians Oppressed for their Faith 2024-2026’ timi ca ah an langhter. EWTN News nih Oct 27 ah cu ca cu 2024 Aug thla in 2026 kum June thla tiang ram 18 chung ah a cangmi Khrihfa hna sining hlathlainak an tuahmi ah hmuh khawh asi. ACN chim ningah an chekhlat mi ram 55% ah Khrihfa hna cungah hremnak le namnehnak a zual deuh i a sining a ṭha deuh hleimi ram a um lo. Cu lengah vawlei cung Khrihfa 413,000,000 hrawng cu biaknak zalonnak a umlonak ah an um i, Khrihfa 220,000,000 hrawng cu hremnak le namneh rialdip an tong tiah theih asi.

Cu langhternak ahcun Khrihfa hremnak a zualbiknak hmun hna ah tlaihhremnak, cozah nawl ngeitu hna i tlaihkhihnak, an biaknak ah hramhram in luhternak le thahnawnnak tiang an tong tiah  an langhter. Khrifa hremnak a zualbiknak Africa le Asia ram cheukhat hna ahcun Khrihfa hna kha an inn le an lo an chuh hna, an biak inn an khar piak hna, an tlaihkhih hna pin ah pumcaan le Pathian biak caan rikhiah piaknak hna an tuah. Tuluk ram ah biaknak rianṭuannak kong he pehtlai in acozah nih an nawlngeihnak an rengh chinchin nak, Nikarakua ram ah Catholic Bupi le biaknak hruaitu hna cungah namnehnak a karhnak kong, Iran ram ah Khrihfa hna tlaihkhihnak a zual chinnak kong zong an langhter fawn.

 India ram zongah 2025 kum chungah Khrihfa phung dohnak sining 700 leng a um tiah a langhter. Africa Sahel hmun le Nigeria, Bakinafaso, Mali le Nigia ram hna ah zum lotu phu hna i dohnak le hremnak le thahnak tiang Khrihfa hna fakpi in an intuar tiah kan theih. Mozambit ram chaklei Cabo Delgado hmun zongah 2017 kum thawkin Islamat hna nih Khrihfa hna thahnak, tlaihhrem an innak le Biakinn hna hrawhpiaknak le muslim biaknak ah hramhram i luhter an sinak kong ACN nih a langhter.