Spain ram i tlanglong i pahnak ruangah nunnak a liammi hna caah Pope Leo XIV nih a ngaihchiatnak a langhter

Spain ram ah tlanglawng an i pah sual ruangah minung 68 nunnak a liam i mi tampi hliamhma an tuarnak kong ah Pope Leo XIV nih a ngaihchiatnak a langhter i a thimi hna an thlarau cu zungzal  daihnak hmun i an i dinhnak hnga thla a cam piak hna tiah Vatican News nih thawngthanhnak a tuah. Kan hnu Cawn nithumni, zinglei suimilam 8:54 hrawng ah khan Spain ram laifang(central Spain) ah tlanglong an i pah sual caah nunnak liammi le hliamhma pu mi tampi an um. Cu ngaihchiatnak a tongmi chungkhar hna ngaihchiatpinak le thlacam piaknak cakuat cu Secretary of State asi mi Cardinal Pietro Parolin nih min a thut i Spain ram, Toledo khua i Archbishop Francisco Cerro Chaves sinah an kuat.

Cu tlanglong i pah sualnak ah a thimi cu 68 an si rih nain sizung ah minung 53 an um i cu chung ah minung 15 hi an zual ngai tiah Castilla-La Mancha peng kulh cozah spokeperson Esther Padilla nih a chim. Cawn nili ni zing lei tiang, chanhchuahtu phu(rescue team) hna nih rimhaw hniimtu uico (sniffer dogs) hna he hliamhma pu mi le a tlau mi an kawl hna tiah Vatican News nih a chim. Ngaihchiatnak a tongmi chungkhar hna Bawipa nih hnemnak le tuar khawhnak thazaang hna sehlaw, hliamhma a pu mi hna nih damnak tling hmu hram ko hna seh tiah Pope nih thla a campiak hna i mi chanchuahtu (rescue team) hna zong thluachuah a pek hna tiah Vatican News nih a langhter. Hi tlanglong i pahnak ah a nunnak a liammi hna caah tiah Spain cozah nih ni thum chung ngaihchiatnak thawng a thanh. Tu kum chung ah Spain ram ah tlanglong i pah sualnak a voihnihnak a si tiah theih asi.