Guatemala Diocese ah Bawipa Thisa khuaruahhar tiah ruahmi konglam cu an hlathlai lio a si

Guatemala ram, St. Rose of Lima Diocese chungah Bawipa Thisa khuaruahhar tiah ruahdamh mi konglam cu fimthiam (scientists) hna nih an hlathlai lio a si tiah EWNT News nih Oct 27 ni ahkhan a langhter. A sining cu 2026 kum, July 30 ni ah Cuilapa khua um sianginn pakhat ah Missa Raithawinak an tuah lioah a cangmi a si. Bawipa Thisa a cohlangmi mino pakhat nih Bawipa Thisa a kaa chungin a chuahtthan kha Siangbawi pa nih a hmuh i vawlei ah thlak lo dingin a rak kham. Cun changreu cu thlalang hrai ti chungah a rawn i Biakinn thlacamnak khaan pakhat ah a chiah. Changreu thiang cu kokek sining in a zawp lai tiah an ruah nain Aug 6 ni tiang a zawp rih lo hleiah a senmi nehnang hna a chuak kha an hmuh. Cu sining ruangah Diocese uktu Bishop Jose Cayatano Parra nih hlathlaitu phu pakhat a ser. Cu phu chungah Biologist, sii lei thiamsang(pharmacists), pshychologist, nurse, mi sawhsawh pakhat le a dang Diocese in Siangbawi pakhat hna an i tel. A bik in a senduk mi nehnang hna cu thi a si le si lo le changreu thiang zawp loin a taannak a ruang hna kha an hlathlai lai. Sihmanhsehlaw atu tiang cu konglam sining cu khuaruahhar sining tiah phungning in an thanh rih lo. Diocese uktu Bishop le hlathlaitu phu hna zong nih khuaruahhar thil a sinak kong fehter rih loin cu bantuk thil sining hna cu khuaruahhar thil sining ah fehternak le mipi nih biakpumhnak hna tuah ding ah Holy See i fehternak a herhnak kong theih a si. Siangbawi Jose Alejandro Garcia zong nih hlathlainak caah caan laak a hau i zumtu hna zong nih khulrang in fehter rih loin fimkhur tein hngah ding, thlacamnak le tuaktannak hna ngeih dingin a forh hna.