PATHIAN PENNAK A NAI CANG
Johan kha an tlaih hnu ah Khrih cu Galilee pengah a ra i, Pathian thawngṭha kha a chim; “A caan cu a tling cang i Pathian Pennak cu a nai cang, i ngaichih ulaw thawngṭha kha zum u,” (Mk. 1:14-15). Pa Pathian duhnak tuah awkah hlercawi siseh, ti hi a si. Mah hi mi vialte kha a Fapa Jesuh Khrih ah pumhnak in a tuah. Mah pumhnak cu Bupi hi a si. Vawlei cungah mah pennak a ci le a thawhnak a si.
Khrih cu mah mah minung hna an i pumhnak a simi “Pathiang innchungkhar” a laifang ah a um. Amah chim ningin Pathian Pennak kong a langhtermi hmelchunhnak le a zultu hna thlahnak in Jesuh nih mi vialte kha amah sinah rat dih awk in a auh hna. Thawhṭhan biathuk a simi vailam cung a thihnak le a thawhṭhannak in a pennak a tlunnak kha a tlinter lai. “Keimah cu vawlei in thlir ka si tikah mi vialte kha ka sinah ka hnuh hna lai, (Jn. 12:32). Khrih he i kawmhnak ah mi vialte cu auh an si.
Pathian Pennak kong chimnak
Mikip cu pennak kong chung luh awkah auh an si dih. Israel fale hna sinah thanh hmasa a si i, Messiah pennak cu miphun vialte nih cohlang hna seh tiin tinh a rak si. (Mt. 8:1, 10:5-7, 28:9). Pennak chung luh awkah mi nih Jesuh bia kha a pawm hmasa a hau.
Bawipa bia cu lo chungah vawrhmi thlaici he tahchunh a si. Pathian bia kha zumhnak in a the ii Khrih tuurun lakah relchih a simi cu pennak kha an hmuh taktak cang. Cun amah ṭhawnnak in thlaici cu a vung keuh i ṭuan a zat tiangin a ṭhang. (Mk. 4:14, 26-29, Lk. 12:32).
Pennak cu sifakmi le nauta hna caah a si. A sullam cu toidornak lungthin he a cohlangmi kha an si. Jesuh cu mi sifakmi hna sinah khan thawngṭha chim awkah thlah a si. (Lk. 4:18, 7:22). Annih kha “thluachuakmi” a ti hna. Zeicahtiah Vancung Pennak cu anmah ta a si. (Mt. 5:3). “Ngakchia hna sinah Pathian nih mifim le cathiam mi hna sinah a thuhmi kha phuan a duh. (Mt. 11:25). Jesuh nih sifakmi hna nunnak kha aa hrawm; caw rawlkuang in vailam cung tiangah rawlṭam tihal le zeihmanh ngei loin a um. (Mt. 23:18, Mk. 2:23-26, Jn. 4:6-7, 19:28, Lk. 9:58). Jesuh cu misifak phunkip he khan aa khat in aa ruat i anmah cungah dawtnak ngeih kha Vancung Pennak chung luhnak caah a herhmi in a rak ser. (Mt. 25:31-46).
Jesuh nih misual mi kha pennak cabuai ah a kawh hna. “Miding mi auh awkah ka ra lo, misual mi auh awkah ka ra,” (Mk. 2:17, ITim. 1:15). Annih kha lungthlennak ah a auh hna. Lungthlennak lo cun pennak chungah an lut kho lo. Pathian nih annih kha a dawt hna ti cu a biachim mi le a tuasernak in a hmuhsak hna. Lung aa thlengmi misual pakhat caah vancung ah lawmhnak tampi a um, tiah a ti. (Mk. 15:7, 7:11-32). A dawtnak nganbik a langhnak cu, “misual ngaihthiamnak caah a nunnak a pek hi a si”. (Mt. 26:28).
Jesuh nih a pennak chung luh awkah bianabia in a sawm hna i cucu amah cawnpiaknak zia a si. (Mk. 4:33-34). Bianabia in mi kha a pennak chung rawldumnak ah a sawm hna. Sihmanhsehlaw biatak tein i thim awkah a fial hna. Pennak chung luh awka mi pakha tnih zeizong vialte a pek dih a hau. (Mt. 13: 44-45, 22:1-14). Kaa lawng cun a za lo, tuahsernak a hau. (Mt. 21:28-32). Bianabia hna cu minung caah thlalang bantuk an si. Minung hi Pathian bia (thlaici) caah leichia maw an si lai, leiṭha dah? (Mt. 13:3-9). A hmuhmi tangka zei tuahnak ah dah a hman? (Mt. 24:14-30). Vancung Pennak kong biathli hngalh awkah mi nih pennak chungah luh hrimhrim a hau. Cun Khrih zultu a si a hau. (Mt. 13:11). Khualeng ah a ummi hna caah zeizong vialte cu theih a har ngaingai. (Mt. 4:11, Mt. 13:10-15).