Luattermi Kan Si Cang

Nihin ni tiangah caan ṭha, caan sunglawi a kan petu kan biakmi kan Pathian amin thiang thangṭhat in um ko seh. Nihin kan nu Bupi nih a kan timhpiakmi bible (Eph. 1:1-10) tiang a si i, a saupah caah (Eph. 1:7) te lawng kha kan rel lai. 

“Khrih thihnak nih kannih cu a kan luatter, cucu kan sualnak kha ngaihthiam kan si tinak a si. Pathian vel cu a va lianngan hringhran dah.” Hihi zumtu kan nun cu luatter nun a si i, luattermi na si cang, luattermi kan si cang,” timi tlangtar in thazaang pek le ruah ṭi kan duh hna. Paul nih Efesa ca a kuatmi chung hin caang (4) nak chungah zeitindah kan hmuh ti a si ahcun, “Nang le kei cu vawlei ser hlan in Pathian nih Khrih chung i amah ta si dingin a kan thim cang,” a ti. 

Zeiruang ah dah nang le kei hi thim ka si? Khrih chungah amah ta si dingah a ti, vawlei ser hlan in thim cangmi na si e, a ti. Cucaah a hmai ah a thiangmi le sawi awk um loin kan si awk a si, a ti. Zeiruang ah dah? Pathian cu a thiangmi a si caah Pathian hmai ah a thiangmi le sawi awk um lomi kan si awk a si e, a ti. Cun a vun pehrihmi cu zeitin, nihin kan relmi caan sarihnak chungah, “Khrih thihnak nih a kan luatter, cucu kan sualnak kha ngaihthiam kan si tinak a si. Pathian vel cu a va lian hringhran dah,” a ti. Nang le kei minung sawhsawh kan si lo, mi sawhsawh kan si lo. Khrih thihnak nih a kan luattermi, Khrih thisen nih a kan luattermi, a kan tlah cangmi, a cawk cangmi, Pathian fanu fapa taktak kan si timi kha i hngalh usih. 

Nihin thong a tlami nih zeidah an herh bikmi le an duh bikmi a si tiah cun upadi ningin luat hi a si. Upadi ningin a luat lomi cu amah tein a tlimi, a zaammi cu mi luat taktak an si lo. Zeiruang ah? Amah kha zeitik caan paoh ah, khoika hmun paoh ah an tlaih i thong chungah an thlak khawh ṭhanmi a si caah a si. Nihin nang le kei a sual bikmi minung zong hi sualnak thong ah kan tlak i kan sualnak vialte a kan ngaithiam khotu biaceih bawi kan herh, chuahtertu, luattertu bawi kan herh. “Sualnak man cu thihnak a si e,” a ti. Kan sual ruangah thong ah kan tla i kan in dingmi vialte cu zeidah a si, thihnak a si. Asinain Pathian nih zeitluk in dah a kan dawt ti kha hitihin a langher. Cucu zeitin, a Fapa kha nangmah le keimah sualnak thong chungah a ummi kha luatter dingah, Satan kut chung i a ummi nangmah le keimah luatter dingah hi vawlei ah hin a run thlah i, cu a Fapa kan zumhnak thawngin, a Fapa he kan i pehtlaihnak thawngin a Fapa thisen nih cun nang le kei cu cu chung cun a luattermi kan si. Cucu zeiruang ah dah a si? Pathian vel nang le kei caah a lianngan tukmi a si. 

Pathian nih nang le kei a kan dawttuk caah a si. Kan leiba vialte Jesuh Khrih thisen nih a kan champiak dih. Kan sualnak man vialte kha nangmah le kei a kan hrawh piak dih. Cucaah nang le kei cu kan thiang i, a hmai ah a thiangmi le sawi awk um lomi kan sinak ding caah a si. Pathian nih vawlei ser hlan in a thim cangmi minung kan si caah a si. Nang le kei cucaah luattermi a luat cangmi minung kan si caah a sunglawituk Pathian Fapa Khrih thisen in a tlanhmi, nunnak a pek cangmi minung kan si caah a sunglawi tukmi minung kan si ti hi i theih usih. Zeiruang ah dah luatter kan herh, zeiruang ah dah luatter kan si? Zalong tein a rian kan ṭuan khawhnak ding caah le kan biachim, kan holhrel ah siseh, hmual a ngeih khawhnak ding caah nang le kei luatter kan herh. 

Cun amah Pathian, kan Bawipa Jesuh, nih cun chit khawhmi, hman khawhmi kan sinak ding caah le a sunparnak a langhter khotu kan sinak hnga caah luatter kan herh. Cun Pathian kan thangṭhat khawhnak ding caah luatter kan herh. Pathian i a fekmi a biakam i a biathli hna kha kan theih i a thluachuahnak a kan peknak hnga ding caah luatter kan herh. Cun amah hngalhnak kha tlamtling tein kan ngeih khawhnak ding caah luatter kan herh. Cucaah cu kan luatnak man cu Bawipa nih zeidah a hman? Tunai kan chim bantuk te khan a Fapa thisen kha a hman. A thiangthlarau kha a hman. A bia kha kan luat khawhnak hnga a hman ti kha nihin bible kan zoh tikah kan hmuh khawhmi a si. (1Peter. 1:19 / Rom. 8:2 / Johan. 8:32) chungah nang le kei kan luat khawhnak ding caah Bawipa nih a hmanmi kha biathiang chungah kan hmuh khawhmi a si. Dawtmi u le nau hna kan Bawipa Jesuh Khrih nih a luatternak thisen man hi nang na cham ve cang maw? Zeizat dah na cham cang? Paul nih cun zeitin, “Kanmah ta kan si ti lo, Khrih nih a kan cawk cang i Khrih ta kan si cang e” a ti. 

Cucaah kan pum cu amah sunparnak caah kan hman awk a si e, a ti. (1Kor.6:19-20) chungah nang le kei kan hmuh khawhmi a si. Cucaah dawtmi u le nau hna mi sawhsawh kan si lo. Nihin nifatin kan nunnak ah Satan nih a phunphun in nang le kei a kan tukforh. Sualnak chungah kan tlak ṭhannak ding caah nang le kei a phunphun in a kan tukforh. Nihin khakha tei khawh i zuam usih. Nang le kei kan luatnak bal hi zeitindah kan hman? Sual khuhnak, sual tuahnak ding caah nan luatnak cu hmang hlah uh, tiah Mithiang Peter nih nang le kei ralrinnak a kan pek. Zeitindah a kan pek ti a si ahcun, “a luatmi bantukin um usih, sihmanhsehlaw nan luatnakh kha ṭhatlonak khuhnak ah hmang hlah u, Pathian sal bantukin nung uh. 

Luattermi nan si cang caah nan pumsa duhnak kha i teiter hlah ulaw, a kan ti, a cunglei bible kan rel a si ahcun. Thlarau he aa do zungzalmi pumsa duhnak kha i teiter hlah u, tiah kan nawl hna e, a kan ti. Nang le kei nifatin kan nunnak ah zei nih dah a kan tei? Pathian sal bantukin nung u, a kan ti bantukin Pathian nih a kan tlanh cangmi, nang le kei mi sawhsawh kan si lo i a thisen man, Fapa thisen man, kan Bawipa Jesuh Khrih thisen man kan si cang ti kha i hngalh in, kan pum, kan nunnak hi amah sunparnak caah a hmang khomi sinak dingah i zuam usih. A luatmi kan si cang, Khrih nih a kan luatter cang. 

Cucaah fek tein dir ulaw, sal ah khan i ser ṭhan ti hlah u, tiah Paulu nih (Gal. 5:1) chungah nang le kei forhfialnak a kan tuah. Khrih thihnak nih kannih cu a kan luatter cang, cucu kan sualnak kha ngaithiam kan si tinak a si. Pathian vel cu a va lian hringhran dah. Luattermi na si cang, sal ah i cang ṭhan ti hlah usih. Khrih thisen nih a luattermi kan si cang caah, kan nunnak kan zeizong vialte amah sunparnak caah a hmang khomi zumtu Khrihfa kan sinak hnga Bawipa nih thluachuah kan pe ko seh. Amen.  

Thazaang petu /- Saya William