Chiatnak le Ṭhatnak

Bible relding: Gal 5:18:25; Ps. 1;  Lk 11:42-46

Nihin kan bible cathiang nih a kan cawnpiak duhmi biahalnak phunhnih tein a tawinak in vun chim ka duh. Pathian Thlarau thianghlim nih a kan cawnpiak, a kan hruai ning tein a nun taktak mi kan si maw? timi le lenglei, a parpavuan lawngin maw Khrihfa kan si (asiloah) Bawipa rian a ṭuanmi kan si, Pathian hnu a zulmi maw kan timi te kha a si. 

Mithiang Paul nih voikhat bible kan relnak chungah siseh, Salm hla chungah siseh, cun Gospel chungah siseh, a pathum ningin a langhtermi cu, “thianhlimnak cu chunglei in a ra i, tuahsernak in a lang e,” timi a si. Paul nih minung taksa sinak le thlarua nih a chuahtermi theipar hna pahnih kha tahchunh in a kan cawnpiak. 

Minung sining nih a tuahtawnmi nu le pa sualnak te hna, a thurhnawmmi thil te hna, aa dawhcah lomi thil te hna, siasal biak te hna le, dawih le aih te hna hi an si. Pakhat le pakhat an i ral, an i do, an i nahchuah, an thin a hung, anmah zawn cio lawng an ruat, an i ṭhen, ziar an i ngeih, ṭhatlonak taksa nih a chuahtermi, mah zawn lawng ruahnak, mah ṭhatnak lawng ruah i midang zei rel lonak kha Paul nih minung sinak nih a chuahtermi a ti. 

Thlarua in a rami theipar cu zei hna dah an si ti tikah dawtnak, lawmhnak, daihnak, lungsaunak, zaangfahnak, ṭhatnak, zumh awk tlakmi sinak, toidornak le mah le mah i tei khawhnak te hna hi an si, tiah a ti. Mah le mah i tei khawhnak te hna hi an si. Tangdornak, toidornak, dawtnak. Cucaah hi Paul nih a cawnpiakmi minung taksa duhning, sining le Pathian Thlarau nih a kan pekmi nunzia te kha fiang tein nihin ah a kan tahchunh piakmi a si. 

Cucaah Pathian Thlarau taktak a ngeimi Khrihfa taktak kan si a si ahcun Pathian Thlarau nih a chuahpimi theipar, kan lung chungin, ka chungin a hung chuakmi tuahsernak in langhter ding timi te kha pakhatnak ah vun chim ka duh. Pahnihnak ah Salm hla ṭialtu pa nih Bawipa cungah hrambunh in a nungmi hna cu tiva pawngah hring dildel in a kho zungzalmi thingkung, a theipar ṭha a tlaimi thingkung bantuk an si e, tiah a ti. 

Bawipa cungah kan nunnak kan bunh kan ti tikah atu Paul nih a chimmi bantuk mah zawn lawng ruahnak kha a si ti lo. Bawipa Pathian i a duhnak, Pathian veel chungah nun tikah theipar ṭha, theipar dawh, Thlarau nunzia dawh in a nungmi kan hung si. Khakha Salm hla ṭialtu pa nih cun nihin i salm kan relmi chungin a langhtermi cu a si. 

Gospel thawngṭhabia chung zongah Bawipa sinah Farasi mi hna nih bia an hal tik zongah lenglei lawngin tuahnak nakin chunglei in tuahsernak in langhter ve dingmi, dawtnak in thil tuah ding, Pathian rian ṭuan ding, Pathian hnu zulh ding timi kha a cawnpiak hna. (Lk. 11:43) ah, “Farasi mi hna nan caah ṭih nung a va si dah! Pumhnak i ṭhutdan a dang tein chiahpiakmi i ṭhut cu nan duh i chawdawrnak hmun i upatnak in kuttlaih cu nan tlaihchan. Nan caah ṭihnung a va si dah.” Mi nih ka upat hna seh, mi nih ka thangṭhat hna seh, hmunhma ka pe hna seh, mah zawn lawng ruah tikah Bawipa caah hmunhma a tlau. 

Pakhatnak bik ah chiah hnga dingmi Pathian kha hmunhma kan pek lo tikah siasal biak timi Paul nih taksa sining a tlaitertu, siasal biak te hna a timi kha a si. Minthannak lei siasal, mah zawn lawng ruahnak siasal, khakha Gospel chungah Bawipa zong nih a cawnpiakmi cu a si. Kha thil sining kha nannih ka hnu zultu hna nih cun nan kaltak ding a si e, Pathian thlarua in a rami a si lo e, tiah a timi cu a si. 

Cucaah a caan caan ah kan i pum e, thla kan cam e, rawl kan ul e, tiah kan ti ko men lai. Naa pumhnak, ka pumhnak, na thlacamnak, ka thlacamnak nih ka nunnak ah, ka thlacamnak ah zei thei dah a tlaiter timi kha i chekhlat ṭhan hna usih. Zingchiar tein Missa a kaimi kan si men lai, Rosary zong kan cam peng men lai. Sihmanhsehlaw kan lung a sau khawh lo, ngaihthiamnak lungthin kan ngeih khawh lo, mi kong chiatnak lawng chim peng, zernak lungthin lawng ngeih peng a si ahcun Bawipa nih a kan tinhpiakmi Pathian thlarau a ngei taktak lomi kan si sual lai. 

Pathian thlarau nih a chuahpimi cu dawtnak, zaangfahnak, tangdornak lungthin, mi zawn ruahpiak thiamnak lungthin, sual ngaihthiamnak lungthin te hna, ṭhatnak lungthin te kha thlarau nih a chuahpimi theipar ṭha cu a si e, tiah Paul nih a cawnpiakmi kha Jesuh Khrih nih nihin zongah Farasi mi hna kha a cawnpiak ve hna. Pathian rian a ṭuan ai pah e tiah khan anih hi cu a ding taktak mi a si lai tiah kan ti kho taktak lai maw? mah le mah i chekhlat ṭhan hna usih. Anih cu Khrihfa upa a si caah a fel taktak mi a si ko lai tiah 100% in kan chim kho lai maw? i chekhlat hna usih. Mah minu, mipa hi cu mihrawkhrawl a si ko lai, tiah lenglei in va sawi sawhsawh hlah. A tuahsernak ah Pathian thlarau a ngeimi hna nih an tuahsernak ah theipar ṭha an langhter e, timi te kha nihin i kan Bible cathiang nih a kan cawnpiakmi a si. Cu theipar ṭha cu kan tlai ve ding kha Bawipa nih a kan duhpiakmi a si. 

Cucaah nifatin kan nunnak ah biakinn kaa pumhnak, thla ka camnak, rawl ka ulhnak hna nih in Bawipa he a ka naihter chinchin tu s ihram seh, timi te kha thlacam buin Pathian in kan herhmi thluachuah kha hal chinchin hna usih.

Thazaang petu /- Fr. Fidelis Maung Sein