Jesuh hnu zulh timi cu Mah duh in nun a si lo
Nihin cu zarhkel (22)nak zarhpi ni kan phan ṭhan cang hna. Nihin kan rel mi cathiang hna nih a kan cawnpiak duh mi cu “Pathian hnu zulh timi cu mah duh ning in nun ding a si lo” timi hi an si.
Avoi(1)nak kan relmi Jeremiah (Jeremiah 20:7-9)chungah: Bawipa nih na ka kawh i na hnu kan zulh, na ka fial ning in cawnpiaknak ka tuah ko nain, mi hna nih an ka cohlang duh lo. Nehsawhnak men ah an ka rel ee tiah a ti. A caan ah Pathian rianṭuan timi ah hin zeizong te tlamtling dih lai tinak a si lo. Harnak le zuamtaihnak a um hrimhrim ko lai timi zong kha kan theih ding a si.
Thawngṭhabia (Mat 16:21-27) chungah Jesuh nih Peter a siknak kong kan hmuh. Jesuh nih a thih lai nak kong a chimh hna tikah Peter nih mah bantuk tihnak kong chim lo dingin a thloh tikah Bawipa nih a sik. “Pathian ruah ning in na ruat lo, minung ruah ning lawngin nan ruah” tiah a ti. Peter nih Jesuh cu Israel mi hna khamhtu, Bawi, Siangpahrang si ding hmuh in a hmuh i Isael mi vailte hna luaṭer tu dingin a rak ruah caah Bawipa nih a thih lai nak kong a chim tikah a rak thlohnak zong a si.
Pathian rianṭuan le a hnu zul kan sinak ah hin kan caah Pathian nih a ṭha bikin a kan timh piak mi a um ko. Minung ruahnak in kan hngal kho lo. Kan himnak le khamhnak kan hmuh nak ding caah zeizong te a rak kan timhpiak dih cang ko. Sihmahsehlaw, kanmah ruahnak le thil ti khawhnak cung lawngah nun kan i timh a si ahcun Pathian nih a kan timhpiak mi program he aa pial kalh in kan um sual lai. Khamhnak kan thlau sual lai.
Peter cu Jesuh hnu zultu men men a si ko. A saya a simi Jesuh kha zeitin nun ding le um kal dingin a cawnpiak ding a si lo. Pathian a si mi Jesuh nih a si lai dingmi thil vialte cu a theih cia dih ko. Amah timhpiak ning tein kan zulh le kan zumh kha a herhmi a si ko.
“Nan vailam i put u law kan hnu in ka zul u” tiah a kan ti. Saya a simi le Bawi a si mi Jesuh nunning te kha i cawn ding a si ko. Amah lam hmuhsak mi te kha kan zulh ve ding a si ko. A him cem mi le a tlung cem mi lam a si timi kha kan theih ding a si.
Voi(2) Bible (Rom 12:1-2)relnak zong ah “Nannih cu Pathian nih a cotlak dingmi a nung mi thawinak in nung u” tiah a kan ti. Raithawi a simi cu thawitu nih a duh ning in, a tuah ning in a um a herh. Khrihfa kan si caah Jesuh duh ning le fial ning in kan nun a herh. Mah duh ning in nun khawh a si ti lo. Mah duh ning in kan um kal, kan nun a si ahcun sunghnak lam, thihnak lam kan panh sual lai.
Jesuh nih ka hnu in ka zul u tiah a ti bangin amah nih a kan hmuh sak mi le a kan cawnpiak mi lam le nun ning te in kan nung lawngah zungzal nunnak ram ah cotlak mi kan si ko lai. Pathian a simi Jesuh hnu zul kan si caah amah hnu zul ko hna u sih. Kan hmai in kan caah zeizong vialte a kan timhpiak cia dih ko cang.
Thazang petu /- Fr. Fidelis Maung Sein