Pawrhlawt a duhmi cu Bawipa nih a tuahmi ah khan i pawrhlaw ko seh
Nihin kan relmi cathiang hna (1Kor. 1:16-30; Mk. 6:17-29) tiang a si. Cu chungin tlangtar ka duhmi cu “Pathian hmai ahcun ahohmanh an i pawrhlaw kho lo.
Nihin cu tipil petu Johan puaini a si. Mithiang Johan cu a pa Zakariah le a nu Elezabath a si. Jesuh Khrih a konglam cu Johan a rianṭuannak in hmuh khawh, theih khawhmi a si. Johan cu Bawipa Jesuh nih, “Nangmah cu cungnungbik Pathian profet” ti na si lai. Amah a lam kha rak sialsiamtu dingah Bawipa nih a thlahmi profet a si. Johan cu biatak phuangtu a si. Tangdor nun ngeimi a si.
Johan cu Jordan tivakam thawngṭha a chim lioah mitampi cu tipil in awkah an ra i, Johan cu “Messiah cu na si maw” tiah an hal. “Ka si lo, kei cu a kedang hri phawihtu hmanh kaa tlak lo” a ti. Johan nunzia cu aa dawhtuk. A chuahni in ramhlak ah a ummi a si. Johan hni le puan cu saphaw a si, khaubawk le khuaihliti a eimi a si. Nihin a voikhatnak kan relmi (1Kor. 1:26-30) chungah, “Ka u le ka nau hna, Pathian nih a rak in auh hna ah khan zeibantuk mi nan si kha philh hlah u. A fimmi le thilti khomi cu mi tlawmte lawng nan si.
Vawlei nih zeihmanh ah a rel lomi thil Pathian nih thiam thengnak cu mifim mi kha an ningzak seh tinak caah a si i, cuti a tuahnak cu Pathian hmai ahcun ahohmanh kan i pawrhlaw kho lo ti hi a si. Pawrhlawt a duhmi cu Bawipa nih a tuahmi ah i pawrhlawtpi ko hna seh” tiah a ti. (Gal. 6:14) ah Mithiang Paul nih, “Kei cu Bawipa Jesuh Khrih vailam lawng hi ka pawrhlawtpi ko lai. Zeicahtiah Khrih vailam thawngin vawlei hi ka caah a thimi thil a si cang. Kei zong vawlei caah a thimi ka si cang” a ti. Minung sinak nih a chuahpimi cu ruamkainak, pawrhlawtnak, nu le pa sualnak, hnahchuahnak, ziarngaihnak hna kha a si.
Thawngṭhabia chung kan relmi cu, “Herod nih Johan cu thong a thlak. Johan nih Herod cu “Na nau nupi cu na ṭhit awk a si lo” a ti ruangah a si. Herod cu biatak a mertakmi a si. Pathian nakin minung a upatmi a si. (Lam. 12:21-23) chungah, “Herod cu a bawi ṭhutdan cungah a ṭhut i, mizapi sinah bia a chim. Bia a chimtu hi minung a si lo Pathian a si” tiah a au. Herod cu mi pawrhlaw, mi ruamkai, Pathian Pathian a ṭih lomi a si caah a hnuah tholung rawl ah a cang.
“Pathian hmaiah pawrhlawtpi khomi thil a um lo. Pawrhlawtpi khomi cu Vailam lawng hi a si. Vailam tahnak cu toidornak in a rami a si” (Filipi. 2:6-9) chungah kan hmuh. Nihin Mithiang Johan puaini a si. Mithiang nun nih a kan cawnpiakmi cu “tandor nun ngei uh” ti hi a si. Zeicahtiah Pathian hmaiah pawrhlawtpi khomi thil a um lo.
Thazang petu /- Saya Francis Khua Pheng