Timhcia tein kan um a Herh

Bawi Khrih ah dawtmi u le nau hna, tutan kan Nu Bupi nih a kan timhpiakmi (Mt. 24:42) chungah, “Cucaah nan Bawipa a rat lai ni nan hngalh lo caah ralring tein um ko uh” timi tlangtar in nihin thazaang lak ṭi le ruah ṭi kan duh hna. 

August thla (27) ni paohpaoh hi kan Nu Bupi nih Mithiang Monica puai sunglawi ngaiin a kan tuah piak ni a si. Mithiang Monica hi kum (331) ah North Africa, Thagaste timi ah a chuahmi a si i, a hngakchia lio tein biaknak lei ah a rak i zuam ngaimi pakhat a rak si. A vun upat deuh tikah a nu  pa nih zumlotu Rome miphun pakhat a simi Patricius he ṭhitumhnak an tuahter hna. Cun ṭhitumhnak an tuah hnu in Bawipa nih thluachuah a pek i, fapa pakhat an ngei. Cu fapa pakhat cu Augustin an timi a si i, cu Augustin cu an vun i upat deuh tikah a nunnak ah sualnak phun zakip a tuahmi, sualnak he aa ciah pengmi misual taktak pakhat a rak si ve. 

Cun misual taktak a sinak nih cun a nu lungthin kha a fahter i, lungre thei ngaiin le chungvang ngaiin a um peng. Asinain Bawipa sinah lung dong lo tein rawl ulh thlacamnak he a um pengmi mithiang pakhat a rak si bantuk tein lung dong lo tein Pathian sinah thla a camnak ruangah a vapa zong zumlotu sinak in a thih lai kumkhat ah tipilnak a rak ing i, Catholic Khrihfa pakhat a rak cang. Cuve bantuk cun Mithiang Augustine zong a nu thlacamnak thawngin a nunnak aa thleng i mithiang kan Nu Bupi chungah Theology kan cawn chuahmah liomi, Mithiang Augustine pakhat theology a rak ṭialmi mithang taktak pakhat a rak si ve. Cucu zeiruang ah dah a si tiah cun a nu thlacamnak thawngin a si timi nihin ah kan hmuh khawhmi a si. 

Nihin ah voikhatnak bible kan relmi chungah (1Kor. 1:1-9) chungah zeidah kan hmuh tiah cun, “Nannih cu Pathian mithiang mi si awkah kawhmi nan si. Kan Bawipa Jesuh Khrih min in thla a cammi paoh cu khua zeika i a ummi an si hmanh ah Pathian ta an si” tiah a ti. Khua zeika ka um i, khua zeika in thla kan cam hmanh ah Pathian nih cun a kan theih i, cu kan thlacamnak aw cu a vun theih tikah a mithiang si awkah a kan auh hnawh chan cu a rak tling. Hi nihin ah dawtmi u le nau hna, Mithiang Monica nunnak ah siseh, Mithiang Augustine nunnak ah siseh nang le kei kan hmuh khawhmi a si. 

Cun Mithiang Monica cu Father pakhat nih a rak timi cu zeitin, “mithli he rawl-ulh in thla a cammi fale hna cu zeitik hmanh ah an rawk thai bal lo” tiah a ti. 

Dawtmi u le nau hna, nihin ah nang le kei chungkhar ah kan fale caah, an nunnak an i thlennak ding caah mithli he chungkhar nu nih Pathian sinah thla kan cam bal maw. Khakha nang le kei kan nunnak ah i check usih. 

Nihin ah Mithiang Monica a nunnak hi cawn awk tlak tampi chungkhar nunnak nih kan hmuh khawhmi kan i lak dingmi tampi a um. 

Nihin thawngṭhabia kan relmi chungah zeidah kan hmuh tiah cun, “ralring tein um uh, nan Bawipa a rat lai ni le caan nan hngalh lo caah” tiah a kan ti. 

Dawtmi u le nau hna, “zeiruang ah dah Pa Pathian nih kan Bawipa Jesuh Khrih a rat ṭhan lai nak hi a thuh i a thli tein a chiah. Zeiruang ah dah a kan hngalhter lo” ti a si ahcun nifatin kan nunnak ah daithlai loin timhcia tein kan thlarau nunnak caah um hna seh ti a kan duh caah a si. Thlarau khamhnak hi hmuh hna seh ti a kan duh caah a si. Lenglei ṭamhnak, lenglei timhtuahnak he kan Bawipa Pathian nih a duh lomi a si. Chunglei thlarau nun ah amah he pehtlai in um peng i, amah duh ningin um i, amah he ton khawhnak dingah um le nun hi kan Baiwpa Pathian nih a kan duh piakmi a si caah a si. 

Cu ahcun “mifir bantukin a rak lai” tiah a ti. “Inn ngeitu nih mifir rat lai kha a hngalh lo caah” tiah a kan ti. Nang le kei kan Bawipa Jesuh Khrih a rat lainak ni le caan kan hngalh lo caah hin kan thlarau nunnak caah timhcia tein um usih. Zeiruang ah dah timhcia te le ralrin tein kan um lai? Thaizing kan nunnak kong ah kan hngalh lo caah a si. Khamhnak hmuh caan cu nihin ni ah a si i, kan Vawlei pi zong hi ni nikhat ah a rawk lai dingmi a si hrimhrim caah timhcia tein kan um dingmi a si. 

Cun minung kan nunnak zong hi caan tawite lawnglawng a si caah nihin dawtmi u le nau hna timhcia tein kan um dingmi a si. Kan Bawipa Jesuh Khrih a rat ṭhan lainak ni le caan nihin thawngṭhabia chungah kan theih bantuk tein kan hngalh lo caah mirum pa bantukin thih hnu ngaihchih loin kan nun chungah kan sual kan palhnak vialte caah i ngaihchih in amah ton khawh dingah a fimmi ngaknu panga bantuk tein kan thlarau nunnak caah hin timhcia te le amah he rawl i hrawm khawhnak dingah ralring tein a nungmi Pathian fanu pa kan sinak ding ah nan dihlak cungah Bawipa nih a thar in thluachuah in pe ko hna seh. Amen

Thazang petu /- Saya William