Pope Leo XIV: Hla thiang sak cu Pathian thangṭhatnak le zumtu hna thianternak caah a si
Pope Leo nih Pathian bia cawnpiaknak a tuah lio ah, “Pathian thangṭhatnak caah hmanmi Khrihfa hla hna an sunlawihnak cu rikhiah khawh an si lo” tiah a ti.
Biaknak chung hmanmi hla cu, “Pathian kan biaknak ah aa telmi a si i aa dawhnak men sawhsawh in hmanmi a si lo” tiah a ti.
Thlacamnak le zumhnak langhternak
Pope nih biaknak chung hmanmi hla le music kong he pehtlai in hiti hin a chim: “kan hlasaknak hna zong hi thla kan cam a si. Cun u nau sinak he lungthin khat tein Pathian sin kan i pekchanhnak le biaknak chung raithawinak ah kan i tel ve nak a si” tiah a ti.
Pope Leo nih St. Augustine chimmi biatlang hmangin “Cantare amantis est” “hla sak cu dawtnak a ngeimi hna ta a si” tiah a ti.
Gregorian hla cu upatnak sangpi in an chiah
Bupi chung Council tuahnak hna nih Gregorian hla hna he pehtlai biapi tuk mi hmun ah a chiah zungzal hna i, puai tuahnak hna zongah hmanmi a dang hla thiang pawl zong telh chih ding in nawl a kham lo tiah Pope Leo nih a ti.
“Council chung ruahnak hna he aa naihmi tlangtar cu ‘nunphung thlennak’ kong tleh chih in a thiangmi Pathian hlasaknak lei zong aa tel,” tiah a ti. “A bik in, nunphung dangdang hna i hlasaknak phunglam hna he pehtlai in, biaknak le zatlang nunnak ah aa telmi an si caah, nunphug nih i ngeih cio mi a thlingmi hla hna kha biapi ah chiah a herh” tiah Pope Leo nih a ti.
Hi kong he pehtlai in, Pope Saint John Paul II nih “Biaknak lei he pehtlai in tuah mi hla hna chungah a thianghlimmi biafang le aw hman a herhnak” kong a rak chimmi kha Pope Leo zong nih biatak tein theihter nak a tuah ṭhan.
Cun Pope Leo nih: “biaknak lei ah hmanmi hla hna a phuah tu hna zong nih an hla tuah thiamnak cung lawngah i rinh lo ding le biakhiahnak tuah lo dingin” ralrinnak bia a chim fawn.
Pope nih biaknak caah timhmi hla hna cu biaknak caah aa tlak a herh. Hmanmi biafang hna le awcawi hna zong biaknak phunglam i sining le tuahsernak hna caah hman dingin aa tlak ding a si a herh tiah a ti.
A donghnak ah, Council chungin ruahnak he pehtlai in a chim. “Seminary ah siseh, music sianginn hna zongah biaknak phung kal ning le a pek duhmi fimnak, Pathian sunparnak-thangṭhatnak theih a herh nak siseh, catholic sianginn hna zongah biaknak lei he pehtlai in cawnnak ṭha an ngeih khawhnak ding a herh” nak kong zong a chim.
Source: LiCAS.news