Pakhat le pakhat thazaang i peknak.

Nu le va hna cu chungkhar kong nunnak lamthluan ah harsatnak tampi he an tong hrimhrim lai. Cu tikah, caan khatkhat cu lungdongh le hnabei dongh caan zong aum ko lai.

Pakhat a lungdongh caan le hnabei donghcaan ah pakhat nih thazaang pek thiam a herh ngaingai. Hnemh thiam a herh ngaingai. Pakhat le pakhat khat le khat i peknak cu chungkhar kong ah fahnak hna, harnak hna lonhnak ah tampi a bawmh.

Cucah Paul nih, Pakhat le pakhat i bawmh uh tiah (1 Tesalon 5:11) ah forhfial in a chim. American tuanbia ttial thiam minthang Sayakyi Natheniel Hawthrone cu amin arak langh setsai lo hlan ah arian a sungh ruangah fakpi in a lung arak dongh.

Amah cu rian ngeilo asi caah lungnuamhlo ngai in a um tikah a nupi Sofia nih arak theihthiam piak i thazaang arak pek. Sofia nih, “ Ka dawt aw lungnuamh lo in um hlah!, na ttial duhmi, thazaang na ngeih deuh mi tuanbia hna kha tei rial in ttial chih ko. Chungkhar eidin kong ah phanghlah. Keimah ka khon mi tangka te in chungkhar eidin hrukaih caah cun a za ko lai. Ka dawt, atthabik tuanbia na ttial khawh te ko lai, ti in hnemhnak thazaang arak pek. A nu pi Sofia hnemhnak thawngin Natheniel Hawthrone cu atha a tho than colh. Zumhfeknak, ruahchannak khat lak he tuanbia han a ttial tthan i a ruahhlan ah tuanbia tthabik arak chuah kho i Vawleicung minthang cattal thiam Sayakyi ah aa chuah.

Nu le va nunnak ah pakhat le pakhat hnemh le thazaang i peknak in teinak nganpi hna hmuh khawh asi. Pakhat a lungdongh lio caan le teinnak a hmuh lo caan hna ah a dang pakhat nih hnemh lo in sualphawt biachimnak te hna cu santlaimi asi lo. Harnak lawng a chuahter chih.

Pakhat le pakhat i hnemh le thazaang i pek thiam ahau ti mi philh hlah usih. Zaangfah a thlummi thazaang pek nak bia hna cu ngaih a nuam i thazaang a siter taktak. Zaangfah mi thazaang peknak bia cu dawtnak hmelchunhnak asi i “ Dawtnak nih a sersiam hna” (1Kor 8:1) ati.

Chungkhar i harnak ton caan ah pakhat le pakhat mawhchiat, ralser mi nak in, pakhat le pakhat dawtnak in thazaang pek i hnemhnak lawng nih santlaimi asi. Mizei paoh nih zaangah mi, ngaihnuam mi bia lawng theih an duh cio mi asi.

“Lehnak nem nih thinhunnak a damter. Biahrang nih cun thin a phawh, tthatlonak a tuahtu lei nih lungthin kha a khuai tawn. (Phungthlukbia 15: 1-5).

“Biathlum cu Khuaihliti bantuk asi, nunnak caah a thlum i, pum caah damnak asi.” (Phungthlukbia 16:24)

An rum ko nain duhdawtnak a ngeilo mi innchungkhar cu a nuam mi innchungkhar an si bal lo. Misifak an si ko nain zaangfah zawnruahnak a ngeimi innchungkhar tu cu a dai i a nuam.

“I sik lengmang bu i puai tuahnak inn i umnak ca cun daite i buhtthing peikhat ei attha deuh.” (Phungthlukbia 17: 1-2) tiah ati.