Bawipa lo chungah rianṭuan ding hmunhma a um peng ko

August 19 ni caah Bupi nih a kan timhpiak mi Cathiang hna; Ezekial 34:1-11, Matt 20:1-16 tiang hna hi an si. Hruaitu tuukhal si dingin auh sinak le Pathian siannak Pathian dawtnak chungah lunglawmh thiam ding timi tein ruatṭi hna usih tiin sawm kan duh hna. 

Ezekial 34 ah zeidah kan hmuh ti ahcun; Bawipa Pathian rian a ṭuanmi hna nih, Isarel mi hna chungah hruaitu a simi hna nih, tuukhal hmun ah a dirmi hna nih an rian kha philh in Bawipa Pathian nih a duhpiak mi hna dirhmun kha zulh loin thazaang dermi kha an philh hna, cun mizaw zong zoh ti loin an kaltaak hna. A tlaumi tuu hna, a tlaumi Isarel mi hna zong an kawl ti hna lo, anmah le anmah himnak ca lawngah, nuamhnak ca lawngah hmunhma pakhat ngeihnak ca ding lawngah an nun tikah harsatnak a tongmi tuu bantukin a simi Isarel mi hna kha hlawt an si tikah Bawipa Pathian nih sual a phawt hna. Cu tikah keimah hrimhrim nih ka hruai hna lai, keimah hrimhrim an tuukhal ka si lai tiah Ezekial chung i kan hmuh mi cu a si. 

Gospel thawngṭhabia chung zongah Matt 20 chung kan zoh tikah, mitsur dum ngeitu pa nih a dum chung i rianṭuan hnga dingmi a kawh hna tikah zinglei tuan tein a kal tik zongah, mi cu a sawm hna, chun zongah mi cu a sawm hna i a dum ah rianṭuan dingin a thlah hna. Cun zanlei caan zongah mi kha a auh ṭhiamṭhiam hna i, a dum ahcun rianṭuan dingah a thlah ṭhiamṭhiam ko hna. Cu tikah zanlei ah rianṭuan man an thoh tikah an bawipa nih zing a ṭuanmi siseh, chun a ṭuanmi siseh, zanlei a ṭuanmi vialte hna zong kha aa tluk ruang tein a man a phalh hna tikah minung khuakhannak, minung ruahnak in cun a dik lo, tiah ti khawh a si. Cuti zong cun an ti. 

Sihmanhsehlaw dum ngeitu pa nih ‘kan hlen ṭung lo, bia kan i kam bantukin kan pahnih hnatlak in kan tinhmi te pei kan pek ko cu, keimah thilri, keimah chawva chungin keimah nih ka duh ning paoh in tuahnak nawl ka ngei e tiah a ti. A siannak kha aho cung hmanh ah tamdeuh pek zong si loin, tlawm deuh pek zong si loin aa khat tein Pathian nih thluachuah a kan pek mi kha nihin thawngṭhabia chungah kan hmuh khawh mi cu a si. Kanmah tuahsernak in si lo, Bawipa nih a kan zaangfahnak in a kan pekmi thluachuah a si. 

Nihin zong Mithiang John Eudes puai a si. Amah cu Tlangbawi (Siangbawi) pakhat a si. Father pakhat a rak si i, amah hi Siangbawi hna caah zohchunh awk tlak taktak mi Siangbawi pakhat a rak si. Harsatnak a tongmi, sifak mi hna, a nunnak ah lam remhpiaktu ngei lomi thlarau tlaumi tampi hna kha biatak tein a rak bawmh hna i, Bawipa duh ning tein a rak bawmtu, thlarau lei in hruaitu ṭha Father (Pa) pakhat a rak si. John Eudes nih zeitindah a rak cawnpiak kan ti ahcun; zeitik hmanh ah midang cungah Pathian thluachuahnak cung ahkhan nahchuahnak ngeih lo ding a si tiah a ti. 

Pathian rian kan ṭuannak ah a cheukhat cu kum saupi rian a ṭuanmi an um cang, a cheukhat cu kum 15, kum 20 Jubilee tiang a phan mi zong an um ve cang. A cheukhat cu nizan tihni i Pathian rianṭuan mi Pastor siseh, Tlangbawi siseh an hung si. Hi mi hna chungah minung taksa sining in vun ruah tikah annih cu kum note an si rih ko, kum caan saupi rianṭuan cang mi a si tiin ruah khawh mi a si. 

Sihmanhsehlaw nihin ah kan Bawipa nih a kan cawnpiakmi mitsur dum chung i rianṭuan dingah a thlahmi hna ahkhan kum caan saupi rianṭuan mi hna zong kha aa tluk tein thluachuahnak a pek i, zanlei sang te, nizan tihni te i  Pathian rian a ṭuanmi Siangbawi siseh, Pastor siseh, Sister te si hna seh anmah zong kha Bawipa nih aa tluk tein thluachuah a pek ko hna. Cucaah Bawipa thluachuah cungah khan nahchuahnak ngei hlah tiah Mithiang John Eudes nih a tinak cu a si. Nihin ni zongah kan theih mi Ezekial chungah a rianṭhiang a ṭuanmi hna nih mah caah ṭuan ding si loin, mi hna thlarau tlau hna kha kawl ding le bawmh dingin a rian a tlinh lomi Isarel mi hna kha a mawhchiat hna i, amah hrimhrim nih a mi hna a hruai hna lai tiah a rak cawnpiak. 

Thawngṭhabia chung zongah Bawipa rianṭuannak ahhin aa tluk ruang tein thluachuah pek kan si dih cio ko, Pathian hmai ah a ho hmanh thleidan kan um lo e, anih cu senior a si e, anih cu junior te lawng a si rih e, a ngakchia tuk rih e timi pakhat hmanh a um lo. Pathian hmai ah tluk ruang tein Bawipa nih zoh mi kan si. 

Cun Bawipa lo chungah a rianṭuan dingah hmunhma a um peng ko e timi te zong vun chimchap ka duh. Aa! Minung kan tamtuk cang timi a um lo. Bawipa lo ah rianṭuantu dingah zinglei zongah chuak, chun zongah chuak, zanlei zongah a kal ko, cun zanlei muih lai te tiang zongah Bawipa, dum ngeitu pa a kal i minung a thlah ko hna. Bawipa rianthiang ṭuannak ah caan khiahnak um loin, Bawipa rianthiang ṭuannak ah minung an tamtuk cang e, aa tlum ti lo e timi hmun si loin Bawipa rian ahhin hmunhma a um peng ko e, thlarau ca rianṭuannak ahhin Bawipa nih mi a thlah zungzal ko hna e, aho hmanh thleidan um loin nikhat ah thluachuah aa tluk ruang tein pek kan si dih ko lai e timi te kha nihin ni ah hrawmh kan duh hna. Nan dihlak in Bawipa nih thluachuah in pe ko hna seh!

Thazang petu /- Fr. Fidelis Maung Sein