SIPUAZI HE AA PEHTLAIMI KOKEK PAWNGKAM
Sipuazi ṭhanchonak lei dal ah ruahdamh khawhmi lehrulhnak hna a hun chuah i, thilthar chuahternak dal kha a fawiter i, aman dang deuh ding le hmattan chiahphu in an rak tuah cio cang hna. Hi kong kan zohnak thawng cun thil umtu ning kha kaupi in hmuhsak dingmi sipuazi he pehtlaimi kokek phungphai (upadi) chiah a herhnak kong ruah ngaingai a rak herh.
Kokek pawngkam zohkhenh kilvennak cu ṭhanchonak ca i a cheuchum a si ve caah mah kha a dangte ṭhen i cawnnak tuah khawh a si lo. Kannih cu minung kong hmuhsak in khua kan ruah tikah sipuazi telh in fimthiamnak hmunkip in upa hna kha hmunkhat tein pumh khawhter hnu ah kakip ṭhathnemnak caah rianrang in cawn le ṭuanchuahnak kha a herhmi a si.
Kokek pawngkam he pehtlaimi piahtana kha cawn in kan ruahnak ah mah piahtana cu minung he pehtlaimi, innchungkhar he pehtlaimi, rian he a pehtlaihnak, khuapi i umnak thil umtu ning hna he ṭhen i cawn khawh a si lo bantukin, minung pakhat le pakhat hawikomhnak, kokek pawngkam he pehtlaihnak hna he zong ṭhen i cawn khawh a si lo. Kokek pawngkam cawlcanghnak ningcang le zatlang nunphung thil sining ah minung pakhat le pakhat pehtlaih hawikomhnak pungsan ningcang hna cu pakhat le pakhat pehtlai tein pehtlaihnak an ngeih cio caah, thil umtu ning dihlak cu mah i a cheuchum hna nakin a ngan deuh timi biatung dirhnak kha tehte ah a langhtermi a si.
Vawlei pumpi chungin thil vialte hna cu pakhat le pakhat pehtlaih tein pehtlaihnak an ngeih a si ahcun Ram pakhat in a phu hna i ngandamnak a ṭha maw/ ṭha lo maw timi kong i a hnu pehzulh ah kokek pawngkam le minung thawchuah in umṭhutnak thilti khawhnak kha a hnorsuan khawh. Minung hna lungrualnak le zatlang nunphung hawikomh pehtlaihnak kha buarnak kip cu kokek pawngka kha a khonden dih. Zatlang nunphung he pehtlaimi kokek pawngkam cu ningcang tein tuahmi phu he pehtlaihnak a um i duhsah tein a hrampi a tlakmi innchungkhar phu in a kaumi umnak hmun he pehtlaimi, ram pumpi he pehtlaimi, vawlei pumpi he pehtlaimi phu leiah a karh a zai dih.
Zatlang nunphung phu pakhat cio chungah, phukhat le phukhat hawikomhnak, minung hna i pehtlaih hawikomhnak hna kha, Ram uktu (rampi) phu hna nih an zohkhenh i lam an hmuhsak piak hna. Hi phu hna thazaang a dertermi dinfel lonak, ṭhihphaihnak, zalonnak hna sunghnak hna cu a herh lomi a hnu pehzulhnak kha a chuahter.
Ram tampi hna ahcun uknak ning piin hmual ngeihnak a phi chuah a ṭumchuk tikah khan hi thil sining chungin a miak a la (a thoh) tu hna lawng kha a bawmhchanh hna i mipi caah cun piahtana tampi in a chuahter. Ram pakhat i uknak leiah siseh, uknak tang i hmun (thanah) kip ah siseh, minung pakhat le pakhat pehtlaih hawikomhnak ah siseh, upadi zulh upatnak cu a hlei in a tam deuh. A caancaan ahcun upadi kha a hmaan ning tein an ser ko nain, upadi cu cauk chung lawngah a tangmi kha kan hmuh. Hi thil sining ah kokek pawngkam zohkehnh khawhnak he pehtlaih in upadi zulhphung hna chuah hna seh law zeitluk in dah a ṭhat hnga.
Tahchunhnak kan langhter ahcun cheukhat ram hna ahcun tupi hna zohkehnh kilvennak upadi an ser ko nain, upadi a buarmi hna kha an hmuh ko na rawhrawh in hmurhuh in dai tein an um kha kan hmuh hna. Cu hleiah hmun pakhat i thil a cangmi kha hmun dang um hna nih an i zohchunh. Biana ah kan chim ahcun mirum hna chungkhar cheukhat hna ah rithai-sii an hmanmi cu sifakmi hmun um hna sinin rithai-sii kha an luhpi hna. Cu hmun um hna cu an ziaza a rawk hleiah an nunnak zong an sungh. Kokek pawngkam zong an rawk dih cikcek.