Pathian nih Kan caah a kan Tinhpiak piakmi

Thawngṭha hrawmṭinak caanṭha a kan petu kan Pathian a min ka thangṭhat. 2026 August 14, nihin ni ah Khrihfa Bupi nih Bible rel dingin a kan timhpiak mi Matt 19:3-12 tiang an si. Hi chungah a tawinak in kan char a si ahcun Pathian nih a fonhmi hna cu a hohmanh nih ṭhen hna hlah seh ti le Vancung Pennak ruang hrimhrim i nupi ngei loin a ummi an si. Hi cawnpiaknak a zul khomi nihcun cuticun zul ko hna seh ti hi a biapi in a langhter mi a si. 

Nihin kan relmi thawngṭha chungah Sacrament pahnih a langhter i, a thing ṭhitumhnak, chungkhar sernak, ṭhitumhnak Sacrament le Pathian Tlangbawi cannak Sacrament tiah Sacrament pahnih kan hmuh khawh. Pathian nih a fonhmi hna cu ho hmanh nih ṭhen ti hna hlah seh, anmah cu pahnih an si ti lo, pakhat an si cang tiah a ti. Pathian nih fonhmi cu zeibantuk khi dah a si kan ti ahcun Biakinn thiang ah, amah Pathian hmaika ah a salpa minung minister Siangbawi hmangin a thiang biakamnak tuah in i ṭhitumhnak, i lehthahnak khi Pathian nih a fonh mi ṭhitumhnak a si i, cucu a thiang ṭhitumhnak a si. 

Hebrew 13:4 chungah ṭhitumhnak hi mi vialte nih kan hmaizah awk a si, nu le va zong zumh awktlak an si veve awk a si tiah a ti. Zei miphun kan si ah Khrihfa kan si ahcun Khrihfa ṭhitumhnak in kan i ṭhitumh awk a si i, inn i thlacamnak tuah men le Pastor te va sawm men in ṭhitumhnak thlacamnak tuah kha Pathian nih a fonhmi ṭhitumhnak tiah kan ti kho lo i, cucu Khrihfa ṭhitumhnak zong a si lo. Kan Lai nunphung in Pathian phung ah kan hei hnuhdawh sawhsawh mi lawng a si. Sacrament a cang kho lo. 

Duhdawt mi nu le pa, u le nau hna a si ahcun Pathian Biakinn thiang ah, Pathian hmaika ah a Tlangbawi hmangin biakamnak thiang he ṭhitumhnak a tuah cangmi hna nih zeidah ṭuanvo kan ngeih? Sertu Pathian nih zeidah a kan timhpiak timi kha nihin ni ah a tawi tein phawtzamh khawh kan i zuam lai. Pathian nih a fonh cangmi hna, nu le va hna nih hmasabik i an rian a nganbik cu a pakhatnak ah Pathian i a muisam a kengmi fanu fapa hna hrin, fanu fapa ngeih kha a si. 

Salm 127: 3 nak ah fanu fapa hna hi Pathian nih thluachuah a kan pekmi an si i Pathian ro an si tiah a ti. Fanu fapa hna nih minung kanmah taksa men dirhmun in kan ngeih khawh mi a si lo i, Pathian nih thluachuah a kan pekmi a si i, Pathian nih ro a kan pekmi an si. Pathian nih nu le pa a kan pehtonh i a kan fonhnak a ruang bik cu fanu fapa ngeih ding a si. Biakam hlun chan ah a chanchan in kan zoh a si ahcun Abraham, Noah an si ah Pathian nih thluachuah a pek hna i, fa tampin ngei ulaw vawlei cung pi hi karh ko uh tiah a ti. Pathian nih vawlei kha laak in minung ser ai tim ti lo. 

Nu le pa fonhter in cu chungin dawtnak in a chuakmi Pathian muisam keng mi, fanu fapa a ro cotu hrin i vawlei cung khahter kha cucu Pathian nih a kan timhpiak mi a si. Nu nih ka paw cu keimah nawl a si i, ka duh ah ka hrin kai phih lai i, ka duh ah ka hrin lai i, ka duh ah ka hring lai lo tinak nawl kan ngeih lo kha kan i fian a herh. Hrin i phih hi, fa ngeih duh lo hi sual a si maw kan ti si ahcun Genesis 38 chungah kan hmuh khawh mi cu; Onan nih a nupi Tamar a ihpi tikah fa ngeih kha Onan nih a duh lo caah a ci kha a lengah a chuah tawn. Cucaah fa an ngei kho lo. Cucu a hmutu Pathian nih a thing a hun caah Pathian thinhunnak cu Onan cungah a tlung i Onan cu a thi zau. Zeicahdah a thih kan ti si ahcun fa ngeih duh lonak thinlung kha Pathian nih a duh lo i, Pathian tumtah mi kha a chawhkanh caah a si. 

Cucaah cun Onan cu Pathian nih a thah. Thihpi tlak sualnak a tuah caah a si. Sualpi a si. Cucaah cun Pathian nih a kan pekmi fanu fapa zeitluk an tlawm an tam zongah kannih nihcun alnak nawl kan ngei lo, a kan pek zat poah kha Pathian thluachuah le Pathian ro a simi a mifa hna cu kan ngeih i kan hrin a hau. A pahnihnak ah Pathian pekmi rosung fale hna cu fimthiamnak pek ding hi nu le pa nih kan rian nganbik pahnihnak a si. Thlarau fimthiamnak zong kan pek hna a hau i, thlarau karhlannak ram zongah fale kha Vancungram tiang sertu Pa Pathian sin tiang kan hruai hna ding hi kan rian nganbik a si. 

A pahnihnak fimthiamnak cu vawlei fimthiamnak a si. Kan fale fimthiamnak an cawn khawhnak ding hnga caah nu le pa kan rian nganpi a si fawn. Hawi theih zong an theih i hawi hmuh zong an hmuh khawhnak ding caah nu le pa kan rian a si. 

A pathumnak; nu le va cu nun i hrawm ding Bawipa nih a kan duhsak. Nu rian, pa rian um lo, kan tuah khawh tawk cio kha kan hmaika i a chuakmi kha kan tuah kan ṭuan ding kha a herh i pakhat le pakhat harnak kha kan i bawmh i fawinak ah kan i lawmhpi i lunglawmhnak ah kan i lawmhpi i ngaihchiatnak kan ton tikah kan i hnemh ding kha cucu Pathian nih a kan duhpiak.

 A palinak ah nu le va kan si bantukin taksa nih a hiarmi, nu pa sinak di kan i riamhter ding zong a duh fawn. Cucaah cun dawtmi u le nau, nu le pa hna, cu phunli cu ai ṭhium cangmi hna, Pathian nih a fonhmi hna chungkhar hna, nu le pa hna nihcun cu vial cu kan tlinh a herh. Isarel miphun cu Pathian nih ka miphun nan si i Kei cu nan Pathian ka si lai a tinak lakkar ah an zulh hnga dingmi nawlbia a chiah. Ka nawlbia nan zulh a si ahcun ka miphun nan si lai i kei cu na Pathian ka si lai tiah a ti. Cucaah cun Biakinn thiang ah, a tlangthiang ah Pathian hmaika ah ka chan chung, ka thih tiang, chiatnak ah siseh, ṭhatnak ah siseh, ka nupi a si lai i, ka pasal a si lai tiah Pathian hmai ah biakamnak kan tuah mi nihkhin a thiangmi chungkhar, Bawipa sinah a thiangmi raithawinak pekchanh bantuk, a thiangmi chungkhar ah a ser i, cucaah cun ai lehthah i fonh a simi hna nu le va cu Pathian nih minung a sermi program chungah kannih zong kha kawh auh kan si ve timi kha kan i philh lo ding kha a biapi ngaingai. 

Kumkhat caah ai ṭhium mi kan si lo i zungzal caah ai ṭhium mi kan si bantukin Pathian pekmi nawlbia, Khrihfa Bupi nih timhpiak mi Pathian i program vialte kha tlamtlin ter khawh ding kha kan i zuam rilmal kha a herh a si. Nu le va ai ṭhium cang mi kan i ṭhen kho maw? ṭhen kho hlah. 1Corin 7:39 cung ahcun nu nih a va a nunchung ahcun a duhmi pa he i ṭhit awk kha a luat lo. Sihmanhsehlaw a va pa a thih hnu ahcun a duh mi pa he i ṭhit awkah a luat. Sihmanhsehlaw cubantuk ṭhitumhnak cu Khrihfa hna ṭhitumhnak a si awk a si tiah a ti rih. Cuaah cun Khrihfa ṭhitumhnak in kan i ṭhitumh awk a si i, Khrihfa ṭhitumhnak in ai ṭhium cangmi hna nihcun Pathian nawlbia, Pathian program kha cuanh peng in a nawl kan zulh peng kha a hau. 

Cu a si ahcun kan innchungkhar a dam lai. Pathian nih fonh cangmi chungkhar thiang a sermi hna chungkhar vialte, kan biak kan Pathian nih thluachuah in pe hna sehlaw, lam in hruai hna sehlaw Vancung Kanan ram cu zeitlukin dah a nuamh ti cu nan chungkhar cio ah nan rak teh khawhnak hnga ding caah thlaza kan campiak hna. Pathian nih thluachuah in pe ko hna seh! Amen

Thazang petu /- Saya Canute Bawi Kam