Kan Fa le kha Jesuh sinh Kalpi hna u sih

Matthai 19: 13-15 : Mi zeimaw nih ngakchia kha Jesuh sinah khan an ratpi hna i, an cung i a kut chiah awk le thlacampiak hna awkah an nawl; sihmanhsehlaw a zultu nih khan an rak sik hna. Jesuh nih cun aa thwah i, “Ngakchia cu ka sinah ra ko hna seh, dawn hna hlah u; zeicahtiah Vancung Pennak cu hi bantuk mi hna ta hi pei a si cu,” tiah a ti. An cungah a kut a chuan i a kal. 

Nihin voi(1) nak Bible Ezakiel 18:4 ah: A nung mi paohpaoh cu keimah ta an si dih. A hringtu an nu le pa si hna seh, an fa le si hna seh an dihlak in keimah ta an si dih tiah a ti. Psalm chungah “Ram lak a ummi saram vialte si hna seh, vawlei cung thilnung vialte si hna seh an dih lak in keimah ta an si dih” tiah a ti. Zeihmanh kanmah ta a um lo, Pathian ta lawng te an si dih timi nihin ka relmi Psalm chung zongah kan hmuh. 

Nihin na fanu le na fapa hna si hna seh, a hringtu nu le pa si hna seh kan dih lak in Bawipa ta kan si dih. Psalm 127:3 : “Fanu, fapa ṭha hna cu Pathian ro, Pathian thluachuah an si” a ti. Hitihin maw Pathian ro, Pathian thluachuah a simi na fanu le na fapa hna hi na zoh sawhsawh ko hna lai maw? 

Nu le pa hna, nan fanu, nan fapa hna cu Jesuh sinah ratpi ko hna. Jesuh nih thluachuah a pekmi fanu, fapa ṭha si hna seh. Kan nu Bupi nih a kan cawnpiak mi cu “Nu paw chungin a chuakmi paohpaoh cu tipil in nak sacrament hmu dih ko hna seh” a ti. Tipil in nak cu Pathian fanu, fapa sinak, sual hrampi 7 in luatnak, catholic member sinak, Vancung innka hunnak, hrin ṭhannak, Pathian roco tu sinak a kan pek. 

CCC-1263, 1265, 1267 “Kan Bawipa Jesuh a thluachuahnak cu kan fa le hna nih an hmuh khawhnak hnga ṭuanvo a ngeitu cu nu le pa kan si.” 

Nihin fanu ṭha, fapa ṭha hna nih Pathian thluachuah hmu hna seh ti a duhmi nu le pa cheukhat cu an fa le kha Jesuh sin an rat pi hna i thluachuah an pek ter hna. Jesuh a thluachuahnak in an ṭhang. Efesa 6:4 chungah: Nu le pa hna nan fa le kha an thin hung hna seh tiin ti hna hlah u. Khrihfa ziaza le cawnpiak nak he ṭhanter hna u tiah a ti. Nu le pa hna na fanu, na fapa hna khi zeitindah na cawnghramh, na zohkhenh hna. 

Napoleon nih hitihin a chim: Ngakchia pakhat, hmailei a ra lai mi a lam thluan cu a hringtu a nu zohkhenhnak, conghramhnak thawngin a si lai a ti. 

1Siangpahrang 2: 2-3 chungah: David nih a fapa Solomon ro a pek mi cu inn le lo, sui le ngun a si lo. A biakmi a Pathian kha ro caah a pek. Bawipa Pathian bia kha na hlaw lai lo, na zulh hrimrhim lai. A lam na zulh lai, a nawlbia chungah na um peng lai tiah a ti. Solomon a rumnak le a min thannak cu a nu le a pa lam hruainak thawngin a si. 

Nihin hitihin maw na fa le hi na zoh sawhsawh ko hna lai. Pathian a ṭihzah mi fanu ṭha, fapa ṭha an si khawhnak hnga ṭuanvo a ngeitu cu nu le pa kan si. Pathian nih thluachuah a kan pekmi fanu, fapa hna hi nu le pa hna nih kut tlaih in Biakinn thiang ah kal pi hna u sih. Pathian bia cawnpiak hna u sih. Khrihfa nunzia in ṭhanter hna u sih. Kan fa le hna caah ahmasa bik pastor le saya cu nu le pa kan si. Nan dih lak in Bawipa nih thluachuah in pe ko hna seh. Amen

Thazang petu /- Saya Francis Khua Pheng