Lai Nunphung Cheukhat Hna

Roco Phungphai

A dang he aa pehtlaimi ro conak ahcun, an fapa nih a nu le pa hnatlakmi le an duhmi a ṭhit ahcun hmun le ro cu a co ko lai. Asinain a nu le pa bia al in an hnatlak lomi le anmah nak tangvong a ṭhit ahcun, milai pawl conak dirhmun ah a dir lai i, hmunpi cu a sung ko lai. A nu le a pa nih an thih taak hnu zongah a unau hna hnatlak lomi a ṭhit ahcun ro le innpi cu a sung ṭhiamṭhiam ko lai.

Nuchun fa nih innpi cu conak nawl a ngei lo. A pa nih a nunchung ah a zawn a ruah ahcun, a fa a si bantukin thilri tampi a pek ko lai. A thih hnu zongah a inn ah a umter ko lai nain, roco ah aa tuak in a um lan lai lo.

Nutak he an hrinmi fale nih nutlai he fa zeizat an hrin hmanh ah ro cu an co ṭhiamṭhiam ko lai. Asinain nutlai he an hrinmi fale nih a nu he an kawl ve mi thilri chungin a tlawmpal cu a cotin khawh ve lai. Asinain nutak he an hrinmi fa nih miphutphat, zei ruaram lo a si ahcun huchun fa, nutlai fa nih mah mihrutpa kha an zohkhenh, an cawmhlawm lai i hmunpi le ro zong an co ve ko lai.

Nupichun he an hrinmi fanu le fapa le nih a pa lung an ton lo ahcun nutlai fapa le nih nuchun he an hrinmi fanu upabik phunthawh cu a co lai. Nupitak le nutlai he fapa an ngeih lo ahcun mah fanu phunthawh cu, ro cotu nih a co lai. Man a dangdang tu cu nuchun he a chuakṭi mi a ṭale nih an co ko lai.

Unau pahnih an um hnga i dawt loin fakpi in an i si hnga. Pakhat pa nih nupitak le nutlai sinah fapa a ngei lo nain nuchun sinah fapa a ngei ṭung hnga. Nuchun he an hrinmi fapa cu thilri a ngeihmi chungin a duhmi a pek lawng a si lai i ro cu a pe hlei lai lo. Ro ngaingai cu amah he aa daw lomi mipa a unau pa sin ṭhiamṭhiam ah a kal ko lai.

An farnu nih a ṭa manco he fakpi in an i sik tikah ṭaman co ding cu, midang aa tlaih khawh. Cucu anmah ṭafar kong lawngah a si lai, rualchan dang he aa pehtlai lai lo. A ṭa nih a farnu cu a remṭhan i a farnu nih a duh lo ahcun ṭa ah aa tlaihmi nih a co ṭhiam ko lai.

Nutak le nutlai sinah fanu lawngte a ngeih hnga. Nuchun sin vial ah fapa a ngeih hnga. A duh le nuchun fa sinah, a duh le ro co dingah aa thimmi a unau chuahpi dang sinah man co cu a ṭhial in a coh khawh hna.

A nuchun kha a thlacamnak khokheng kha caan khatkhat ah a tawnghtham ter i, a nupitak kha a mak ruang ah maw, a thih ruangah maw; nupichun kha nupi tlai ah a hei hman hnga. Hmailei zongah thlakhoban kha ka tawnghtham ter ṭhan rih lai tiah a duh i nipitak ah kaan khah lai a ti duh ahcun nupi ah aa tuah khawh. Asinain amah nakin a niam deuh sinah a phun cu aa hnawh cang i amah phun tiangaw ruangah a si i phun niam ah a cang cang.

Hika zawn ah kan hngalh awk a simi cu, pa nih anmah phun tia lo nu kha, nuchun ah aa chiah caah a si. Nu nih amah phun tiangaw mi sinah cun nuchun ahhin an cang duh lo ti kha kan ruah awk a si.

Pu Hrang Tiam nih hitihin a ṭial.

Hi roconak kong he pehtlaiin Laiphung le Khrihfa phung hi aa rak i dang ngaimi a si caah Laiphung kongkau hun ceih poah ah buainak tam ngai a um. Laiphung kan phung ah ro cotu cu ‘arnak hmanh mi fa lawng nih ro co khawh a si ti a si. Arnakhmanh timi cu nipi ṭhi pa nih a ṭhit dingmi nu kha ka phun ka hrawmh, ka nupi caah dotla mi na si ti can ah arnak kha thah in cu tlangvalpa le nungak lawng nih ei phung a si. Mah nak phun niam le nauta deuh cu arnak hmanh khawh a si hoi lo. Phun niamsan aa tlukmi lawng arnak hmanh khawh a si. Arnakhmanh hi a hramthawk bik a si i arnak hmanhmi lawng nih Laiphung ah a sangbik khuangcawi tiang tuahpi khawh a si’ ti a si.

Arnak hmanhmi fa lawng nih ro co khawh a si ti tikah atu Khrihfa chan ah arnakhmanh ti a um ti lo. Nutak fa, nuchun fa ti a um ti lo. Cucaah a buainak tete a um len. A cheu nih Khrihfa miphun kan si lo, Lai miphun kan si caah kan Laiphung le lam cu kan hlawt awk a si hrimhrim lo a ti tawk an um. Atu Khrihfa chan ah a hlan pupa kalpi ning cun kal awk cu a ṭhat ti ṭung lo, kan fale cu arnakhmanh mi fale an si lo zongah kan ro cu kan pek ṭhiamṭhiam ko hna cu ta an ti ve, a buai ngai ko tiah cathluan a chuahpi i, LBC Yangon Zatlang le Nunphung Ṭhanchonak Bu nih hitihin bia an fun. ‘Mithi pa nih a fale caah a thih hlan i a chimmi asiloah a ṭialmi (will) kha biapibik siseh, buaibainak a um ahcun Laimi kan phunglam ningin ceih siseh, pupa chan in rohmi ro thilri pawl (inn, lobua, leikuang, meithal…. tbk) cu fapa le nih co sisehlaw, hlawn timi (ṭhi, hni, tbk) tu cu fanule kha ṭhenphawt si ve seh’ tiah an ti.

Cun Rev. S. Van Hre nih a tanglei bantukin a ṭial ve.

1-Nuhrim fa nih ro co phung a si. Nuhrim a sullam cu a hmasabik nupi tinak a si.

2-Nuhrim fa a um ti lo ahcun nutlai fa nih an co phung a si. Nutlai timi cu a hmanung nupi tinak a si.

3-Nutlai fa an um ti lo ahcun nuchun fa nih an co lai.

4-Nuchun fa an um ti lo ahcun lakfa nih an co lai.

5-Lakfa a um ti lo ahcun salpa nih a co lai.

6-Salpa a um ti lo ahcun phunkhat a unau nih an co lai.

7-Phunkhat a unau an um ti lo ahcun sinak ngakṭah an phawt hna lai. Ro conak ahhin cun bawi, chia ti thleidannak cu a um tuk lo. Bawi le chia i thleidannak tu cu thi le sa in a kalmi a si.