Zumtu Nun cu Ngaihthiam Nun a si

Bawi Khrih ah dawtmi u le nau hna; Hakha Service RVA a ngaitu nan dihlak cungah Bawipa nih a thar in thluachuah in pe ko hna seh! tiah thla kan campiak hna. Tutan ah kan Nu Bupi nih a kan timhpiak mi Matt 18:21-35 a si. 

Hi Bible cacaang hi a sau pah caah 35 te lawng kha kan rel lai. Nannih nih nan u nan nau kha nan lung chung taktak in nan ngaihthiam hna lo ahcun cu bantuk cun Vancung khua i a ummi ka Pa nih nannih zong cu an tuah ve hna lai. 

Nihin tlangtar in ruahṭi le thazaang laakṭi kan duh mi hna cu; ‘Zumtu nun cu ngaihthiam nun a si’ timi tlangtar in ruahṭi le thazaang laakṭi kan duh hna. Nifa kan nunnak ah kan cung a sualmi hna, kan cungah ṭhatlonak a tuahmi hna ngaihthiamnak timi hi, ngaihthiam ding hi a har ngaimi, kan zulh khawh tawn lomi pakhat a si. Asinain kha vialte kha kan Bawipa Jesuh Khrih nih nihin ah nangmah le keimah i zohchunh dingah an sualpalhnak vialte, amah a thattu lila vialte, a ral hna vialte dawt le ngaihthiam in nihin ah a kan hmuhsak mi Bible kan zoh tikah nang le kei nih tampi kan hmuh. 

Cucaah cun nang le kei zong kan Bawipa Jesuh Khrih fanu fapa kan si bantuk tein a kan cawnpiak mi vialte hi nang le kei nifa zulh khawh kan i zuam ding hi a biapi ngaimi a si. Nihin ah Peter nih a ra i kan Bawipa Jesuh Khrih sinah unau pakhatkhat nih ka cungah sualnak tuah sehlaw voi zeizat dah kan ngaihthiam lai? a ti. Voisarih tiang maw tiah a hal tikah kan Bawipa Jesuh Khrih nih ‘si hlah, voisarih a si lo, voi sawm sarih le voisarih na ngaihthiam lai, zeicahtiah Vancung Pennak cu hi bantuk hi a si’ a ti. Peter nihcun voisarih tiang khi unau pakhatkhat nih kan cung an sual sual ahcun ngaihthiam ding khi a ruahmi a si, nain kan Bawipa Jesuh Khrih nihcun voisawm sarih le voisarih na ngaihthiam hna lai a ti. Kha voisawm sarih le voisarih kha a karh in kan tuak tikah kan (မြှောက်) tikah voi 490 tiang ngaihthiam ding khi a va si ko. Asinain khakha kan Bawipa Jesuh Khrih nih a chim duhmi a si maw ti si ahcun a si lo, ngaihthiam peng dingmi kha kan Bawipa Jesuh Khrih nihcun a kan cawnpiak duh mi a si. 

Cucaah kan Bawipa Jesuh Khrih nih a vun peh rih mi cu zeidah a si; Siangpahrang pakhat nih sal hna an rianṭuan ning kha zoh ai tim e a ti. A thawhka te ahkhan a salpa pakhat cu a sinah an ratpi i, tangka dalen thonghra a batmi pa kha a si, cucaah tangka kha a pek khawh lo caah a nupi siseh, a fale si hna seh, an ngeihmi vialte kha leiba chamnak dingah cun sal ah zuar si hna seh tiah a ti tikah cu a salpa nihcun a khuk ai bilh i, zaangfah tein ka ngang rih ko tuah, cham dih kan zuam ko lai tiah a nawl caah a bawipa nih a zaangfah i cu a leiba vialte cu a ngaihthiam dih a ti. Cu mipa cu a va chuak tikah a sal hawi pakhat, tangka tlawmte a rak bat mi tu kha a va fu hi, amah cu a tlaih i a or in a dih e a ti. Na ka bat mi ka cham dih a ti, a sal hawipa nihcun a khuk aa bilh i, ka ngang rih sawh, cham dih kan zuam lai tiah a nawl ve e. Asinain cu pa nihcun a duh lo i thong ah a thlak i leiba a cham dih hlan tiang cuka thong ahcun a umter. Cu kong cu a sal hawi midang hna nih an theih tikah an bawipa cu an va chimh i an bawipa nihcun sal ṭhalo, na ka nawl caah na ka bat mi vialte kan ngaihthiam i, na cung i zaangfahnak ka ngeih bantukin pei na sal hawi cungah na ngeih ve awk a si cu a ti. 

An bawipa a thinhun tuk caah a leiba a lim khawh hlan tiang thong ahcun a thlak e a ti. Cucaah cun nannih nih nan unau kha nan lungchung taktak in nan ngaihthiam hna lo ahcun cu bantuk cun Vancung khua i a ummi ka Pa nih nannih zong an tuah ve hna lai tiah 35 chungah nang le kei kan hmuh khawh mi a si. Dawtmi u le nau hna; kan unau pakhatkhat nih kan cung i an sual tikah voi zeizat dah kan ngaihthiam? Cunglei Siangpahrang pa nih a salpa a ngaihthiamnak kong kan zoh tikah a salpa, leiba a ngeihtu pa nih ka ngaihthiam rih, ka ngang rih ko, kan cham dih te lai tiah a khuk ai bilh i a nawl i a bawipa nih a ngaihthiamnak kong nang le kei nih kan hmuh khawh mi a si. Cuve bantukin kan sual kan palh tikah mi cungah kan sual tikah ka palh e, ka sual e tiah ngaihthiam hal khawh dingmi zong a biapi ngaingai mi a si. Ngaihthiamnak kan hal lo a si ahcun nang le kei leiba kan ngei.

 Kan sual, kan palhnak kan i theih ko a si ahcun ngaihthiam hal ding zong hi i harh ding a si lo. Ngaihthiam kan hal tikah kan Bawipa Jesuh Khrih, a kan dawtu, nang le kei a kan ngaihthiam khawh lomi zeihmanh a um lo. Mi tlamtling lo, misual, mipalh kan i ti poahpoah ahcun kan lungthin taktak in sualngaihchihnak he sualngaihchih hnu lawngah ngaihthiam khawhnak timi zong cu a ummi a si i cuaah kan sual, kan palhnak vialte ngaihchih in ngaihthiam kan hal a si ahcun kan Bawipa Jesuh Khrih nih a kan ngaihthiam hrimhrim lai e timi hi nihin ah thazaang pek kan duh hna. Cuve bantukin kan Bawipa Jesuh Khrih nih nang le kei kan sual, kan palhnak vialte a kan ngaihthiam bantuk tein kan unau, kan hawikom hna zong ngaihthiam ding hi a kan forh chihmi a si. 

Voikhat ah aa komtuk mi mi pahnih, sianginn kaiṭi mi, ngakchiat lio tein aa komtuk mi pahnih an rak um ti si. Cu hna cu James le Johan ti an si i sianginn an lawi pah ahkhan an cawnmi ca kongah hmuhnak le ruahnak ai dan ruangah bia an i el i, James an timi pa nih Johan timi pa cu teng lakin a thongh ti a si. Bia kaa khat hmanh chim loin heeh tiah cun an kal i, voikhat cu ṭhetse tivakam an va phan. Ṭhetse cungah cun John an timi pa nihcun a kun i, ‘nihin ah ka dawttuk mi ka hawipa nih teng lakin a ka thongh’ tiah ṭhetse cunga ahcun ca cu a ṭial ti a si. Cun tiva kha va tan ding a si leh tiva an vun tan tikah cun Johan an timi pa cu ti lio a thiam lomi a si, ti nih a fenh i pil thluahmah in a um, khakha a hawipa James nih a va hmuh tikah ka hawipa hi a thi sual lai a ti i, a nunnak dihlak in a va chanhchuah i lengah a chuahpi ti a si.

Cun lengah a chuahpi hnu zongah bia kaakhat hmanh an chim lo. Cuticun an kal an kal i tlang an phan. Tlang an phanh tikah Johan an timi pa nihcun lungpher pakhat aa laak i, lung cungah cun ‘nihin ka dawttuk mi ka hawipa James nih ka nunnak a ka khamh, thihnak in a ka chanhchuah’ tiah lung cungah cun ca a ṭial ti si. Cu ca a ṭialmi cu a hawipa James nihkhan a hmuh tikah a khuaruah a har. Zei ruang ah dah teng lakin kan thongh i ṭhetse cungah na ṭial; tu kan khamhṭhan i lung cungah na ṭial; na tuahsernak hi kai fiang kho lo tiah a hal tikah a hawipa Johan nih a chimmi cu; ‘aww, a si ka hawipa, kan i siknak, kan i elhniarnak vialte hi philh tuan dingah hin ṭhetse cungah khan ka ṭialmi a si e a ti. Thli a vun hran tikah cu vialte ka ṭialmi vialte cu a hrawh dih colh lai e a ti. 

Lung cungah ka ṭialmi cu; dawtnak ka cungah na ngeihmi te hi zeitik hmanh ah philh kho lo dingin ka ṭialmi a si tiah a ti. Cunihcun zeidah thazaang laakṭi kan duh hna ti a si ahcun nang le kei mi cungah kan sual, kan palh tikah ngaihthiam khawh colh dingmi nun kan ngeih a herh. Ṭhetse cungah ṭial in hi vialte hi cu zeihmanh a si lo timi lungput te he, cun mi nih kan cungah dawtnak an ngeih tikah kan lungthin chungah nam in ca i ṭial ding a si. Cunihcun thazaang laak le cu tuanbia te nihcun chimh a kan duh mi a si. Nihin ah dawtmi u le nau hna; nang le kei nifa kan nunnak ah ngaihthiamnak timi hi a har ngaimi a si. Mi pakhatkhat nih kan cungah sual an tuah tikah ngaihthiam hi a har ngaimi a si. Asinain kan Bawipa Jesuh Khrih siseh, cun Mithiang Stephen zong nih siseh, an cungah sualnak an tuah tikah kha vialte kha an ngaihthiam hna tiah kan hmuh khawh. 

Cuve bantukin dawtmi u le nau hna, nang le kei zong kan cung i sualnak a tuahmi vialte hna, Vancung khua i a ummi ka Pa tiah kan Bawipa Jesuh Khrih i thlacamnak; mi nih kan cungah an sual tikah kan ngaihthiam bangin tiah thla kan cam bantukin nang le kei kan cung i sualnak a tuahmi vialte hna, nang le kei kan thazaang incun ngaihthiam awk a va har ko hnga. Asinain kan Bawipa Jesuh Khrih, kan sual kan palhnak vialte a kan ngaihthiam kho tu sinah bawmhnak hal usih. Zumtu nun kan timi cu ngaihthiam nun a si ko. Cu ngaihthiam nun, mi sualnak a ngaithiam kho tu, ngaihthiamnak nun a ngeimi fanu fapa kan si cionak lai Hakha Service RVA a ngaitu kan dihlak cungah Bawipa nih a thar in thluachuahnak kan pe ko seh!  Amen

Thazang petu /- Saya William