St. Clare, Virgin (1193-1253)

Poor Clare bu kha a thawktu Mithiang Clare cu 1193 kum ah Assisi khua ah phunsang chungkhar in a chuak. Kum 19 a ti ah St. Francis i ulh caan he pehtlaimi phungchimnak bia pakhat kha a duhtuk caah Portiuncula khua ah amah le amah kha Jesuh Khrih sinah pumpek in hlut dingah a thli tein a kal. Francis nih a thil dawh hna le a sau ngaimi a sam kha a tanpiak dih hnu ah Bastia khua i a ummi Benedictine Sister Sianginn ah a chiah. A Chungkhar le a rualchan hna nih inn leiah rak kirṭhan dingin an chimh tikah Clare cu Biakṭheng kha aa tlaih pah in ‘Keimah cu Jesuh Khrih lengin aho va hmanh ka ngei lo’ tiah a ti hna. Caan tlawmpal ah a dang nungak pawl hna he a thianghlimmi Sister buthar pakhat kha St. Dominic Sianginn pawngah an dirh.

Poor Clare tiin an theihhngalh mi annih cu sifah innak le a harmi sual ngaihchihnak kha an cawn. Annih cu phahnat danh loin tlonlennak, nifa tein semrelnak hna kha an tuah i aho he hmanh in an i chawn lo. Tuah awk a simi le vanṭhatnak a simi ca lawngah bia an chim. 1228 kum ah Pope Gregory IX nih Clare kha a harmi sifah innak biakamnak in luatnak nawl a pek tikah amah nih ‘Keimah cu ka sualnak in luat awk herh ko hmanh ninglaw Jesuh Khrih hnu zulhnak in luat awk cu ka herh lo’ tiah a rak leh. Cucaah Pope nih anmah kha Privitegium Pauperitatis a pek hna. Cucaah aho hmanh nih an ngeihmi chawva kha cohlan dingah an forh kho hna lo. 1224 kum ah Frederick II i ralkap hna cu Assisi khua hrawh awkah le thilri chuh dingah an rak ra. Clare nih a thiangmi Sacrament kha aa tlaih i anmah ton dingah a va kal. Chikkhatte ah khuaruahhar awk le ṭihnung a simi thil pakhat nih ral hna kha a tlaihkhih hna. Cucaah ral hna cu khua chungah aho hmanh harnak le sifahnak pe loin an zaam dih hna. 1253 kum, a thih laite ah Clare nih ‘keimah kha na rak ka ser caah, Maw… Pathian, na min cu thangṭhat si ko seh’ tiah a chimtaak.