Ngakchia bantuk Zumhnak

Nihin August thla 11, cawn nihnih ni i thlarau tirawl hrawm awkah khan sawm kan duh mi hna cu ‘ngakchia bantuk zumhnak-childlike confidence’ timi bia thawn aa pehpar in khan thlarau thazaang pek kan duh hna. 

Dawtmi u le nau hna, nihin kan Cathiang thawn ai pehtlai inkhan hrawmh kan duhmi hna cu ‘ngakchia bantuk zumhnak’ timi kha a si lai. Mirang holh incun ‘childlike confidence’ ti a si. ‘Childlike’ timi le ‘childish’ timi hi mirang holh ahcun ai bang bantuk ko nain khan ai dang tuk hringhran. ‘Childish’ ti a si ahcun (ကလေးဆန်ဆန်) ṭah a be tibantuk, ngakchia bantukin ṭah a hmang tibantuk, cucun ngakchia bantukin khan chimh a har, ngakchia bantukin ṭhatlonak leiah khan ngakchia he ai lomi cu ‘childish’ tiah an ti. Cucun ‘childlike’ ti a si ahcun a ṭha lei mi, nawl a ngaimi, chimh a ngaimi, cucun nu le pa bia ṭha tein a ngaimi, nu le pa ai bochan mi bantuk kha ‘childlike’ ti a si. Cucaah Pathian kan i bochannak ahhin hi ngakchia bantuk si awkah Cathiang nih a kan sawm. 

Hmasabik ah Profet Ezekial 2:8-3:3-4 chungah kan rel tikah Profet Ezekial cu Bawipa Pathian nih ‘cazual kha i laak law ei tuah’ tiah a ti. Bawipa Pathian nih hi cazual timi cu rawl zong si fawn lo, sihmanhsehlaw Bawipa Pathian nih a fial caah nawl ngainak in khan le tangdornak in khan ngakchia bantukin, ngakchia nih nu le pa an bochan bantuk tein khan Profet Ezekial nih Bawipa Pathian bia kha ngai in nawl ngainak in khan Bawipa Pathian nih a pekmi casual cu a rak ei. Cazual cu a vun ei tikah khan zeidang zeidang a chuak maw ti si ahcun a chuak lo, khuaihliti bantukin khan a thlum e ti si. Hi cazual cu paw khimnak zong a si fawn lo, rawl zong a si fawn lo, Bawipa Pathian nih ei tuah tiah a tinak khan a vun ei tikah khan khuaihliti bantukin a thlum e ti kha kan hmuh. Profet Ezekial nih Bawipa Pathian bia a ngainak le Bawipa Pathian kut tangah toidornak tein khan a um kha kan theih. 

Hi bia he aa pehtlai in khan; ‘Voikhat cu tilawng in khan khual an tlawn lioah thilchia a hrang ciammam i an tilawng leh hnik aa zal. Kha tikah khan, kha lioah khan, tilawng chung ummi pawl cu an ṭap, an ai an hram. Kha lioah ngakchiapa te cu ai nuam tuk hringhran, ai chawk ai let, a zeihmanh a poi lo, kha tikah midang nihkhan ngakchiapa te kha an hal; ‘ziah, hawi hitluk kan thinphan le kan khuaruahhar ahhin nang na zeihmanh a poi lo e, zeicahdah mah ti hin na um e’ tiah an ti tikah khan, ngakhchiapa te nih zei a ti; ‘tilawng a mawngtu hi ka pa a si, ka pa nih hi tilawng a mawngh ahcun kan zeihmanh a ti lai lo, zeihmanh harnak kan tong lai lo, ṭha tein a mawngh ko lai, tilawng zong ai let lai lo’ tiah ngakchiape te nihkhan a ti’ ti si. Ngakchiapate cu a pa nih tilawng a mawngh mi a si caah a hna a ngamtuk i, tilawng leh hnik aa zalh caan hmanh ahkhan a zeihmanh a poi lo ti si. 

Cucaah nihin ah thawngṭhabia chungah khan Lamkaltu hna nih ‘Bawipa, Vancung Pennak chungah hin ahodah a nganbik’ tiah an ti tikah khan Bawi Jesuh nih ngakchiapa te kha an hmai ah a kawh i, ‘Hi ngakchia bantuk hin nan lungthin a um lo a si ahcun, nan lung nan i thlen lo a si ahcun Vancung Pennak nan hmu kho lai lo’ tiah a ti hna. Kha tikah khan zeicahdah kan Bawipa Jesuh Khrih nih ngakchia ngelcel kha a hmuhsak ti a si ahcun, hi tuanbia kan theihmi bantukin khan ngakchia nihcun a pa maw, a nu maw, a tuahmi a chimh i zakhat ah zakhat a zumh hna i, zeitlukin harnak ton hmanh ahkhan a zeihmanh a poi lo, kha bantukin khan ngakchia bantukin khan Pathian cungah zumhnak fel tein khan kan ngeih i, zeitluk harnak ton zongah, zeitluk i ngaihchiatnak ton zongah khan thinphang lo, khuaruahhar lo, ngaihchia lo tein khan kan Pa kan Pathian kha kan zumh zungzal ahcun kannih nih himnak kha kan hmu lai timi kha kannih nih kan ruah ding kha a si. 

Cucaah hi Cathiang he pehtlai inkhan hi ngakchia bantuk tein khan tangdornak kha kan ngeih a hau i, cucun tangdornak zong ai tel, cucun nawlngainak zong kha aa tel, zumhnak zong kha aa tel, hi pathum komh hi ngakchia nih an nu le pa sinah an ngeihmi thinlung kha a si caah hi ngakchia hna bantukin khan kannih zong nihhin Bawipa Pathian cung ahkhan kan zumh zungzal a si ahcun kan him zungzal lai timi kha kan hmuh khawh mi a si. 

Cun nihin ah Mithiang Clare puai zong kha kan tuah fawn. Mithiang Clare cu a nu le a pa a rum ngaimi an si ko. Cun amah cu an ngeihmi fanu pakhatte lawng a si. Anih hi Assisi khua mi a si ve i cucun amah hlan ah Francis Assisi zong kha nu le pa rum ngaimi le a chawva a ngeihmi vialte kha kaltaak inkhan Bawipa Pathian rian ah a lut bantukin khan kei zong Francis Assisi bantukin khan Bawipa rian ah kai pe ve lai tiin khan nu le pa zong kaltaak, chaw le va zong kaltaak in khan Bawipa Pathian rianṭuan kha aa timh tikah nihin ah hi Mithiang Clare zong hi Jesuh Khrih nih a chimmi ngakchia bantuk zumhnak le ngakchia bantuk i nawlngainak le cun vawlei cungah Pathian, zeizong vialte a tuah kho tu kan Pathian lawnglawng hi tangdornak in khan kan zumh le cucun bochannak in khan kan zumh zungzal a si ahcun kannih nih himnak kan hmu zungzal lai i zungzal nunnak kha kan ta a si lai timi kha nihin ah Mithiang Clare kong nihkhan zohchunh awk in a kan hmuhsak piak. 

Cucaah kannih vialte nih hi kan Cathiang bantukin ‘childlike confidence’ ngakchia bantukin zumhnak ngeimi le nu le pa cungah tangdornak, cucun zumhnak ngeimi, cucun nawlngaimi fanu fapa ṭha kan si cio bantukin khan Bawipa Pathian hmai zongah zumh awktlak mi, cucun Bawipac aah rian ah ai pemi, nunnak ai pemi kan si cio khawhnak hnga. Cucaah kannih vialte nih hi kan Cathiang ningin khan Profet Ezekial nih Bawipa Pathian nawl ngai in khan cazual kha a ei bantukin khan khatikhan Bawipa Pathian rian kha a tlinh bantukin khan Lamkaltu hna zong nih khan ngakchia bantuk thinlung le zumhnak in khan Bawipa Pathian rian ah khan an nunnak kha an pek, zungzal nunnak kha an ngahnak a si timi kha thlarau thazaang ah i laak hna usih. A ngaitu nan dihlak cungah Bawipa Pathian nih thluachuah in pe ko hna seh! Amen

Thazang petu /- Fr. Abraham Hrang Hit