Catholic a simi Siangpahrang fapa nih Liechtenstein ram ah nau hrawhnak phung kham dingin biakamnak a tuah
Europe ram laifang ah a ummi Liechtenstein ram ah, nau hrawhnak kong he pehtlai in ram pumpi huap in ceihmainak ah ceihmai ṭhan dingin bia an chuah pi.
February thla ah cozah sinah pekmi ruahnak cheuhnak an rak pek mi ah, an ram pawng ummi Switzerland ram upadi bantukin “caan khiah in a phichuah”(time-limit solution) timi zulh dingin an timh. Cu nih cun nu pawl kha nau pawi thla thum a si chungah nau hrawk khawhnak nawl a onh hna. Ram pumpi mipi thimnak tuah khawhnak ding caah, cu phunglam a dirkamhtu hna nih thimfung thlak khawhnak nawl tling tein a ngeimi hna sin in a tlawmbik min thutnak 1,000 an lak a hau.
Hi timhtuahnak nih hin Europe ram ah nau hrawhnak phunglam a kham mi ram hna ah thlennak nganpi a chuahpi khawh mi zong a si. Atu lio upadi ningin cun, nau hrawhnak cu onh a si rih lo i, nu le hna an nunnak asiloah ngandamnak he pehtlai in ṭihnung thil a chuah tikah siseh, asiloah tlaihhremnak in pawimi nau a si tikah lawngah tuah khawh a rak si. Liechtenstein ram chungah cun nau hrawhnak cu onh a si lo nain, an ram leng ah phungning tein nau hrawhnak a tuah tu nu pawl tucu taza cuai an si tawn lo.
Thimfung thlak hlan ah, Prince Alois nih cun thimfung thlatu hna nih an cohlan hmanh ah ahcun upadi hrawk cu ka dir pi lai lo tiah a ti. Liechtensteiner Vaterland thawngzamhnak he biaruahnak an ngeih lio ah, siangpahrang aiawh chimnak nawl ngeitu nih cun hrin rih lomi minung nunnak kilvennak cu phunglam hman a si i nau ngeih nak cu caan khiah piak in hrawh ding a si lo tiah a ti. An chuahpimi upadi nih hrin rih lomi ngakchia hna caah huhphenhnak tling a pek hna lo caah ka cohlaang kho hna lo tiah a ti.
Siangpahrang fapa dirhmun cu 2011 nau hrawhnak kong mipi ruahnak cheuhnak he aa lo. Cu lio ahcun thimfung thlatu hna nih aa khatmi ruahnak cheuhnak kha 52.3% in 47.7% tiang alnak an rak langhter. Siangpahrang fapa Alois nih mipi nih nau hrawh phung an cohlan ahcun ka kham lai tiah a chim hnu ah, campaign tuahtu mipi hna nih a phunghrampi nawlngeihnak le thil ti khawhnak kha zorter an timh. Sihmanhsehlaw, 2012 thimnak ah, Liechtensteiners 76% nak tam nih siangpahrang fapa veto-nawl kha tlaih peng dingin hnatlak pi nak an rak ngeih. Cu nih cun siangpahrang uknak phunghrampi ah siangpahrang hna thil ti khawhnak nawl kha a hlei in a fehter ṭhan.
A thar in tuahmi phunglam nih nau hrawhnak lawng si loin caan saupi tiang a rak um cangmi ram pumpi bia-alnak kha a chuahter ṭhan. Europe ram i siangpahrang uknak, deomocracy phunglam le Catholic ram pakhat a simi ah hrin rih lomi hna nunnak kelvenak timi hna karlak i tlukruannak kong kha a hun tawnghtham khawh ngaingai.
Source: Shalom World News