Lai Nunphung Cheukhat

Roco Phungphai

Chin miphun hi ro vuih kan hmang. Asinain ro vuihnak in a pekmi pa cu Chin phunglam ningin ro co kho tu ding a si lo ahcun mi nih cun ro cu an co kho hlei lai lo. Asinain a thimi pa cu Khrihfa a si ahcun a duh poah in ro a vui kho i, kha rovuica (will) in ro pekmi pa kha a ho hmanh nih an cuh, an kalh kho ti lai lo. Rovuica (will) cu Khrihfa lawng nih ttial khawh a si.

Chin miphun cu ro conak kongkau ah phung le lam kan i dannak a um caah ‘Chin miphun ro co ning upadi (Chin Special Act) cu 1948 October 22 ni ah Lairam uktu upa hna nih biachahnak No. 49 in an fehter. Cu pohmah 5 (A) ah, ‘Ro conak kongkau ahcun Chin Special Act i column chung ningin a si lai’ tiah a um. ‘Asinain hi upadi cu Chin miphun nih a ngeihmi thil cung lawngah hman sisehlaw, Chinram chungah a um ko nain Chin miphun a si lomi miphun dang thil he pehtlaihnak ngei hlah seh’ ti a si. Ro timi cu a thimi pa nih a roh taak mi thil a si.

Upadi nih cun ro cu phunhnih ah a tthen hna i cu hna cu;

1)Ro thil sawhsawh le

2)Pupa rothil hna an si. Pupa rothil chungah a tanglei hna hi an i tel.

A.Innpi le innpi he aa pehtlaimi thil, cun innpi haukulh chung i an sakmi, a thimi pa nih a ngeihmi innchungkhar inn, (nupi tampi a ngeih i cu a nupi hna cu inn dang cio ah a umter hna a si ahcun, cu hna vialte zong cu aa tel chih).

B.A thimi pa nih a pa sinin siseh, a phunkhat rualchan sinin siseh, a comi thil (cu thil cu aa tthialkam kho lomi thil a si lai).

C.Meithal, meithal he aa pehtlaimi thil, upa thilthuam le hlawn thil. A cunglei pupa rothil hna chung i aa tel lomi, aa tthialkam kho lomi thil paohpaoh cu ‘rothil sawhsawh’ an si.