Pathian duh ning le minung duh ning cu aa thlei dang tuk hringhran ko

Nihin ni caah ruah ṭi kan duhmi hna cu kan Bawipa Jesuh Khrih nih vawlei pennak le Van Pennak, vawlei thil sining le Van thil sining ai dannak kong a zultu hna a cawnpiak hna nak kong kha a si lai. A zultu hna nih khan Jesuh Khrih a Pennak le a sining kha fiang tein an rak theih ve lo caah vawlei thil sining bantukin an rak i ruah sual i Jebedee fapa hna pahnih James le Johan hna nih khan Jesuh Khrih kha a sunglawi tuk mi na Pennak, na bawi ṭhutdan cungah na ṭhut tikah na orhlei ah pakhat, na kehlei ah pakhat kan ṭhuter tiah an nawl. Jesuh Khrih nih “Nan ka hal mi hi nan i fiang lo. Ka din ding hrai hi nan ding kho ve lai maw? Tipil in dingmi hi nan ing kho ve lai maw? A din zong nan din khawh ve ko men lai. Tipil nak zong nan in khawh ko men lai. Sihmanhsehlaw, ka orhlei kam ṭhut le ka kehlei kam ṭhut cu keimah nawl a si lo. Ka Pa nawl a si” tiah a ti hna. 

Jesuh Khrih nih a orhlei kam ṭhut le a kehlei kam ṭhut kha a pek khawh ko hna nain vancung Pennak cu hitihin sok mi le chimnak le hal sawhsawh men in co mi a si lo. Pathian nawl a zulmi le a tuah mi le a ngai mi nih co mi a si timi kha a langhter duh mi a si timi kha kan cathiang chungah kan hmuh mi cu a si. A dang zultu pahra hna nih an theih tikah an thin a hung dih ti zong kha kan hmuh. 

Vawlei sining bantukin Vancung ṭhutdan hi i cuh mi le i cheumi le, anih nih a tin cang ah cun ka ting sual ve lai loh tiin ruah mi hmun le hma kha a rak si lo ti kha fiang tein kan hmuh cu a si. A dang zultu pahra hna zong an thin a hung i James le Johan hna cungah an lung a fak ti kha kan hmuh. Sihmanhsehlaw, vancung Pennak cu ṭhutdanh a dih timi a um lo. Minung mah cu zat caah timi zong a um lo. A khat cang, an i tlum ti lo timi zong a um lo. Vawlei cung minung vialte, a thicia mi he a chuak lai dingmi he a tu i a nung lio mi he kan zapi caah Pathian nih an kan tinhpiak, an kan serpiakmi a si ti kha kan hmuh. 

Vancung Pennak cu hi vawlei bantukin bawi va ton, tender va sok, rian pakhat khat va sok, phaisa in va kat, tam deuh a pe kho mi nih rian hmuh, a pe kho lomi nih hmuh lo tibantuk kha a si lo. Vancung Pennak cu kanmah le kan covo, kan sining cio tein Pathian nih an kan chiahpiakmi a si. 

Mithiang Augustine nih a chimmi cu “Pathian nih kan minung hi zeibantuk a si kha a zoh lo. Asinain, kan sining cungah zei tluk in dah ai zuam timi kha a zoh” tiah a ti. Vawlei cungah mirum kan um, sifak kan um, mifim kan um, mihrut kan um. Kan i lo cio hna lo. Kan i lawh lo ning cio tein, kanmah le kan sining cio tein Pathian kha kan i bochan. Pathian lei zuamnak kan ngeihmi, kar kan hlannak chung in Pathian nih a zoh timi kha kan hmuh. “Mi ngan si a duhmi cu sinum a si awk a si, Bawi cem si a duhmi cu nan dihlak sal a si awk a si” tiah Jesuh Khrih nih a zultu hna kha a rak ti hna. A ṭha tuk hringhran. Tangdor nun ngeih kha kan Bawipa Jesuh Khrih nih a kan cawnpiak. Zum tu hna kan caah a biapi tuk hringhran mi kha a si. 

Minung taksa sining in cun kan rum deuh le, asiloah fim cawnnak ah a sang deuh kan si ah maw, saṭil arva kan ngeih deuh ah maw, sui ngun chawva kan ngeih deuh ah maw, i uarthlannak, midang nak in kan ngan deuh, ka thiam deuh, ka fim deuh, ka sang deuh timi thinlung hi kan ngei tawn. Cucu Pathian nih a duh lo i midang he zong rem lonak a chuahpi tu kha a si. Cucu vancung Pennak ah dawnkhan tu taktak a si ti kha kan hmuh mi cu a si. 

Mithiang Paul nih “Kei cu hi vawlei ah phorhlawt ding ka ngei lo. Khrih vailam lawnglawng ah hin kai phorhlaw ko lai. Zeicah tiah Khrih vailam thawngin vawlei cu ka caah a thimi a si” tiah a ti bantukin Khrih cu vailam tahnak cungah khan an kan dawtnak le tangdor nun a ngeihnak kha thih tiang tuar in a kan hmuh sak mi kha kan hmuh. Cubantuk tangdor nun le dawtnak nun cu ngei cio hna seh ti kha Khrih nih a kan cawnpiak mi cu a si. 

Keimah timi hi a ṭha lo tukmi minung kan nunnak a si. Cucu khawzei in dah a rat kan ti a si ahcun vancung mi a rak si ve mi Lucifer kha Pathian tluk si a duh ruang le keimah ka fim ve, ka ngan ve. Lu bik si awk kai tlak tiin a rak ruah ruangah vawlei ah thlak a si i, vawlei ah ai rat pi mi ai ṭum pi mi cu Keimah ti nak kha asi. Keimah timi nih hin buainak a chuah pi. Khrihfa bu chung cawlcanghnak ah siseh, lenglei commiṭee maw phu pakhatkhat rianṭuannak ah siseh, sang le veng innpa ah siseh, keimah timi thinlung a ngeimi cu midang he an i rem lo i an thinlung chungah nuamhnak lawmhnak zong a um kho lo. Buainak a chuahpi tu ah a cang mi tu kha a si. Cucu Lucifer nih vawlei ah ai ṭum pi mi cu a si i, tangdor nun kan timi cu Van Siangpahrang kha vawlei ah tangdor nun ngei tein, dawtnak thinlung he harsatnak tampi he vawlei ah tangdor nun tein a rak ṭum i cucu thih tiangin vailam ah tangdor nunnak kha a langhter. Cucu kan Bawipa Jesuh Khrih nih tangdor nun a si i, cuticun a hnu zul Khrihfa hna zong kha tangdor nunnak ngeih in Pathian bia ning tein zungzal nunnak co ve hna seh timi kha a kan duhpiak mi kha a si. 

Dawtmi u le nau hna, Pathian Pennak kan timi hi vawlei lei sining he kan zoh a si ahcun a leṭalam in a si timi kha fiang tein kan hmuh. Vawlei nih cun huham a ngei mi le mihmuh sining in a si kho deuh mi le a ṭha deuh mi kha hmunhma a pek na tein kan Bawipa Jesuh Khrih nih cun vawlei taksa hmuh ningin a niam mi, tangdor nun a ngeimi, santlai lo kan timi kha Pathian nih a cawi i cucu a sunglawi mi ah a chiah timi kha kan hmuh mi cu a si. 

Cucaah kan Bawipa Jesuh Khrih nih an kan cawnpiak bantuk tein tangdor nun ngei ko hna u sih. “Mi ngan si a duh mi cu a niam bik a si awk a si. Bawi si a duh mi cu mi vialte sal a si awk a si” tiah a kan timi hi kannih nih i nun pi ko hna u sih.