Thiang Thlarau lam hmuhsak nak le hruainak in a nung ding mi kan si

Jesuh Khrih thihnak in a thawh ṭhan hnu ni 50 nak ni ah Thiang Thlarau Pathian Jesuh hnu Zultu hna cungah a tlunnak puai kha nihin ni ah Bupi nih hlunghlai ngai in a kan tuah piak. Zultu hna zong Thiang Thlarau Pathian an sin ah pek an si hnu ah vawlei cung khuazakip ah kal in Jesuh Khrih thawngṭhabia kha dawtnak le siannak lungthin he sermi vialte hna sinah chimphuan hram an thawk nak ni zong a si. 

Thiang Thlarau laksawng hna cu zei dah an si hnga? Pathian dawatnak le khamhnak thawngṭhabia kha dawtnak lungthin le siannak lungthin he chimphuan thiamnak kha a si ko. Dawtnak in chim relnak le tuah sernak ah bawhte le ngakchia hmanh nih an theihthiam i an hngalh khawh. Holh phunkip in holh thiamnak timi ah hin Pathian dawtnak langhter kha a si ko. Tuah sernak ah dawtnak aa tel lo a si ahcun zeihmanh santlaihnak a um lo. Dawtnak le zawn ruahpiak thiamnak in chim rel le tuah ser a si tikah ahopaoh nih duh le cohlaan a si. Cucu Zultu hna nih an mission rian an thawk nak ah an rak tuah mi cu a si. 

Dawtnak lungthin he mi pakhat khat chim hrin tikah, zei bantuk miphun an si zongah chim hrin a simi pa nih lunglawm tein a cohlan thiam ko. Zeicah tiah cun an kan dawt caah a si timi an theih thiam caah a si. “Thlarau kan chung i a um kha phun khatkhat in a lang cio i cucu kan dihlak ca i ṭhatnak ding caah khan a si”(1Cor 12:7) tiah Paul nih a ti. 

Thiang Thlarau laksawng hna he pehtlai in “Dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, toidornak le mah le mah i tei khawhnak” te hna hi an si tiah (Gal 5:22-23) ah a ti.

Jesuh nih “Ka Pa sinin a rami Bawmtu, biatak Phuangtu Thlarau cu a ra lai. Ka Pa sinin nan sinah ka rak thlah lai i keimah kong kha an chimh hna lai. Cun nannih zong nih a hramthawk tein ka sin I a ummi nan si caah keimah kong kha nan chim ve lai” (Jn 15:26-27)tiah a ti. Thiang Thlarau a ngei mi nih cun mah ṭhatnak le thiamnak kong kha chim loin Jesuh Khrih kong kha an chim, tehte an khaan i, an nunnak zong dawtnak, Jesuh nih a uk mi hna an si. Cun Paul nih Galati mi hna sinah “Thlarau nih nunnak a kan pek cang caah kan nunnak zong hi amah(Jesuh) nih a uk awk a si” a ti (Gal 5:25).

Dawtmi u le nau hna, vawlei cungah thlah a simi kannih Khrihfa hna nih Jesuh Khrih kong kha tehte khaan in kan chimpuan ding a si. Cucu kan rian zong a si. Thiang Thlarau a ṭum hnu ah zultu hna nih vawlei khuazakip kal in Jesuh Khrih thawngṭhabia an phuan bangin, kannih hna zong kan umnak, kan chungkhar, kan sang, kan khua kan pengtlang ah Jesuh Khrih a zultu hna bangin nung hna u sih. Dawtnak a simi Jesuh Khrih thawng lawnglawng in vawlei cu kan tei khawh lai. A dang zeihmanh a um lo. Cun kan caah Bawmtu Biatak Thiang Thlarau thawng lawnglawng in thildik, thilhman kan hmuh thiam, kan chim thiam lai i Jesuh a dawtnak kha kan langhter khawh lai.