NANMAH CAAH A POINAK A UM MAW?
Nihin ni caah Bupi nih thlarau thazaang laknak ding caah a kan thim piakmi Bible (Lam. 28:16-30; Jn. 21:20-25) hna hi an si. “Peter nih a hun i mer i Jesuh dawtmi zultu nih a zulh hna kha a hmuh – cu pa cu rawl an ei lio i Jesuh hngauh in a um i, “Bawipa, ahodah nangmah rawitu cu a si lai,” tiah a haltu kha a si. Cu pa cu Peter nih khan a hmuh tikah, “Hi pa hi tah zeitindah a si lai?” tiah Jesuh kha a hal. Jesuh nih cun, “Ka rat ṭhan tiang a nun kha ka duh a si ah, cucu nangmah zeidah a poinak a um? A zulh tu kha ka zul ko,” tiah a leh. Cu bia cu Jesuh zultu pawl sinah khan a thang i kha zultu kha a thi lai lo a si duhnak a si, tiin a sullam an i lak. Sihmanhsehlaw Jesuh nih khan, a thi lai lo, tiah a chim lo: a chimmi cu, “Ka rat tiang a nun ka duh a si ah, cucu nangmah caah zeidah a poinak a um,” tit u hi a si. Hi pa cu zultu a si i hi thil hna a chimtu le a ṭialtu zong a si; a chimmi cu ahmaan ti kha kan hngalh. Jesuh nih a tuahmi a dang tampi a um ko rih. An dihlak in pakhat hnu pakhat in ṭial si hna seh law, an ṭialnak cauk cu vawlei nih hin a tlum hna hnga lo, tiah ka ruah.”
Nanmah caah a poinak a um maw? timi in thazaang thazaang laa hna usih. Peter nih Johan hi hmailei ah zeidah a lawh lai timi kha khuaruahhar ngaiin a zoh. Cucaah Johan hi zeitindah a si lai? tiah Jesuh kha a hal. Jesuh nih ka rat ṭhan tiang a nung lai” tiah a ti. Jesuh nih Peter cu a thawh i, “midang kong na lungre thei hlah, a zulh tu ka zul ko” tiah a ti. Hiti a chimduhnak cu mi kong kan chim lai lo, mi zei kan rel lai lo a ti duhnak kha a si lo. Nihin zumtu hna nih biapi in ruahter a kan duhmi cu (1Tim. 2: 4) chungah mi vialte nih khamhnak an hmuh nakhnga le biatak a hngalmi an si nakhnga hi biapi deuh in ruahter a kan duh.
Pathian nih thluachuah a pekmi hna kha hnahchuahnak kan ngei lai lo, ziar ngeihnak kan ngei lai lo. Minung nih hmailei ah kan ton hngami kan hmuh hngami thluachuah vialte cu Pathian kut chung lawnglawng ah a ummi a si. Cucaah Peter cu “Ka zul ko” tiah a ti. Mithiang Paul nih, “nan unau a tluktertu si hlah u” tiah (Rom. 14:13-14, Gal. 6:10), caan ṭha nan ngeih fate mi cungah ṭhatnak a tuah khotu si i zuam u a ti. Bawipa a dawtnak, Bawipa a veel thluachuahnak cu na hawikom caah a poinak a um maw? Nanmah caah ta a poinak a um maw? Cucaah Jesuh khawh tu kha i zuam hna usih.