BAWIPA NIH KAN CAH THLA A CAM VE

(Johan. 17:20-26), “Anmah ca lawngah hin thla ka cam lo, an chimmi bia thawngin a ka zum laimi hna ca zongah ka cam. An dihlak in pakhat an si nakhnga thla ka cam. Ka Pa, keimah cu nangmah chungah ka um i nangmah cu keimah chungah na um bantuk hin annih zong kan chungah um ve hna seh. Nangmah le keimah cu pakhat kan si bantuk hin pakhat an si khawh ve nakhnga, sunparnak na ka pekmi kha ka pek hna. Kei an chungah um in nang ka chungah um law, annih cu pakhat taktak an si lai; cun pakhat an sinak thawng cun vawlei nih cun keimah cu nangmah thlahmi ka si le nangmah nih annih cu keimah na ka dawt bantukin na dawt hna kha a hngalh lai. “Ka pa, na ka pekmi hna hi ka umnak ah ka sin i umter i ka sunparnak, vawlei ser hlan in na ka dawt ca i na ka pekmi kha hmu hna seh ti ka duh. A dingmi ka Pa, vawlei nih cun an hngal lo, sihmanhsehlaw kei nih cun ka hngalh i hi hna nih hin na ka thlah hi an hngalh. Na ka dawtnak cu an chungah a um i kei zong an chungah ka um nakhnga, nangmah kong cu annih kha ka hngalhter hna i ka hngalhter ṭhan lengmang ko hna lai,” tiah a ti.

Nihin ah hin hi thawngṭhabia ka relmi hi kan zoh tikah a biapi ngaimi kan cah a sunglawi ngaimi bible cacaang a si. Zeicah tiah cun kan Bawipa Jesuh Khrih nih kanmah ca zongah thla a kan campiak ti hi “anmah ca lawngah hin thla ka cam lo, an chimmi bia thawngin a ka zum laimi hna ca zongah ka cam” a ti. A zultu hna ca lawngah kan Bawipa Jeush Khrih nih hin thla a cam lo i anmah chimmi bia a zummi, thawngṭhabia a zummi, kan Bawipa Jesuh Khrih a zummi nangmah le keimah ca siseh, a zum laimi vialte ca zongah kan Bawipa Jesuh Khrih nih thla a camnak cacaang a si caah hin a sunglawi ngaimi pakhat a si. A Pa sinah a thlacamnak in kannih vialte kha a kan pekchanhnak hi kan hmuh khawhmi a si caah a biapi ngaimi lawmh lo awk a ṭha lomi bible cacaang a si. Cucaah thlacamnak chungah hin kanmah vialte ca zongah hmunhma a um ve i cu a thlacamnak chungah a zum laimi vialte caah siseh, mi vialte caah tiah a telh chihmi hi kan hmuh khawhmi a si. Chankhat hnu chankhat in a ra dingmi a Bupi zong kha a vun telh chih i a Bupi ca zongah thla a cam chih i hi thlacamnak hi khoika hmun ah kan um paoh ah siseh, khoika caan paoh ah siseh, zeitik caan paoh ah siseh a si khawhmi a si ti hi kannih nih kan i lak khawh dingmi a si. Cun kan dihlak ca zongah, amah a zum laimi vialte, a zummi vialte amah nih a thlahmi hna thawngṭhabia an chimnak thawngin a zummi vialte zong pumkhat ah cang dingah hmunkhat te um dingah amah kut tangah amah nih a thlahmi hna tangte ah hmunkhatte um dingin thla a cam chihmi hi kan hmuh khawhmi a si i fiang tein a langmi a si.

Nihin hmunkip kaakip ah a ummi kan si ko nain minung kan si caah thazaang a der khomi kan si i zumhtlak lo khomi kan si i  a hnu a zultu kan si tikah hin thazaang a der khomi kan si nain amah thlacamnak ah a kan dawtnak ah a kan dawtnak a langhternak ah hin ni hmanungbik ah a kan dawtnak thiltlangpi a si timi hi a kan hmuhsaknak thawngin, a langhternak thawngin amah Pathian, amah sunparnak le a Pa i sunpar lianngannak kha mi vialte nih kan hmuh lai i amah le a Pa zong pumkhat an cannak kha kan hmuh hnga dingmi a si. Cun nihin pumkhatte ah  kan i canmi i nihin zumtu Khrihfa hna pumkhatte ah, hmunkhatte ah amah nih a thlahmi hna tangte ah amah kut tangte ah a lam hruainak tangte ah hmunkhat tein nihin tiangah fek tein a dir khawhmi hi zeiruangdah a si ti a si ahcun ramkip in hmunkip in a ummi kan si ko nain a thlacampiaknak hrimhrim ah hin aa tel cangmi a si caah nihin kannih kan nu Bupi zong fek tein hmunkhat tein vawlei cung kaakip ah kan i thek ko nain hmunkhat tein kan tuahsernak, kan zumhnak hi pumkhatte ah kan cang khomi hi a si. Cucu kan Bawipa Jesuh Khrih nih thla a campiaknak thawngin, thla a kan campiaknak thawngin a si ti hi kan nu Bupi zong nih a zumh i a cohlanmi, a pommi a si. Cun amah le a Pa pumkhat in an cang i Pa i sunparnak vialte Fapa ca a si bantukin Fapa i sunparnak vialte a Pa a si i kannih zong kan sunpar lianngannak vialte zong kha annih chungah hin a kan telh chih i cu a kan dawtnak chungah pumkhatte ah a kan auh i cu a kan auhnak cu pumkhatte ah cang dingah hin amah pumpak hrimhrim nih hin thla a kan campiakmi a si. Hi pumkhatte kan cannak thawngin hi vawlei cung in Pathian kha hmuh khawh i Pathian a lianngan sunparnak kha kan theihhngalh khawhnak ding caah hin kan nu Bupi zong nih hin nifatin tein rian a ṭuan lengmang i a kan thlah i hi kan nu Bupi tangah kan um timi hi nihin ah kan hmuh khawhmi a si. Cucaah kannih pumpak pakhat cio zongah siseh cu vialte cu nifatin ah i theih peng in thazaang i lak peng i mah thlacamnak chungah kannih vialte caah hmunhma pakhat a um ve i kan ca zongah nifatin tein zungzal in thla a kan campiaktu kan Bawipa Jesuh Khrih kan i ngeih ko ti hi kan nunnak ah i lak in amah dun ningin amah lamhruainak tangah, kan nu Bupi nih lam a kan hmuhsakmi tangah pumkhat tein i fonh cikcek in zumhnak fek he hmaiah a kalmi a nungmi zumtu Khrihfa kan si khawh nakhnga nihin ah thazaang lak ṭi kan duh hna.