St. Bernardine of Siena, Priest
Jesuh Khrih i a thiangmi a min in zultu a simi Siena khua i Bernardine cu 1380 kum ah Italy ram, Massa Marittima khua ah a chuak. A ngakchiat lio tein a nu le a pa nih an thihtak caah a nu lei i a ni a simi nih fimnak a cawnter. Amah nu nihcun Pathian ṭihzah upat ding kha a cawnpiak. Kum (17) a ti ah ‘Kan Bawinu i unau hna bu’ timi ah a lut. Mah bu chungtel hna cu mi dam lo hna damnak caah tiah an pum kha an i pechan hna. A hnu kum (7) a rauh ah Sirina khua pawng i a ummi, a har ngaimi zulhphung upadi a zulmi St. Francis Zateik bu ah a rak lut. Mah Biakinn ahcun Siangbawi cannak a hmu. Lungthin in biaknak le ca lei cawnnak kha kum (12) chung a tuah. Nikhat cu Brother a cang hngami pakhat nih ‘Ka u Bernardine, na ngeihmi thluachuah kha thup peng ti hlah’ tiah ruahlopi in a rak au. Upa hna nih cu thil cu Vancung in a rami a si lai tiah an ruah i Italy ramkip ah a phungchim ṭhatnak, a lung thawhnak hna ruangah zumtu minung tampi kha a laak khawh hna. ‘Jesuh Khrih min cu biatak a chimmi hna caah sunparnak a si’ tiah a ti i, phung a chim dih fate a donghnak ah ‘Jesuh i a thiangmi a min-Jesuh a minthiang’ tiin a ṭialmi thingphel in aa pummi asiloah phungbia a rak ngaimi hna kha thluachuah a pek tawn hna. Mah thingphel cung ahcun ‘IHS’ tiin cafang an khenhchih. A sullam cu ‘Jesus; Humanum Salvator-Jesuh; Minung hna a khamhtu’ ti a si. Bologna ah cuti in hmual ngei tein phung a chimnak thawngin mi tampi hna cu phaisa thap in lente celhnak hna kha meiphu chungah paih i khangh dih awkah an rak put cio. Phe cahnah a tuahtu pa cu ‘ka pawcawmnak ka sung cang ai’ tiah a hrum len ko. Mithiang Bernardine kha Jesuh Khrih min thiang khenhmi thingphel kha tuah i zuar awkah an forh. Cuticun a tuah i a cawtu an tamtuk caah a rauh hlan ah a rak rum colh. Amah kha Bishop ṭuan dingin voitampi an forh. Asinain amah cu Bupi rianṭuannak kha pehzulh in a ṭuan duh caah mah forhfialnak cu a rak cohlang lo. 1430 kum ahcun a har ngaimi St. Francis Zateik bu i Bishop changtu (Vicar General) a rak si. Amah cu an bu chung um Siangbawi hna kha theihhngalhnak ngeihlonak, fimlonak i ral a ngeihnak kha ralrin pek in a chimhhrin hna i Bible lei thiamnak le Bupi cawnpiaknak cauk (Canan upadi) kha cawn dingah nifate cawnnak caan (time table) ah a telh chih. Amah cu 1444 kum ah a thi i kum ruk a rauh hnu ah Mithiang sinak an pek.