PUMKHAT PAKHAT LUNGKHAT
Nihin kan Nu Bupi nih Pathian bia a kan tar piakmi (Jn. 17:11-19) “A thiangmi ka Pa, nangmah le keimah cu pakhat kan si bantuk hin pakhat an si khawh ve nakhnga, na ka pekmi hna cu na min ṭhawnnak in huppheng ko hna. Annih sin i ka um lioah hin cun, na ka pekmi hna cu na min ṭhawnnak in ka hupphenh hna i him tein ka chiah hna. A tlau ding ar ak si hrimmi dah kha ti lo cu pakhat hmanh an tlau lo-kha zong kha cathiang a tlin nakhnga caah a si ko. Atu cu kei cu nangmah sinah ka ra lai: Sihmanhsehlaw hi vawlei cung i ka um lioah hi bia ka chimnak cu ka lunglawmhnak kha an lung chungah tlamtling tein an ngeih nakhnga caah a si. Kei cu hi vawlei ta ka si lo bantukin annih zong hi vawlei ta ansi lo caah na bia kha ka chimh hna i vawlei nih cun a huat hna. Vawlei cung hin la hna tiah kan nawl a si lo, sihmanhsehlaw Mi Ṭhalopa sin khan him tein chia ko hna ti kha kan nawl. Vawlei ta ka si lo bantuk hin annih zong vawlei ta an si ve lo. Annih cu biatak khan thianter hna: Annih cu biatak khan thianter hna: biatak cu nangmah bia kha a si. Vawlei ah na ka thlah bantukin kei zong nih vawlei ah ka thlah ve hna. Annih zong kha na biatak in thianh an si nakhnga kei zong hi anmah ruangah kaa thianh ve.”
Tuzing cathiang chungah kan hmuh bantukin “pumkhat, pakhat, lungkhat” timi hi i hrawmṭi hna usih ti ka duh. Kan Bawipa Jesuh Khrih nih vawlei in a Pa sinah van ah a kai laite ah a si a rak herhtukmi kha a Pa a rak chimh i a Pa sinah a donghnak biate a rak chim takmi kha kan hmuh. Cucu zeidah a si kan ti ahcun a zumtu hna, a zultu hna kha pumkhat lungkhat pakhatte ah ṭhenlo tein an um ding kha Khrih nih a sia a herhtuk kha a si. Minung zong nu le pa maw, pi le pu maw an thih lai ah caansau khua an tlawn lai ah an chung i an sia a herhtukmi le cahtah an duhmi kha biaro an vuih ta hna i cuticun an siahrehmi te kha an cah ta tawn hna. Kan Bawipa Jesuh Khrih nih a zultu hna, a zumtu hna kha lungkhat tein i ṭhenṭhek lo tein lungrual tein um a rak duhnak kha tuzing cathiang ah kan hmuh khawhmi a si.
Khrihfabu tuanbia tiluan kan zoh tik zongah hin AD (33) ah hin kan Bawipa Jesuh Khrih nih Khrihfabu cu a rak dirh i lungkhat tein an nung, pumkhat ah lungkhat tein nunnak an rak hman tikah cun Satan nih hin a rak tukforh hna i heh tiah ṭhenṭhek dingin Rome ralkap hna le Judah mi hna hmangin Satan nih hin a rak hrem hna, an rak thah hna, sihmanhsehlaw an rak tei lo. An hrem deuhdeuh hna, an thah deuhdeuh hna Khrihfa kha an karh deuhdeuh i cuticun lungkhat pumkhat sinak kha Satan nih khan a rak tei hna lo. Sihmanhsehlaw Satan zong cu a rak fimtuk ve, a thiamtuk ve mi a si tikah 1518 hrawngah cun Martin Luther hmangin Satan nih Khrihfabu chungah i lungkhahnak pumkhat sinak kha ṭhenṭheknak in a vun hman tikah cun Khrihfabu chungah ṭhenṭheknak, buainak, hnahnawhnak tampi a rak chuahnak kha kan hmuhmi a si. Khrih nih cun Khrihfabu chung cawlcanghnak zongah hin lungkhat tein um kha a duh i zumhnak zongah hin lungkhat tein pumkhat chungah um ding a kan duhpiakmi kha kan hmuh. A pumthiang kha a kan pek tak i cu a pum thiang kan i hrawmnak kan einak thawngin Khrih he khan pumkhat kan si i Pa Pathian le kannih zong kha Khrih chungah cun kan i tong i cuticun Khrih a thlahtu Pa Pathian le kannih hna cu Khrih thawngin, Khrih thisa thawngin pumkhat kan si ve.
Voikhat cu mipa pakhat nih thlam a sak i a tungah rua a tuah, a cungcih ah rua a tuah, a vam ah a zial ah rua lawngte kha a tuah i voikhat cu zaanriah a ei i tuai kha aa meh tikah a ruah a ruah i a chimmi cu, “Maw… rua keimah cu na chungah ka um i nang zong ka chungah na um ve” tiah a ti ti si. Rua in sakmi thlam chungah a um i cun cu rua cu a eitu pa chungah cun a um ve tikah cun rua chungah mipa zong um i mipa chungah rua zong a um ve ti kha kan hmuhmi a si. Cuve bangtukin kan Bawipa thisa kan ei bantukin Bawipa Jesuh Khrih cu kan chungah a um i kannih zong Khrih chungah kan um ve i Pa Pathian he kannih cu Khrih chungah pumkhat kan si timi kha cathiang chungah fiang tein kan hmuhmi a si.
Zumtu u le nau vialte hna kan Bawipa Jesuh Khrih nih a Pa sinah van a kai lai ah siaherhtuk in a Pa a cah ta, a chimh ta bantukin a chimh tami “Ka Pa hi vawlei ah na ka thlah bantukin kei zong nih vawlei ah ka thlah ve hna. Ka Pa nang le kei cu pakhat kan si bantukin pakhat an si ve nakhnga, pumkhat an si va nakhnga huppheng ko hna” tiah kan Bawipa Jesuh nih a Pa kha a rak ti. Pa Pathian, Fapa Jesuh Khrih le kannih hna kan i tonnak Khrih pumthiang chungah hin nifatin kan nunnak, kan zumhnak, kan ruahnak hi chia peng ko hna usihlaw, Khrih nih a kan cahtakmi zungzal nunnak kan hmuh khawh nakhnga ding caah Satan kan teinak cu a si ko timi kha tuzing cathiang ah kan hmuhmi a si. Bawipa nih thluahcuahnak kan pek piak ko seh.