Pathian duh ningin kan hal ahcun zei paoh a kan pek ko lai

“Biatak kan chimh hna. Ka Pa nih ka min in nan hal mi paoh cu an pek hna lai” timi in thazang i lak hna u sih. 

Kan kawl mi aa lo cio ko nain a kawl tu kan i dang hna. “Hal u law pek nan si lai. Kawl u law nan hmuh lai. Ka min in nan hal mi paoh cu an pek hna lai.” 1Siangpahrang 3:5-13 chungah Solomon Siangpahrang nih Israel miphun hna lam hruai khawhnak caah hngalhthiamnak, fim thiamnak a hal caah Bawipa cu Solomon cungah aa lawm tuk hringhran. A hal mi zong a pek i a hal lomi rumnak le nun khua saunak zong a pek. Amah duh ningin kan hal a si ahcun zei paoh a kan pek dih ko. 

Mk 10:35-37 chungah Jebedee fapa hna Jeim le Johan nih Jesuh sin an ra i an hal mi cu “a sunglawi mi na pennak chung i na Bawi ṭhutdan cung i na ṭhut tikah na sinah kan ṭhuter ve law kan duh. Pakhat na orhlei kam ah pakhat na keh lei kam ah an ti. Jesuh nih nan hal mi hi nan hngal lo a ti hna.” 

Nihin Jeim le Johan bantukin mah le mah nganter a duhmi kan si maw? Isaih 59:1-5 chungah “Nan hal tikah an theih piak hna lo cu nan sual ruangah a si. Nan i tinh mi a ṭhat lo ruangah a si tiah a ti.” Nihin kan thlacam ning hna hi thuk deuh in ruat hna u sih. Na hal mi paoh an pe maw?

Nihin thawngṭhabia chungah “Biatak kan chimh hna. Ka min in nan hal mi paoh cu an pek hna lai tiah a ti.” Kan hal mi paohpaoh a kan pe maw? A kan pe lo. Kanmah caah ṭhatnak ding le kanmah sunparnak le porhlawt ruamkai nak ding caah maw kan hal? Asiloah, mi zapi ṭhatnak ca le Bawipa sunparnak langhter nak caah maw kan hal. Amah duh ningin kan hal ahcun zei paoh a kan pek ko lai timi hi nihin kan thawngṭhabia a si.