Harnak chungin Pathian hmuh khawh i zuam hna u sih
Nihin kan relmi thawngṭhabia chungin kan Bawipa Jesuh Khrih nih a chimmi hi mi vialte caah thihnak a tuar hlaan i a chimmi bia a si. John 16:20 “Biatak kan chimh hna. Nannih cu nan ṭap nan ai len lai. Sihmanhsehlaw vawlei cu ai lawm lai ee” tiah a ti.
Pathian mi kan si tiah ai timi Judah phung a zul mi hna, Judah phung a ṭanh mi hna nih Pathian cu palh ṭanh in an rak ṭanh i anmah lila kha thlarau mi ah an i ruah i, sihmanhsehlaw Pathian phung kha titsa ṭanh, vawlei ṭanh in an ṭanh i Thlaraumi a si taktak mi Jesuh Khrih a zummi hna le Khrih hnu a zulmi hna kha an doh hna. Anmah lawngin siloin Rom cozah, vawlei uk phung a hruaitu vialte i roih hna in Khrih a zumtu hna kha an doh hna. Amah Jesuh Khrih hrimhrim cu vailam cungah an khenh chih. Jesuh nih amah phunhawi hna nih an cohlan lai lo nak kong kha a hmuh chung cia caah (Jn 16:20) ah “Nannih cu nan ṭap nan ai len lai. Sihmanhsehlaw vawlei cu ai lawm lai ee” tiah a ti nak cu a si.
U le nau hna Khrih zumh i a hnu zultu si hi thil fawi te le, lam nuam le pangpar phanhmi lam a si lo ti cu Jesuh Khrih nih fiang tein a kan chimh chung mi a si. Maṭ 16:25 “Ahohmanh, mah nunnak humhal a duhmi cu a nunnak kha a sung lai i keimah ruangah a nunnak a sungmi cu a nunnak a hmumi a si lai” tiah a kan ti. Lamkaltu 14:22b ah “Pathian Pennak chungah kan luh khawhnak ca dingah cun harnak tampi kan ton a hau. Nan zumhnak ah fek tein dir ko u” tiah Antioch khua Khrihfa bu hna kha thazang a pek hna ti kha kan hmuh khawh.
U le nau hna Khrih na zumh i a rian na ṭuan i a hnu na zulhnak ah zeibantuk hneksaknak, miṭhli tlaknak, zeibantuk harnak dah na ton? Na lung der hrim hlah. Teinak lam, zungzal nunnak lam a si ti kha i seh chih in hmailei ah fong chin ko u sih. Psalm 126:6 nak ah “Ṭah buin thlaici ai phorh mi hna nih lunglawmhnak hla sak le facang phal i phorh in an rak kir te lai” tiah a rak chim chung cia.
Khrih ah dawtmi u le nau hna zeithil kan tuah hmanh ah Bawi Jesuh Khrih min in ṭuan ko hna u sih law Bawi Jesuh Khrih min in zeizong vialte Pa Pathian kha hal ko hna u sih law harnak tampi tong ko hmanh u sih law kan ngeihchia in kan miṭhli tla ko hmanh seh. Zungzal nuncaan hmunnak kan phak ko ding a si caah harnak kan tonmi chungin Pathian mui hmuh khawh i zuam ko hna u sih.