Nannih nih cun nan ka thim lo. Keimah nih kan thim hna.

Kan nu Bupi nih nihin ni caah a kan thimpiak mi chungin  tlawmpal thazang i lak ṭi hna u sih. Jn 15:16 “Nannih nih cun nan ka thim lo. Keimah nih kan thim hna i a hmun dingmi thei tampi in va tlai tuah u tiah kan fial hna. Cucaah ka min in nan hal mi paoh cu ka Pa nih an pek hna lai.”

Lamkaltu 1:15-17,20-26 chungah kan Bawipa Jesuh Khrih a rawitu Judas Iscariot aiawh ah Matthias an thimnak kong kha kan hmuh. Nihin ni zongah Bupi nih mithiang Matthias puai zong sunglawi ngai in a tuah mi ni zong a si. Mitthias cu kan Bawipa Jesuh tehte khaan ruangah a nunnak aa pe mi zong a si. Kan Bawipa Jesuh Khrih a zultu hna 11 chungah khan an thim hnu ah aa tel ve mi pakhat a si i kan Bawipa Jesuh Khrih caah nunnak pek tiangin Bawipa a dawmi zong a si. “Mi pakhatkhat nih a hawi lei cungah dawtnak a ngeih khawh mi cu an ca i a nunnak a pek kha asi” a ti bantukin Jesuh Khrih kha a nunnak dih lak in a dawt i aa pemi mithiang pakhat a si. 

Mithiang Matthew hi September 11 ni ah hin a puai ni a si ve. Amah cu ngunkhuaikhawl pakhat a si i kan Bawipa Jesuh Khrih nih amah zultu si dingah a thim ve mi, a auh ve mi zultu pakhat a si. Nihin ni ah puai tuah piak a simi cu Judas Iscariot aiawh ah an thimmi Mithiang Matthias puai a si. 

Nihin kan relmi thawngṭhabia chungah “Nannih nih nan ka thim lo. Keimah nih kan thim hna” a kan ti. Nang le kei nih kan Bawipa Jesuh Khrih kan Pathian hi kan thim lo i amah nih a kan dawt i amah miphun si dingah, a tuurun si dingah a kan thimmi miphun kan si. 

Dawtmi u le nau hna, nang le kei hi mi sawhsawh kan si lo. Pathian miphun kan si caah hin a vanṭha tukmi kan si ti hi i philh hlah u sih. Zei ruangah dah Jesuh Khrih nih a kan thim kan ti ah cun “Khamhnak kan hmuh khawh nak hnga ding caah a si” timi kha (2The 2:13; Jem 2:5) chungah fiang tein kan hmuh khawh mi cu a si. Cun zumhnak ah a rummi si awkah a kan thimmi miphun kan si. Cun amah nawl ngeih awk ah a kan thimmi miphun zong kan si. “Ka Pa nawlbia kha ka ngaih i a dawtnak chungah ka um bantukin ka nawlbia kha nan ngaih ahcun ka dawtnak chungah nan um ve lai. Kei ka nawlbia cu hihi a si. Keimah nih kan dawt hna bantukin pakhat le pakhat i daw u” tiah Jesuh nih a kan ti. Amah nawl ngaih dingah, amah dawt dingah, pakhat le pakhat i dawt dingah kan Bawipa Jesuh Khrih nih a kan thimmi miphun kan si(1Pet 1:2). Cun a sunparnak i hrawm ve dingah a thimmi, a tlangbawi si dingah a thimmi, khuaruahhar a tuah mi i hrawm dingah, chim dingah thimmi, miphun lianngan si dingah thimmi, a hmunmi thei tampi tlai dingah thimmi miphun kan si. 

A hmunmi thei, thlarau nih a chuahpi mi thei dingah thimmi miphun kan si. Cun amah hmai ah a thiangmi le zeihmanh soi awk a um lomi si dingah hin Pathian nih a thimmi miphun kan si(Ep 1:4). Cucu vawlei ser hlan in Pathian nih kan nih cu Khrih chungin amah ta si dingah a thimmi kan si. 1The 4:3-4,7 chung zongah fiang tein kan hmuh khawh mi a si. Pathian nih a kan thimnak chan cu “A thiangmi le nu le pa sualnak aa summi si hna seh ti an duh hna. Nan dihlak in nan pum uk kha nan thiam awk a si. nan pum cu nan thianter awk le nan upat awk a si. Pathian nih sualnak tuah lengmang dingin a kan au lo. Mithiang si ding tu ah a kan auh.” “Nannih an ko tu Pathian a thian bantukin nannih zong thiang ve u” (1Pet 1:15-16) chungah kan hmuh khawh. 

Dawtmi u le nau hna, hi vawlei kan nun chung te ah hin kan Bawipa Jesuh Khrih ṭih bu tein dawt bu tein a nawl ngai bu tein nifatin nung u sih law pum siseh, thlarau siseh a thurhnawmhter tu paohpaoh khan i thian u sihlaw Pathian ṭih bu tein nung ko u sih timi hi thazang lak ṭi kan duh hna.