Pathian cawnpiak ningin Pathian a bia tu kan si a herh

Nihin ni caah kan nu bupi nih thazang lak ṭi dingin an kan thimpiak mi cathiang hna cu ( Lamkaltu 17:15,22-18:1; Jn 16:12-15) hi an si. 

Pa Pathian nih Fapa Jesuh kha a rak thlah Fapa Jesuh nih amah duh ning in chim le phuan siloin thlahtu Pa Pathian nih a fial ning tein a chim a ṭuan i cucu kan i fian khawhnak hnga ding caah Thiang Thlarau kha a kan pek i Biatak Thlarau nih a dangin chim le phuan siloin Khrih nih a kan chimh mi chungin a lak mi kan lung a pian khawhnak hnga ding caah a kan chimphuan mi a si ti kha cathiang chungah kan hmuh mi kha a si. Pa Pathian le Fapa Jesuh Khrih, le Thiang Thlarau hi an rianṭuanmi ai khat ti kha kan hmuh khawhmi a si.

Kan Bawipa Jesuh Khrih hi vawlei a nun lio ah hin mi tampi le a zultu hna nih an zulh ko nain Thiang Thlarau an co lo caah a cawnpiak nak le Amah Khrih kha aho a si ti kha an rak thei kho lo. Cutikah Jesuh Khrih nih biatak phuangtu Thlarau, Bawmtu Thlarau a rat tikah cun a tu i kan chimh mi hna, kan cawnpiak mi hna nan lung a piang lomi hi cu Thlarau nih cun fiannak an pek te hna lai tiah kan Bawipa Jesuh Khrih nih khan a rak ti hna. Jesuh Khrih nih Thiang Thlarau cu a pek tik hna ahcun hngalh khawhnak, fian khawhnak kha an ngeih tikah Pathian bia kha an lung chung le an ka lawngin chin le phuan siloin hi Pathian bia hi nihin ni caan ah Bible a si tiin kan i tleih khawhnak, Pathian bia kan ngeih khawhnak hi cu Thiang Thlarau thawngin a si ti kha cathiang ah kan hmuh khawhmi kha a si. 

Kan Bible cathiang hi mifim tampi ṭhut ṭi in ṭial ṭimi siloin Pathian nih Thlarau a pekmi hna hmang in hi Pathian bia hi kannih nih kan ngeih khawhnak a si ti zong kha kan hmuh khawh. Minung taksa sinak in Pathian bia hi fian khawh a si lo ti kha fiang tein kan hmuh. Muslim biaknak chung zongin mifim tampi an um i Pathian bia kha an rel ve. Zum lo tu hna zong nih an rel ve ko. Sihmanhsehlaw, Thlarau an co lo tikah kan Bawipa Jesuh Khrih kha Pathian thlahmi Fapa a si, mi khamhtu a si ti kha an i fiang kho lo i an cohlang kho lo, an zum kho lo. Thlarau cawnpiak nak lawnglawngin Khrih nih a cawnpiak nak kha zumh khawh a si ti kha cathiang chungah kan hmuh mi a si. 

“Cun kan pekmi hna Thlarau nih cun keimah nawl a si tiin zeihmanh a chim lai lo. Kan chimhmi hna chung khan an chimh hna lai caah keimah cu a ka thangṭhat lai” tiah Jesuh nih a ti i Thlarau nih hin a dang tein rianṭuan in a chim lo. Kan Bawipa Jesuh Khrih chimmi, zultu hna cawnpiak mi hna chungin a fiang lomi an fian khawhnak hnga ding caah, an zumh khawhnak hnga ding caah Thlarau nih Khrih bia chungin fiannak kha a pek lai ti kha kan Bawipa Jesuh Khrih nih fiang tein a rak chim chungmi kha a si. 

Kan Laitlang biaknak cheukhat kan zoh tik hna ahcun ‘Thlarua nih a ka fial, chim a ka ti. Thlarau nih ka lung chungah bia a chim. Caw that u, cawimawi u, lawmhnak tuah’ ti phun le Halleluiah voi 7 au law timi phun, rawl ni 7 na ulh lai timi phun, a lungthin in a chuak mi a phunphun kha Thlarau hruainak an ti i cuticun ai hruaimi le a nungmi tampi an um. 

Sihmanhsehlaw, kan Bawipa Jesuh Khrih nih cun mah ruahnak, mah lungthin, mah pom ning, mah nuamhnak in siloin Khrih nih a kan cawnpiak mi bia chungin kan fian khawhnak hnga ding caah Thiang Thlarau nih khan fiannak an kan pek nak Thlarau kha pek kan si ti kha cathiang ah kan hmuh mi cu a si. 

Jesuh Khrih thangṭhat kan timi hi Khrih nih a kan dawtnak, kan ca i temhinnak fakpi in a tuarnak le a thih i a thawhṭhannak kha a hngal rih lomi, a thei rih lomi hna sinah a kong ṭha va chim, a dawtnak ca chim kha a si. Cucu Pathian thangṭhat kan timi cu a si ko. Laitlang biaknak cheukhat nih biaknak kan timi cu holh theih lo holh in laam le Halleluia tiin au kha thangṭhat a si tiin ai cawnpiak mi tampi an um. Sihmahsehlaw kha bantuk kha cu palh taktak kha a si ko. Mah duhning, mah ruahnak cohlaan ning in Pathian biak, zumh, zulh ti hi ṭih a nung ngai mi a si ti kha cathiang chungah kan hmuh mi cu a si. 

Pathian kan biak ti tikah hin kanmah duh ning in siloin Pathian duh ning in biak le Pathian duh ningin, a bia ningin Pathian thangṭhat kha Pathian nih a kan duh piakmi kha a si. 

Dawtmi u le nau hna, Israel hruaitu hna Pathian, Abraham Pathian, Jacob Pathian, Issac Pathian, lungpi chungin ti a chuah ter kho tu Pathian rili sen a cheuter kho tu Pathian, a dawtmi a fa le hna caah zeizong te a tuah kho tu Pathian nih a Fapa Jesuh Khrih kha vawlei misual khamh awk caah vawlei ah a run thlah tikah hin zungzal nunnak kan co khawhnak hnga ding caah le a cawnpiak mi kan i fian khawhnak hnga ding caah, Fapa Jesuh Khrih nih a tauh mi vialte kha kan lung a pian khawhnak hnga ding caah hin bawmtu Thiang Thlarau kha Khrih nih a kan pek mi kha a si i, cucu kannih hna nih ‘Thlarau’ kan timi cu a si. 

Pa le Fapa le Thiang Thlarau an rianṭuannak ai khat i, khamhnak rian ah a dangin an kal lo timi kha cathiang chungah kan hmuh mi kha asi. Kan Bawipa Jesuh Khrih nih “hi vawlei ah kan chimh mi hna le kan cawnpiak mi hna hi keimah duh ning in a si lo. A ka thlahtu duh ningin ka chim le ka tuah hi a si” tiah a ti i Khrih nih ‘kan pek mi hna Bawmtu Thlarau nih kan chimhmi hna hi fiannak an pek hna lai i kan chimmi hna chung hin an cawnpiak hna lai’ tiah a ti bantukin kannih hna zong, hmailei kan nunnak, kan zumhnak, Pathian hnu kan zulhnak ah hin kan thinlung in a chuak mi, kanmah ruahnak, kanmah zumhnak in Pathian a zum i Pathian a thangṭhat tu siloin, a Bia thiangin, Pathian duh ning zoh in Pathian a thangṭhat mi le a kawlmi si hram ko hna u sih. 

Vanram lei kan panhnak ah hin a dangin vanram a kawlmi siloin Pathian Bia in, Thlarau in ṭialmi Bible Pathian bia in Pathian a kawlmi si hna u sih law, cuticun kan zumhnak hi Pathian bia in ṭhan ter ko hna u sih timi kha hrawmh kan duh mi hna cu a si.