Bawmtu Thiang Thlarau kan herh

John 15: 26 “Ka Pa sinin a rami Bawmtu, biatak Phuangtu Thlarau cu a ra lai. Ka Pa sinin nan sinah ka rak thlah lai i keimah kong kha an chimh hna lai.” Lamkaltu 16:14 – “Cu hna lak i kan bia a theimi pakhat cu Lidia a si, amah cu Thiatira khuami a si i maimaw puan a zuarmi a si. Amah cu Pathian a biami nu a si i Paul nih a chimmi bia ngaih awk caah khan Pathian nih a lungthin kha a hunpiak.” 

Nikhat cu Paul le Silas cu khual an tlang i khua pakhat Neapolis timi khua kha an phan. Cu khua i a ummi hna kha thangṭhabia an chimh hna i cu hna lak ah aa telmi cu Lidia a si a ti. Paul nih a chimmi ngaih awk ah Lidia cu Pathian nih a lungthin kha a hunpiak a ti. Cu hnu ah Pathian biatak kha a pemh i tipil nak a ing timi kha kan hmuh. 

Nihin ni caan ah nang le kei zong Pathian nih kan lungthin a kan hunpiak lo i, Pathian nih kan mit hi a kan deih ter lo i, Pathian nih lam a kan hruai lo ahcun, Thlarau nih fianternak a kan pek lo ahcun zeitik hmanh ah kanmah thazang, kanmah thil ti khawhnak in Pathian bia hi pemh khawh a si lo timi kha fiang tein kan hmuh khawh mi a si. Emmaus khua lei ah lamkaltu pahnih khna khual an tlawn, an kal lio zongah khan Jesuh cu an sinah a kal ve. Pathian bia a ruah hna. Sihmanhsehlaw, lampi i bia an i ceih ko mi hna kha an lung a pemh kho hna lo. Jesuh he cabuai cungah ah changreu cheunak an tuah hnu lawngah Pathian bia kha an pemh. Jesuh a si kha fiang tein an hmuh khawh ṭhan. Chim duhnak cu nang le kei zong kanmah tein Jesuh hi hmuh khawh a si lo. Thiang Thlarau nih kan lungthin chungah rian a ṭuan i Thiang Thlarua nih a kan fianter lawngah Pathian bia hi pemh khawh a si timi kha a langhter mi cu a si. 

Cuasicaah, nifatin kan nunnak ah hin Thiang Thlarau bawmhnak hi kan herh taktak mi cu a si ko. Teinak timi cu kanmah ṭhawnnak in siloin Thiang Thlarau ṭhawnnak thawng lawngin a si timi kha kan Bible cathiang nih a kan cawnpiak mi a si. 

Cun Jesuh nih – “Ka Pa sinin ka run thlah lai mi Bawmtu Thiang Thlarau nih cun zeizong vialte kha an cawnpiak hna lai” a ti. Khrihfa kan nunnak ah vawlei kan nun lio hrimhrim in Thiang Thlarau in a khat mi, Thlarau lam hruainak in, umpi nak thawngin nikhat hnu nikhat zumhnak lei ah kan ṭhawn chinchin i cuticun puitling mi zumtu si ding hi Bawipa nih a kan auhmi cu a si. 

Dawtmi u le nau hna, Thlarau lei ah nu tling patling kan si khawhnak hnga ding caah siseh, nifatin kan cawlcangh, kan rianṭuannak vialte cungah kan nunnak in Bawipa Sunparnak kan pek khawhnak hnga ding caah cun Thiang Thlarau bawmhnak hi kan herh hringhran ko. Bawmtu Thiang Thlarau hi kan herh ko. Pathian bia kan relmi hi Thiang Thlarau bawmhnak tel loin kanmah tein fian khawh a si lo. Midang chimmi thawngṭhabia kan ngeih tik zongah Thiang Thlarau tel loin cun kanmah fimnak, thiamnak in cun zeitik hmanh ah pemh khawh a si lo. Cuasicaah, Thiang Thlarau kha sawm hna u sih law, Thiang Thlarau nih lam a hruaimi, Thiang Thlarau umpi mi Khrihfa ṭha, zumtu ṭha kan si khawhnak hnga ding caah Bawipa nih thluachauhnak kan pe hram ko seh. Amen