Jesuh Khrih he pehtlaihnak kan ngeih a herh ko

Nihin ni caah Bupi nih a kan thimpiak mi cathiang hna cu (Lamkaltu 15: 1-6, Jn 15:1-8) hna hi an si. 

“Mitsur ruang cu keimah hi ka si. Nannih cu a nge nan si i Keimah he nan i peh lo ah cun thei nan tlai kho lai lo” tiah kan Bawipa Jesuh Khrih nih a kan chimh. Minung hi Khrih loin zeihmanh kan si khawh lo zia le Khrih lo cun mualphohnak, thihnak a chuak timi kha kan cathiang chungah kan hmuh khawhmi cu a si. Rom 8:6 chungah “Nan nunnak kha mihring sinak nih a uk a si ahcun thihnak kha a chuahpi i Khrih Thlarau nih nan nunnak kha a uk, a hruai a si ahcun nunnak a chuahpi” tiah a ti bantukin kan minung sinak nih kan nunnak a uk lo i Khrih nih a uk mi, mitsur ruangpi a si mi kan hrampi a simi, kan kungpi a simi Khrih he i pehtlaih kha Khrih nih a kan duh piakmi cu a si. Pathian nih hin Khrih he kan i pehtlaih i, kan i pehtlaihnak a bia le a pum thiang thawngin kannih nih kan zumh i kan thinlung, kan ruahnak, kan tuahnak in Khrih he kan i pehtlaih tikah cun Khrih Thlarau le kan thlarau kha an i fonh i Pa Pathian kha “Ka Pa” tiah a kan au ter tiah cathiang chungah kan hmuh bangin Khrih he kan i pehtlaihnak thawngin Pa Pathian a duh mi le Pa Pathian a sunparnak kha langhter dingah Khrih nih hin a kan duh piak mi a si ti kha tuzing cathiang ah kan hmuh khawhmi cu a si. 

Minung hi kanmah ca lawngah sermi kan si lo. Thei kan tlai khawhnak caah cun midang caah ṭhatnak tuah, midang va bawmh duhnak midang caah nun duhnak thinlung kan ngeih i kan tuah hnu lawngah midang nih a kan ei khawhmi thei, midang caah ṭhahnemmi thei kan tlai khawhnak ding kha a si. 

Thingkung nih amah ca lawngah thei a tlai bal lo i nika zong amah ca lawngah a tlang bal lo. Tiva nih amah ti ai ding bal lo i pangpar zong nih amah ca lawngah a par bal lo. Pathian nih a sermi thil vialte hna hi midang caah nung ding le midang nunnak he i hrawm dingah sermi kan si ti kha a langhter. ‘Minung zong pakhat le pakhat i bawm chan dingin vawlei ah ser kan si’ tiah Pope Francis nih a ti. 

Kannih hna zong vawlei nun caan tawite Pathian nih a kan zuah chungah hin khuami he, sangmi he, midang he daw tein le rem tein nun hi Pathian nih a kan duhpiak i kan nunnak caan tawite hi sullam a ngeimi te le chingchiah awk a tlak mi tein nun hi Pathian nih a kan duhpiakmi a si. Midang caah ṭhathnemhnak tuah duh lo, midang bawmh duh loin kanmah hmuhnak, kanmah miak nak, kanmah ngeihnak thinlung lawng kan ngeih a si ahcun, cucu nun man ngei lo le nun a car mi, thei a tlai lomi nun a si ko. 

Rili thi kan timi hi a luang lei lawng a si i a chuak lei a um lo tikah cun a nung mi saram zong an um kho lo i midang ca zongah ṭhathnemnak a pe lo ti kha kan hmuh. Cu ve bantukin kannih hna zong, a lut lei lawng kan duh i a chuak lei kan sian lo a si ahcun thei kan tlai kho lai lo i mi nih herhmi ah kan cang kho lai lo. 

Voikhat cu a rum taktakmi pa pakhat a rak um i midang caah zeibantuk ṭhathnemhnak hmanh kha tuah a duh lo. Hmuhnak lei lawng kha a duh. Phaisa an cawi zongah a coih duh hna loh, mi harsat dam lo caan zongah bawmhchanh duhnak thinlung a ngeih lo tikah cun a thinlung chungah daihnak, lawmhnak kha a um kho ti lo. Nikhat cu thingtang ram tang ah a va kal i thingro a kiak mi kha mipa pakhat nih a liangin a put mi kha a hmuh tikah “Aw,.. thingkung hmanh nih pei a thih hnu a ro hnu hmanh ah midang caah ṭhathnemnak a pek, midang nih herhmi ah a cang mu. Thingkung nak in maw keimah hi nun man santlai lo deuh ka si. Midang caah ka nun lo ruangah pei ka nunnak ah lawmhnak zong a um khawh lo hi” tiah a ti i a lung ai thleng tiin tuanbia ah kan hmuh. 

Kannih hna zong lawmhnak taktak, daihnak taktak, hnangamnak taktak kan timi hi hmuhnak lei ah siloin peknak lei tu ah a si ti kha Khrih nih a kan cawnpiak mi kha a si. Midang nih ei khawhmi, midang nih duhmi, midang caah ṭhathnemnak a ngeimi thei kan si khawhnak hnga ding ahcun Khrih he kan i pehtlaih kha a biapi taktak mi cu a si. Khrih lo cun kan nunnak hi santlai lo ah a cang i Khrih lo cun kan nunnak hi thei a tlai kho lo timi kha tuzing cathiang ah kan hmuh khawh mi cu a si. 

Dawtmi u le hna, hmai lei kan nunnak ah hin Khrih nih zungzal in a kan umpi nak a pum thiang le a cathiang in Khrih he hi i pehtlai peng ko hna u sih law cuticun thei ṭha kan tlai i midang caah nun a ngeimi, midang caah ṭhathnehnak a ngei mi si hram ko hna u sih.