PATHIAN PENNAK HMELCHUNHNAK HNA

Jesuh nih a chimmi bia hna kha, “Thil lianngan tuahnak le khuaruahharnak le hmelchunhnak hna tampi in” a zulhter hna. Cu nih cun amah chungah pennak a um ti a langhter i amah cu biakamh mi Messiah a si, ti kha tehte a khan. (Lam. 2:22, Lk. 7:18-23).

Jesuh cu a tuahmi thil hna nih Pathian thlahmi a si kha an langhter. (Jn. 5:36, 10:25-38). Zumhnak in a sinah aa mermi hna sinah an duhmi kha a pek hna. (Mk. 5:25-34, 10:52, ect…). Cu a si caah a tuahmi khuaruahharnak hna nih Pa rian a ṭuannak cungah zumhnak kha an fehter. Pathian Fapa a sinak kha tehte an khan (Jn.10:31-38). Sihmanhsehlaw hi khuaruahharnak zong hi zawmhtaih cawhdehnak lah a cang kho. Zeicahtiah minung kherhlai duhnak lungthin kha diriamter awkah a cheukhat nih Jesuh kha an hlawt ṭhiamṭhiam i khuachia ṭhawnnak in a tuah tiah sual hmanh an phawt. (Jn. 11:47-48, Mk. 3:22).

Mi cheukhat kha vawlei cungah ṭhatlonak a simi rawlṭamnak, dinlonak, zawtfahnak le thihnak in a luatter hnanak in Jesuh nih Messiah hmelchunhnak hna kha a tuah. (Jn. 6:5-15, Lk. 19:8, Mt. 11:5). Sihmanhsehlaw vawlei cung i ṭhatlonak vialte kha hloh dih awkah a ra lo. (Lk. 12:13-14, Jn. 18:36). Mah nakin a zual deuh ngaingai mi sualnak sal cannak khan luatter awkah a ra. (Jn. 8:34-36).

Pathian pennak a tlung timi sullam cu Satan kha teinak a si. “Pathian Thlarau in khuachia kha ka ṭhawl hna ahcun, Pathian Pennak cu nan cungah a tlung cang” (Mt. 12:26-28). Jesuh nih khuachia kha a ṭhawl tikah mi hna kha khuachia pennak in a luatter hna a si. Annih nih vawlei uktu Satan a teinak kha a hmuh chung. (Jn. 12:31, Lk. 8:26-39). Pathian Pennak cu Khrih vailam thawng in dirh a si lai. “Pathian nih thing cung in a uk”.