Tang Dornak Lungthin
Nihin RVA in Pathian bia thazaang a latu zumtu hna nan dihlak cungah Bawipa nih a thar in thluachuah in pe ko hna seh!
Nihin thawngṭhabia Luke 14:1,7-11; “Mi tangah aa dormi cu mingan ah ser a si lai” timi in thazaang la hna usih. Mithiang Bernard nih hitihin a chim; Tangdornak cu veel ngeihnak innka hunnak a si. Vancung khua cu mi toidor mi hna khua a si. Matt 18:4 ah Keimah timi lungput na ngeih chung vialte nangmah chungin Pathian sunparnak Pathian ṭhawnnak a lang kho lai lo, zeicahtiah Pathian cu mi toidor mi hna sinah a ummi a si.
Vancungmi Lucifer cu keimah timi lungput a ngeih ruangah vancung in vawlei ah hlonh a si. Zeicahtiah vancung khua cu mi toidor hna khua a si. Matt 18:4 ah Sualnak a hram aa thawknak cu keimah tinak ruamkainak in a hram aa thawkmi a si. Daniel 4:30-33 ah; Nebukhatnezer Siangpahrang nih hitihin a chim; A liannganmi Babylon khualipi hi keimah ṭhawnnak a nganmi le keimah upatnak langhternak caah ka sermi a si tiah a au. Amah le amah kha aa nganter.
Nihin thawngṭhabia nih a chimmi cu amah le amah aa nganter mi cu nauta ah chiah a si lai a ti. Siangpahrang cu cawtum ah a cang. 1Cor 15:9-10 chungah Mithiang Paul nih hitihin a chim; Kei cu Khrihfabu a hremtu ka si, Lamkaltu vialte lakah nautabik ka si, Lamkaltu ti awk hmanh kaa tlak lo a ti. Luke 3:16-17 chungah; Tipil petu Johan cu Jordan tiva kam ah thawngṭha a chim lioah a thawngṭha chimmi nih mi lungthin a suk ngaingai. Mi zapi nih nangmah cu Messiah na si maw, Profet na si maw tiah an hal. Mi zapi nih an uar ngai, zapi nih Johan cu an cawisan. Johan nih a thawh hna i; Keimah nakin a ngan deuh mi a ra lio, A kedan hri phoihtu hmanh ah kei cu kaa tlak lo a ti hna.
Bawipa cu toidormi hna sinah a um, Bawipa a umnak cu toidor nun an ngei. Filipi 2:5-9 chungah; Vailamtahnak cu toidornak in a rami a si, mi toi ah a dor i nawl ngaihnak lam kha thihnak tiangin a zulh, cucaah vailamtahnak cu toidornak in a rami a si. Cucaah vailam cung i a thi i a thoṭhan mi Bawipa Jesuh a zummi vialte cu toidor nun ngeimi kan si lai.
Zeicahtiah Jesuh cu toidor mi nunnem mi a si caah. Nihin thawngṭhabia nih a kan chimhmi cu amah le amah mingan ah aa sermi cu nauta ah chiah a si lai i, mi tang ah aa dormi cu mingan ah ser a si lai a ti.
Thazaang petu /- Saya Francis Khua Pheng