Thilttha tuah le lungthin ttha ngeih

Nihin ni ah Khrihfa Bupi nih rel dingmi thawngttha a kan timhpiak mi Luke 14:1-16 tiang a si. Duhdawt mi nu le pa u le nau hna; Judah miphun hna nih nawlbia pahra an i ngeih bantukin Moses phungbia zulh ding tampi an ngei. Sabbath ni ahcun zeihmanh tuah lo a si i mi cungah thilttha va tuah ding zong kha onh loin Bawipa Jesuh Khrih nih mizaw a damter hna zongah khan an soi an sel i, hi mipa nihhin Sabbath ni hi zeitindah a ulh lai i, Sabbath ni ahhin zeitindah a thlopbul lai, kan Sabbath ulh ningcang hi zeitik dah a buar lai tiah felte khan an ngiat peng. Duhdawt mi nu le nau hna; kan Bawipa Jesuh Khrih nihhin vawlei cung mi vialte hi a kan dawttuk caah hin amah sin a fuh a panh mi hna cu zeitik caan hmanh ah sual ngaihthiamnak an hmu i, kan Bawipa Jesuh Khrih cu kan caah zeitik hmanh ah timhcia a si peng, tikcu caan khiah a ngei lo, zeitik caan paoh ah a zungzal in a kehram a fuh mi paoh cu a zaangfahnak an co. Vawlei taksa zongin thluachuah an co i, thlarua sual ngaihthiamnak zongin Jesuh Khrih dawtnak thawngin ngaihthiam an si. Jesuh Khrih dawtnak cu Moses phungbia nakin a ngandeuh ti kha nihin kan relmi thawngttha ah kan hmuh khawh. 1Peter 4:8 ah Bible nih a kan chimh mi cu; zeizong viatle nakin pakhat le pakhat hi lungtak tein i daw u, zeicahtiah cun dawtnak nih sualnak tampi kha a khuh khawh tiah a ti. Moses phungbia nakin Jesuh Khrih dawtnak a ngan deuh, kan sualnak nakin Jesuh Khrih veel zaangfahnak le a kan dawtnak a ngan deuh ti kha nihin kan relmi thawngttha ah hmuh khawh mi a si. Amah a zum i amah zohchunh in kar a hlangmi a mifa kannih hna zong mi cungah dawtnak kan ngeihnak ah tikcu caan rikhiah ding a si lo i, kan si khawh chungin zeitik caan paoh ah dawtnak thinlung put in cawlcanghnak in mi zawnruahnak in mi a bawm pengtu si ding kha Jesuh Khrih nih nihin ni ah a kan fial. Galati 6:10 chungah; Cucaah a caan kan ngeih fate mi cungah tthatnak tuah kha i zuam ulaw, zumhnak lei i kan rualchan a simi hna cungah khan i zuam khun u tiah a ti. Zeitik can paoh ah mi cungah tthatnak tuah kan i zuam ding kha Cathiang nih a kan fial bantukin cu chungah cun zumhnak lei i kan rualchan a simi hna cungah khan i zuam khun u tiah a ti. Zumhnak lei i kan rualchan a simi hna cu hodah an si ti ahcun Pathian le a Khrihfabu chung i hmunkhatte ah a ummi Bawipa Thisa a ei khat mi, a thi a ding khat mi, zumhnak pakhat, Bawi pakhat, tipil innak pakhat tang te in zumhnak i kar a hlangmi Khrihfabukhat chung i a ummi kha a kan cawnpiak duh mi a si. Nihin ni Bible voikhatnak, Filipi 1:1-11 lakkar ah; Mithiang Paul nih Filipi khua Khrihfa Bupi sin ca a kuatmi a si. Biatak thawngttha ka phuannak ah nan ka bawmh, thlaza nan kan campiak, nan kan dawt cikcek, kan i lawm tiah lawmhnak bia a chimnak kong le cuticun amah zong nih a dawt taktak hna nak kong kha Khrihfa bukhat an si bantukin an zawn an i ruah i pakhat le pakhat dawtnak thinlung put in an i kilveng, an i zohkhenh i thla an i campiaknak kong kha kan hmuh khawh. Cucaah cun duhdawt mi nu le pa u le nau hna, zumtu an si ah, zumlo tu an si ah kan innpa a simi paoh kha kan dawt hna ding a herh i mi cungah dawtnak thinput in thilttha tuah ding kha kan rian kan thuam a si bantukin ahleice in a pumpi chung i hmunkhat tein a ummi zumhnak ai khatmi, Khrihfa bukhat chung i a thisen i cawk ciami bukhat chung i a ummi hna cu a hleice in kan i dawt a herh kha nihin kan relmi Cathiang nih a kan cawnpiak duh mi a si. Thilttha tuah, lungthin ttha ngeih kan timi vialte hi Khrih Jesuh lawnglawng nih a tuah khawh mi, amah lawng nih a pek khawh mi a si tiah Bible pakhatnak ah kan rel. Cucaah cun mi cungah dawt nak a ngei khotu kan si zungzal khawhnak hnga caah dawtnak hrampi a simi kan Bawipa Jesuh Khrih sinah zaangfah hal in amah muisam keng chin lengmang in kan cawl kan canghnak ah kan biachim kan holh rel le kan mit au kan kam keunak vialte ah Khrih muisam cuang ko hna usih.