Pathian sinin na hmuhmi thluachuah kha midang sin zongah na hrawmh ve awk a si

Khrih ah dawtmi hna, Oct 21 ni ca i thlarau thazaang laaktti dingin kan sawmtthan hna. Nihin ni caah kan Nu Bupi nih a kan timhpiakmi Bible hna; Efesa 3:2-12, Salm (Isaiah 12), Luke 12:39-48 chungin a si. Nihin kan relmi kan Bible Cathiang hna nih Bawipa pekmi veel thluachuah cungah ruahtthan dingin a kan sawm. Cun Bawipa Pathian nih a kan pekmi khamh kan sinak veel laksawng cungah zumhnak ngeih ding le Bawipa a hnuzultu kan sinak ah zumhtlak tein nun ding a herhnak kong kha a chim duh mi an si. Hika zawn ah Bawipa nih thlua a kan chuahmi cungah a cohlan lawng cohlan si loin Bawipa thluachuah hna kha midang sinah hrawmh ve ding, cun cutin hrawmh buin kan nun lioah Bawipa a rat lai nak ni caan caah khan timhcia tein kan nunnak hnga ding caah nihin kan Bible Cathiang hna nih a bik in a kan cawnpiak mi cu a si. Voikhat Bible kan relnak Efesa chungah Paul nih; Bawipa Pathian i a tinhnak cu Jesuh Khrih in kan sinah langhter a si cang e tiah a ti. Cu tinhnak cu zeidah a si; Mi vialte khamh kan sinak hnga ding caah khan a si. Khamh sinak hnga dingah mi vialte kan ti tikah Judah mi hna ca lawng kha si loin Jentail mi hna, Pathian sermi mi vialte hna, miphun kip khamh sinak hnga ding caah khan a kan timhpiak mi, thlua a kan chuahmi Jesuh Khrih kan sin i a rat hnawhter chan cu a si. Cucaah dawtmi u le nau hna; nihin ni ah kanmah kan bu te cio in kan Laitlang zongah kan dir cio hna. Khrih thawngtthabia kan phuang cio hna. Pathian sal kan si tiah kanmah le kanmah min bunh in Bawipa hnu a zulmi kan si tiin kan i cohlang hna. Hi zawn ah Pathian thluachuah hi keimah ca lawngah a chiatu maw ka si, a siloah midang hna sin a hrawmh ve tu ka si maw timi te kha bia i hal hna usih. Pathian thluachuah cu mi vialte caah a si. Kha thluachuah kan co ning kha aa lo cio lo, a cheu phungchimtu, a cheu Profet, a cheu cu atu lio kan sining he zoh ah mizaw a thloptu siibawi te zong an um lai, inn saknak lei in lam cawhnak leiin a thiamsangmi engineer zong an um lai, ramkhel leiah rianttuan mi hna zong an um lai, Pathian bia phungchimtu zong an um lai. Cun biaknak lei zongah a phunphun in Pathian rian kan ttuan cionak ahhin ka innpa, ka hawipa, ka hawinu caah zeitindah hi Pathian sinin ka hmuh mi thluachuah hi ka hrawmh ve timi te kha ruah ding a si. Slam cu Isaiah chungin kan laakmi a si i Bawipa Pathian i a khamhnak cungah i lawmh ding le zumh dingin a kan sawm. Bawipa khamhnak cungah lawmh kan ti tikah lawmhthlorh in maw i lawmh in kan um sawh ko lai, Pathian tthawnnak cungah zumh, cun Pathian khamhnak cungah kannih hna zong biatak tein zumhnak ngeih ding kha Salm chungah kan hmuh khawhmi a si. Cu tikah kan zumh kan ti tikah ngakchiate khi zoh ko usih. A nu maw a pa maw, asiloah a u maw a zumh tikah amah hi a hmuhton mi thil vialte cungah hin thil a ti kho cem a si tiah biatak tein zumhnak a ngei khotu a si. A nu a pa, a u a um tikah ttihnak a tei khawh. Kannih Khrihfa hna zong Pathian khamhnak le Pathian veel cungah biatak in a zummi kan si ahcun tukforhnak te hna, cun ral a simi Satan cung zongah hin tei khawhnak, luat tiangin ttihnak um loin kannih zong kan um kho. Zeicahtiah teitu Bawipa a fapa, a fanu kan si, a hnuzul kan si, amah khamhmi kan si tiah kan zumh khawh caah a si. Thawngtthabia chungah Bawipa nih zumhtlak a simi bianabia a kan cawnpiak. A bawipa khual a tlawn tikah ruahlopi in a hung kir i cu tikah timhcia tein a ummi salpa cu a bawipa nih a thangtthat e tiah a ti. Nihin ni ah Pathian thluachuah kan comi cung cioah Pathian bia a phuangtu, Pathian rian a ttuantu, Pathian hnu zultu tiah hi kan vawleipi minung mithmuh in kan i cohlan mi, ordination kan i pekmi Siangbawi te si usih, Sister te si usih, Catechist te si usih, cun Pastor te si usih, Pathian nih a kan pekmi thluachuah hi zeitindah midang sinah kan hrawmh ve hna, aa ka thiam lai lo, ka ngamh lo, um ko seh kan ti sual a si ahcun a hleice in pekmi thluachuah kha midang sin kan hrawmh lo caah Pathian hmai ah biatak tein tlamtling tein a rian ttuantu kan si maw si lo timi kha kannih nih kan ruah awk a si. Cucaah thawngttha kan chimnak ah cun, Pathian riantuannak ah Pathian thluachuah kha innpa chakthlang sinah va hrawmh hna tiah kan ti tik zongah hin ngaihthiamnak lungthin ngeih lawngah hrawmh khawh a si. Ngaihthiamnak lungthin kan ngeih khawh lo a si ahcun Bawipa thluachuah kha midang hna sinah kan hrawmh kho hna lai lo. Cucaah ngaihthiamnak lungthin he Bawipa sinin kan hmuhmi thluachuah kha midang sinah hrawmh hna usih. Amah nih a Fapa ngeihchun a rak kan pek i, khamhnak a rak kan pek, kan sual a kan ngaihthiam bantukin kannih zong Bawipa thluachuah kan comi cungah lunglawmhnak he kan cohlan bantukin midang hna sin kan hrawmh tikah pakhat le pakhat i ngaihthiamnak lungthin ngei ve hna usih. Khamhnak cu mi vialte caah Bawipa nih a kan timhpiak mi a si. Fapa Jesuh Khrih in mi vialte sinah a phuan tiah Paul nih a ti bantukin mi vialte cungah aho hmanh thleidannak lungthin ngeih lo tein Pathian thluachuah a hrawm khotu si cio hna usih. Nan dihlak cungah Bawipa nih thluachuah in pe ko hna seh!