Missa raithawinak atuah lio ah ruahlo piin vailamtung nih a tlaak i Rev.Fr.Patricio Alfredo Sánchez Molinari (53) a nunnak a liam
Nai Zarhteni (October 17) ni ah, Ecuador ram, Guayaquil khua i ummi Our Lady of Perpetual Help Biakinn ah Missa raithawinak a tuah lio mi Rev.Fr.Patricio Alfredo Sánchez Molinari cu biakṭheng hnulei in vailamtung a tlu i cu nih cun a nenh chih ruang ah a nunnak a liam. Cu Missa raithawinak cu livestream an tuah ruang ah mi tampi nih social media in hmunh asi. Fr. Patricio lu cungah vailamtung a tluk le cangka, aa pummi nih “Father” tiah an au i an va zuanhnawh colh nain Fr. Sánchez cu a nunnak a liam colh. Zeiruang ah vailamtung a tluk/ a pur timi cu thawng fiang theih asi rih lo. Guayaquil Archdiocese nih Fr.Sánchez a thihnak kong cu October 17 ah an Facebook cahmai ah an taar i fehternak an tuah.
Guayaquil in meng 65 aa hlatnak, a hlan ah (Fr. Sánchez nih tuukhal dirhmun in ṭuanvo a rak laaknak hmun) San Lorenzo de Vinces Parish Redemptorist siangbawi phu nih an ngaihchiatnak cathluan i an langhtermi ah, “Redemptorist tlangbawi phu le chungkhar kan si bantuk in, Fr. Sánchez i a thlarau ca i thlacamnak ah kan i tel i a chungkhar, a unau tlangbawi hna le amah a dawtu vialte hna cungah hnangamnak le hnemhnak Bawipa nih in pe ko hna seh tiah thla kan cam tiah an langhter. Rev.Fr.Patricio Alfredo Sánchez Molinari ruakvuinak Missa raithawinak cu October 18 (Mission Sunday ni) ah Our Lady of Perpetual Help Biakinn ah an tuah.
Vailamtung a tluk hlan te, Rev.Fr.Patricio Alfredo Sánchez Molinari nih hmanungbik a phungchimnak ah, “zeizong vialte nakin biapi deuh ah chiah ding le caan kha fimkhur tein hman ding ah Missa ah a rak i pummi hna sin ah a chim.”Kan nunnak ah, Pathian caah caan le hmunhma kan pe tawn lo. Tangka, rian le chungkhar rian vialte hlan ah Pathian hi a pakhatnak ah kan chiah awk asi. Nikhatkhat ahcun, hika i a ummi kan dihlak in kan thi ve lai. A caan ahcun thil zeimawzat caah kan pekmi caan hna hi Pathian caah kan hmanmi caan tluk in sullam a ngei lo. Pathian caah, kan unau, kan nupi/pasal, kan fale le kan chungkhar hna caah caan kan pekmi hi fimkhur tein caan ṭha hman asi, tiah a chim dih hnu minutes tlawmpal ah ruahlo piin vailamtung nih a tlaak i a nunnak a liam tiah, Guayaquil thawngzamhnak asi mi, “El Universo” nih a langhter.