Khrih cu nan lungthin, kan lungthin chungah khua sa seh

Nihin ni tiang ah caan ttha caan sunglawi a kan petu, nunnak caanttha a kan petu kan biakmi kan Pathian a min thiang thangtthat in um ko seh! RVA Hakha Service a ngaitu nan dihlak cung zongah Bawipa nih thluachuahnak in pe ko hna seh! Nihin kan Nu Bupi nih a kan timhpiakmi voikhatnak Bible chungin thazaang laaktti kan duh hna. Efesa 3:17-Nan chunglei minung sinak ah a tthawngmi nan sinak hnga le zumhnak thawngin Khrih cu nan lungthin chungah khua  saknak hnga, cun a sunparnak ro bukbau chungin a thlarau thawngin tthawnnak an pek hna nak hgna Pathian cu ka nawl. Khrih ah dawtmi u le nau, tutan ah tlangtar in ruahtti kan duhmi hna cu ‘Khrih cu nan lungthin, kan lungthin chungah khua sa seh’ timi tlangtar in ruah le thazaang laaktti kan duh hna. Nihin minung kan nunnak hi kan i zoh tikah hin kan lungthin timi hi aho hmanh nih zeidah an ruah, zeidah khua an khan ti hi an hmu kho lo. Pathian lawnglawng nihhin kan lungthin hi fiang tukin a hmu khotu a si. Lenglang lawng siloin chunglei kan lungthin hi Pathian nih a zoh zungzal ti hi Bible kan zoh tikah kan hmuh khawh. Cucaah minung kan lungthin chung ahhin thil tampi aa khumh khomi a si, tthatnak siseh, chiatnak siseh a phunphun in, cucaah zeitindah an chim ti ahcun ‘a lawngpi’ minung kan lungthin cu a lawngmi lungthin a si tik hi. A zeihmanh in a khat kho lomi lungthin tiah an auhmi a si. Cucaah lawmhnak siseh, ngaihchiatnak siseh, dawtnak siseh, huatnak siseh, hakkauhnak siseh, zawnruahnak siseh tampi ai tlum khomi minung kan lungthin a si. Hi kan lungthin chungah ngaihchiatnak a um ahcun cu nihcun kan muisam tiangin a tarter khawh ti a si. Cu ve bantukin Bible nih biapi tuk ah a chiah caah zeitindah a ti; Na lungthin kha ttha tein i veng a ti. (Phungthlukbia 4:23) chungah na lungthin kha ttha tein i veng a kan ti. Minung kan lungthin chungah nahchuahnak a um ahcun cu nihcun sualnak chungah a kan luh pi tawnmi a si. Kain le Able kha zoh hmanh; Kain le Able nih Pathian sinah raithawinak an pekchanh veve tikah Pathian nih Able raithawinak kha a cohlan i Kain raithawinak kha a cohlan lo tikah Kain nih nahchuahnak a vun ngeih bak in a nau a simi Able a thah ti kha kan hmuh khawhmi a si. Cucaah nihin kan lungthin chungah kan Bawipa Jesuh Khrih khua a sak ahcun amah kan Bawipa nih a zungzal lam a kan hruai lai i, fim a kan chimh lai i, thluachuahnak he lam a kan hruai lai. Kan tlau ti lai lo, kan tlau sual hmanh ah amah kan Bawipa lila nih lam hmaan, lam ding chungah a kan luhpi tthan lai. Kan Bawipa Jesuh Khrih cu kan lungthin chungah zeitindah khua a sak khawh peng lai; Zumhnak thawngin khua a sa kho peng lai. Zeitin; A tthawngmi nan sinak hnga le zumhnak thawngin Khrih cu nan lungthin chungah khua a sak nakhnga a si a ti. Zumhnak thawngin kan lungthin chungah kan Bawipa Jesuh Khrih hi khua a sa kho peng lai. Kan Bawipa Jesuh Khrih nih na caah a tuah ciami vialte kha nihin ah zum ko, caan dongh tiangin kan umpi lai tiah Matt 28:19-20 ah a kan chimh bantukin nihin dawtmi u le nau hna, caan dongh tiang a kan umpi tu ding kan Bawipa Jesuh Khrih kha na lungthin chungah, ka lungthin chungah khua a sak khawhnak hnga sawm ko usih. Khoika na kal hmanh ah, zeitik caan paoh ah, zei dirhmun na phak hmanh ah Bawipa nih kan umpi lai tiah tiah bia a kan kamhmi kha dawtmi u le nau hna, zum ko usih law nang le kei kan Bawipa Jesuh Khrih nih bia a kan kamhmi hi a hmun i zumh awk a tlak mi a si ti kha nihin kan nunnak ah cohlang ko usih. Nangmah le keimah bantukin biakam let hmang mi a si lomi kan biakmi kan Pathian a si. Cucaah zumh awktlak, bochan tlak, kan biakmi kan Bawipa Jesuh nih bia a kan kamhmi hi dawtmi u le nau hna, nihin zum ko usih law, pom ko usih law, cohlang ko usih. Zumhnak thawngin Khrih cu kan chungah khua a sami a si khawhnak hnga nihin Khrih cu nan lungthin chungah kan lungthin chungah khua sa seh tiah Paul nih bia a kan cah, ca a kan kuat bantukin dawtmi u le nau hna, kan lungthin chungah, kan nunnak ah, Bawipa Jesuh Khrih hi khua a sak khawhnak hnga na lungthin innka kharmi kha hung law, Bawipa, kan lungthin, kan nunnak ah khua rak sa hram ko tiah bawmh hal in nifatin kan nunnak ah kan lungthin chungah khua sak ter ko usihm bawi siter ko usih. Kan nunnak ah kan Bawipa Jesuh Khrih hi khua a sak a si ahcun kan duh kan herhmi vialte thluachuahnak amah kan Bawipa nih a kan pek hrimhrim lai ti kha nihin ni ah thazaang pek le ruahtti kan duh hna. Kan Bawipa Jesuh Khrih cu kan lungthin chungah khua a sak khawhnak hnga kan theihmi a bia a ngaitu kan dihlak cungah a thar in thluachuah kan pe ko seh. Amen.