Pope Leo 14 cu Castel Gandolfo i a umnak inn ah kal rih loin a dam tiang Vatican ah aa din lai

Pope Leo XIV cu tuzarh chungah Castel Gandolfo i a umnak inn ah kal rih loin Vatican ah a dam tiang aa thlopbol lai i aa din rih lai. Cawn nithum ni, October 21 ah General Audience tonnak zong a tuah lai tiah Vatican thawngzamhnak nih a chim. Pope cu October 13 ah cuap cancer (pulmonary adenocarcinoma) ruangah October 13 ah khan operation tuah asi hnu ah Holy See Press Office nih Pope ngandamnak kong he pehtlai in kan hnu Cawnni khatni ah mipi sin ah update news peknak a tuah. Pope cu Rome khua i Gemelli siizung ah ni 5 a um hnu ah October 17, Zarhpi ni ah siizung in in a chuak.

 Pope mithmai hmuh duh le ton duh ah St.Peter Biakinnpi tual ah a rak i pummi minung 15,000 tluk chawnhbiak awk ah kan hnu Zarh, Zarhpini ah, Pope cu, Apostolic Palace thlalangawng in ah a ra lang i mipi sin ah biachimnak le biakchawnhnak a ngei. Tu zarh Cawnnithum ni zong ah St.Peter Biakinnpi tual ah General Audience he i tonnak a ngei rih lai tiah Holy See Press nih a langhter. Tulio caan ah Pope nih mawṭaw cung dir buin mipi chawnhbiaknak (popemobile) hi a tuah lai maw tuah lai lo ti a fiang rih lo. Cucaah Pope cu Vatican ah a um rih lai i a dam tiang aa cawng rih lai i a damnak dingah ni hra hrawng a rau lai tiah Dr. Stefano Margaritora nih Vatican News he bia an i ruahnak ah a chim.