Fapa Ṭha Pale Hna a peh
Puitling a hun si tikah Anna an timi nu he Chungkhar an rak ser. Fapa pakhat an rak ngeih i a min kha amah min ṭhiamṭhiam Tibias a sakṭhan. Tobias ngan cu a fapa Tobias hme kha fapa ṭha, fapa hmaan siding in a cawmpiak zungzal. “A fapa kha a ngakchia te in Pathian upat ṭih zahnak kha siseh, that lo nak vialte hrial dingin siseh arak cawmpiak. (Tobias 1:10) Apa Tobias nih aṭhami zohchunhtlak asinak, ziaza ṭhatnak he atlinnak, zaangfah mi in a chimhhrinnak thawngin afapa hme Tobias zong fapa ṭha, a dingmi fapa ah aa chuah. A nu le pa kha upat peknak in arak lawmhter hna.
Pathian ṭihzahnak he a khat i Pathian lawnglawng a laifang ah a chia mi Chungkhar arak ser khawh caah Pathian thluachuah tampi arak cohlei ah khuachia ral in arak luat. Tobias ahme cu Sarah he an i ṭhit- umh. Annih cu an i ṭhit- umh ka te in, an Chungkhar caah Pathian sin bawmh an rak hal. Tobias ahme nih, “Kan pupa hna i Pathian rili nih siseh, cerhti hna le tiva hna nih sihna seh, a chung um thilnung saram vialte nih si hna seh, nangmah kha in thangṭhat ko hna seh. Bawipa nangmah cu Adam kha leidip in na ser i amah bawmhtu ding ah Eve kha na rak ser piak. Atu zong ah keimah cu nupa sinak menmen caah kafar nu Sarah hi ka ṭhitmi asi lo, fale tefa hmuhnak ding caah annih thawngin Bawipa na min cu zungzal donglo an in thangṭhat khawhnak caah asi,” tiah tla arak cam. (Tobias 8:7-11).
Sarah zong nih, “Maw Pathian, kan nih kha kan zaangfah ko tuah, Kan pahnih in tartlung tiang ngandam te in kan umter ko sawh (Tobias 8:10) tiah arak cam ve.
Tobias ahme le a nupi Sarah zong nih an thlacamnak bantuk in Chungkhar ṭha si ding ah an i zuam ve.
Tobias ahme cu a pa chimhrin nak bia asimi “Ka fapa” Chungkhar ningkel lo in umnak kha hrial cikcek tuah, na nupi hlei ah a dang aho cung hmanh ah palhnak tuah hlah. (Tobias 4:13) timi bia cu a ngaih peng. Cu bang cu a nuammi Chungkhar an rak serkhawh.
A pa Tobias ngan i lamṭha hmuhsaknak, ziaza ṭhatnak Ro a pek ruangah Tobias ahme cu fapa ṭha, a dingmi fapa sung pakhat asi kan tiah cun kan palh lailo.