Haiti ah tlaihkhih atongmi hna a rannak in thlah ding ah le Nepal ram tilian hartongmi hna bawmh awk ah Pope nih nawlnak a tuah
Castel Gandolfo ah Zarhpi ni Angelus thlacamnak ah, naite ah Haiti ram ah a cangmi hmunkhat ah mibupi thahnawnna kong he petlai in Pope nih mawhchiatnak a langhter i tlaihkhih a tongmi hna zong a rannak in thlah ding ah nawlnak a tuah. Cun Nepal ram tilian le min cimhnak ruang ah a thi mi, a tlau mi le innlo rawk mi hna kha bawmhnak ṭha tein pek awk ah forhfialnak le nawlnak a tuah ṭhan. Haiti ram, Kenscoff khua ah ṭihnung ngaimi mibupi thahnawnnak (massacre) kong thawngpang a chuak pin ah mi tampi tlaihkhih (hostage) an tong. Cu ngaihchiatnak a tongmi chungkhar hna tlaihkhih tongmi chungkhar hna an khuaruahhar thinphan ngaihchiatnak a tuarpi ve nak kong le an caah thla acampiaknak hna kong Pope nih a langhter.
Pope nih Haiti ram caah nawlnak an tuah hnu ah Nepal le Tibet ram hna ah tilian hartongmi kong a chim i, tilian ral in a thimi hna, hliamhma a pu mi hna le a tlaumi hna chungkhar hna le chanhchuahtu (emergency rescue team) hna caah thlacam piak ding in mipi sinah sawmnak a tuah. Hartongmi hna caah lungrethei in kan umnak le zaangfah zawnruahnak lungthin kan ngeihmi nih hartongmi hna caah hnemhnak le bawmhchanhnak pe hram ko seh tiah Pope nih thla a cam piak hna. Pope nih Nepal tilian hartongmi hna caah bawmhchanhnak(Dicastery) sin in tangka a kuat hna i, Caritas Nepal nih cu tangka cu hartongmi hna sin ah an phawhzamh hna lai tiah Vatican thawngzamhnak nih a langhter. Nepal tilian in a thimi hi 700 leng an si cang, 3000 hrawng an tlau i thong tampi inn le lo an zaam taak cang. Emergecy rescue team nih a tlau mi chanhchuah le a thi mi ruak kawl cu pehzulh in an ṭuan rih ko nain, vawlei a cimrih dingmi zong phan a um caah le lam a rawk tuk caah rianṭuan hma a kal lo tiah theih asi. Tilian ral nih minung le inn le lo vialte a hrawh dihnak kong theih asi le cangka in, Nepal ram i Apostolic Nunciature i thawngthanhnak le pehtlaihnak thawngin, Apostolic Vicariate lamhruainak tlangtlaknak tangah Caritas Nepal rianṭuanphu hna nih Pope nih a kuatmi hna bawmhnak cu mipi hartongmi hna sin ah pek asi lai. Cu bawmhnak cu tilian ruangah rawhralnak nih a denmi hna caah sii, ei din awk caah hman asi lai tiah theih asi.