Missa raithawinak ah lungtho tein i telnak nih Pathian he i pehtlaihnak ah a kan hruai
August 26, Cawnnithumni ah Pope nih St.Peter Biakinnpi tual ah mipi he tonnak a ngei.1963 kum avoihnihnak Vatican Council meetingpi ah (Constitution on Sacred Liturgy, Sacrosanctum Concilium) Missa raithawinak (liturgy service) he pehtlai in remhmi (reform) an rak tuahmi kong a chimh hna. Vatican Council II nih a tuahmi Missa raithawinak ah umtu ning a thlenmi hna hi an biapitnak le cu thlennak (reform) tuahmi nih zumtu hna kha Missa raithawinak ah biatak tein le thuk deuh in i tel khawhnak hnga, pakhat cio nun ah Pathian he i pehtlaihnak a fehter tiah fianternak a tuah. Missa raithawinak cu khamhnak rianṭuannak philhlonak puai asi pin ah Pathian he kan pehtlaihnak caanṭha asi tiah a ti. Hi Missa raithawinak ah kan tuahmi, thlacam, hlasak, Bible relnak le pekchanh raithawinak, chimmi le relmi bia le hla vialte hna le Bawipa thisa einak vialte hna cu mit in zoh sawhsawh men si loin pumpak pakhat cio nih lungtho tein kan i telnak cu a biapi ngaingai tiah chimchap. Cupin ah, 1963 ah Vatican Council II nih a chuah hmasabikmi Cauk hna chungin (Constituition on Sacred Liturgy, Sacrosanctum Concilium) kong a cawnpiak hna. Cu cauk chungah abik in Missa raithawinak ah zulhphung (Liturgy) thlennak le remhmi kong an i tel i zumtu hna nih Missa raithawinak ah lungtho tein biatak (active participation) i tel ding in forhfialnak kong asi.
Vatican Council II ah ṭuanvo ngeitu Pope le Bishop hna nih Missa raithawinak umtu ṭhut dir ning an remh, an thlennak a ruang cu Catholic Bupi ṭhanchonak hnga caah le Missa raithawinak le Pathian biaknak pumhnak kha nunter awk caah asi i, hi thlennak, remhṭhannak hi ruahlo pi in tuahmi si loin kum zabu 20 hram thawk in Pope pakhat hnu pakhat timhtuahnak ngeih buin remh le thlen asi tiah fianternak a tuah. Vatican Council II hlan ahcun Missa raithawinak tuah tikah, siangbawi hna nih mipi lei hoih lo in mipi kha an hnu an chit hna i, Bawipa thisa chiahnak, vailam tung lei hoih in raithawinak tuah asi. Missa raithawinak ah relmi le chawnh lehnak hna zong Latin in tuah a rak si. Vatican Council II hnu in mah le khua le ram i holh in Missa raithawinak tuah onh asi. Cucu (Liturgical reform), Missa raithawinak umtu ṭhutdir ningcang remhṭhanmi tiah aa tlaaknak in kan lehmi asi.