SUALHRAM NGAI LOIN A SEMNAK

Khamhtu pa a nu si awkah Pathian nih Mary kha amah he aa tlakmi vel laksawng in a khah ter. Vancungmi Gabriel nih thawng a thanh lioah Mary kha, “Vel in a khatmi nu” tiah a biak. (Lk. 1:28). A ngaite ti ahcun Mary nih a zumhnak kha tling tein a pek khawhnak hnga Pathian vel in a khah hrimhrim a hau.

Bupi nih Pathian thawngin “Vel in a khatmi”, Mary cu a nu nih a pawi lio hrimhrim khan tlanh cia a si cang ti kha a theih zungzal. Mah hi sualhram ngei loin a sam tinak cu a si.

A nu paw chungah a semka in Mary a thiannak cu Khrih sin in a rami a si. Amah cu Pathian Fapa a ṭhatnak thawngin phundang tein khamh a si. Pa Pathian nih Mary kha midang nakin thluachuah tam deuh a pek. Khrih ah vancung i thlarau lei thluachuahnak vialte kha a pek i, “Khrih ah vawlei hramthawk in dawtnak in, amah hmai ah a thiang hngami le sawi awk um lo dingin a thim,” (Eph. 1:3-4).

Nichuah lei pupa hna nih Pathian nu cu “A Thiang Dih Mi” (The All Holy) tiah an auh i Thiang Thlarau nih a ser tharmi a si caah sualnak in a luatmi a si, tiin an thangṭhat. Pathian vel thawngin Mary cu pumpak sualnak in a nunchung a luatmi a si.

“Na bia bangin ka cungah tling ko seh”

“Pa hngalh loin Pathian Fapa kha na hrin lai. Thiang Thlarau thawngin” timi thawngthanhnak kha a vun theih tikah Mary cu, “Pathian n ih a tuah khawh lomi zeihmanh a um lo,” ti zumhnak in, “Na bia bangin ka cungah tling ko seh,” tiah a ti. (Lk. 1:28-38, cf. Rom. 1:5). Cuticun Pathian bia cungah a hna a tla i Mary cu Jesuh nu ah a cang. Sualnak ngei lo Mary nih lungtling tein Pathian duhnak kha a cohlan i pumpalut khan a Fapa le a rianṭuannak cungah a pek dih. Cutin a tuahmi cu Pathian vel thawngin le amah bochannak in khamhnak biathuk caah a nun awkah a si.