NIFATE NUNNAK HE PEHTLAIMI KOKEK PAWNGKAM (Dalkhatnak)
A dikmi minung le pawngkam ṭhanchonak ah, minung nunnak umtu ningcang kakip in ṭhanchonak aa tel i, cucu voikhat ṭhan in minung hna umnak le cu hmun ummi hna pawngkam hnuphen umtu ningcang hna zong telhchih in ruah a hau.
Cu hnuphen thil umtu ningcang cu kannih kan khuaruahnak, intuarnak le tuahser rianṭuannak dihlak cungah nawlngeih in a khuh chilh. Kannih kan umnak innkhaan hna, innlo hna, rianṭuannak hmun hna lei innpa lopa hna kha hi hnuphen thil umtu ningcang nih nawlngeih in a khuh chilh i kannih kan umnak pawngkam cu kannih nih aho a si, tiah langhternak ah santlaimi an si.
Kannih cu mah le umnak hmun pawngkam he aa tlak ningte si dingin a kakip i zuam in rian kan ṭuan cio. Asinain pawngkam thil umtu ningcang cu zulhphung (siikaan) um lo, hnok cencun ningcang lo piin a si i, awthawng hna a chet. Thurhnawm in a um ahcun cu bantuk thil umtu ningcang a luantuk ruangah kannih cu pawngkam he aa tlak ning tein um khawhnak a har caah lunglawmh nun nuam tein umnak a si lo.
Cheukhat minung hna le minung phu hna ah thilthar ser chuahnak, siannak te hna kha kan hmuh khawh. Annih cu pawngkam thil umtu ningcang in rikhiahnak hna kha an lehrulhnak ah, annih an umnak pawngkam i duhtlai a si lomi thil umtu ningcang hna kha zordeuh dingah an tuah i, sikaan um lo, a fiangfai lomi thil umtu ningcang ah umṭhut thiam ding kha an i zuam cio.
Biana ah, cheukhat hmun hna ahcun inn hlun, inn rawkmi hna i a ummi cheukhat hna cu inn chunglei kha dawh ngaiin an remh hna i a cheu hna nih cun an pawngkam innpa lopa hna i zaangfah zawnruah thiamnak, tluantlam te le i daw tein an um thiamnak kha an zoh i an di a riam men. A herh lomi pawngkam i a ummi hna caah pawngkam nih a ṭhami zatlang nunphung umtu ningcang cu ruahchannak kha a pek te hna lai. Sifakmi cheukhat hna cu anmah le sifah harnak karlak ah zohchunh tlak a simi, minung pawngkam thil umtu ningcang kha an hman hna.
Minung milu a chah deuhnak sang le veng ahcun umṭhut dir ning aa tet deuh ko nain, innpa hna he tlaihchan i a lumsa mi hawikomhnak chungah mi vialte i fonh lungrualnak le pakhat tlaihchan tein, pehtlai tein i ngeihnak, thlah khawh lo zunngaih i benhnak hna an ser khawh cio ruangah, aa daw aa tlaihchanmi minung phu hna kha an ser khawh i pawngkam rikhiahnak thil umtu ningcang hna kha zor deuh dingin an ser an ṭuan chuah khawh hna. Cutincun minung hna cu zeibantuk hmun hmanh ah, hi vawlei hell he aa lomi hmun ah minung huham tling he um khawhnak umtu ningcang kha serchuah khawhnak thazaang an ngei.