Kan Zumhnak cu Tuahsernak zongin kan Langhter a herh ko

August (26) ni caah Pathian bia in thazaang i lak ṭhan hna usih. (1Thes. 3:6-10, 16-18;  Mt. 23:27-32) hna hi Bupi nih nihin ni caah thlarau thazaang lak dingin a kan timhpiakmi kan Bible cathiang hna an si. 

Nihin kan relmi kan Bible cathiang hna  kan vun funtom tikah zeidah kan hmuh tiah cun, thil kan tuahsernak ah zei ruang ah dah kan tuah timi le zeitindah kan tuah timi te hi i chek hlat ṭhan dingin thazaang a kan pek, a kan forhfialtu cathiang hna an si. 

Voikhatnak Bible kan relmi ah Paul nih Thessalon Khrihfa hna sinah ca a kuat tikah, “U le nau hna, Bawipa Jesuh Khrih min in, mi thathu le kan in cawnpiakmi hna a zul duh lomi cu kom hna hlah u, tiah kan in fial hna” tiah a ti. Jesuh Khrih cawnpiaknak cu zei bantuk dah a si? A thianghlimmi ṭhatnak, dawtnak phungbia a si. “Dawtnak phungbia, ṭhatnak phungbia a zul duh lomi hna kha cu, cun a thathumi hna kha cu kom hna hlah uh, hrial hna ulaw” tiah a ti. Cun zeitindah a ti rih tiah cun, “Daihnak hram a simi Bawipa nih lam phunphun in daihnak kha in pe ko hna seh. Baiwpa cu nan dihlak sinah um ko seh” tiin thlacamnak in an kut a tlaih hna. 

Dawtmi u le nau hna, Paul nih thawngṭhabia a chim tikah thathu lo tein, siang ngaiin amah nih Pathian caah aa peknak kha a cawnpiakmi a ngaitu Khrihfa hna sinah amah nunzia hrimhrim in a langhternak kong kha a cawnpiak hna nak cu a si. Cucaah nihin ih kannih Pathian rianṭuantu hna si hna usih. Kan chim bantukin, Pathian bia kan phuan bantukin, Khrihfa hna kan cawnpiak hna bantukin kanmah tah kan nung taktak ve maw? Mi dang lawng maw thil khingrit, bia ṭhaṭha chim in a cawnpiak i kanmah pumpak nih a zulmi kan si maw, si lo timi kha i chekhlat ṭhan ding zong a phu ngaimi a si. 

Thawngṭhabia chungah Bawipa nih Farasi mi hna a mawchiat hna nak kha kan hmuh. “Phungbia cawnpiaktu Saya hna le Farasi mi hna, nan caah ngaihchia a va si dah! Mi depde hna! Profet kha thlan ṭhaṭha nan serpiak hna i mithiang mi hna lungphun kha nan ṭamh” tiah a ti. Anmah nih an tuah duh lomi, cun anmah nih an tuah khawh lomi kha midang cungah tuah hna seh, zul hna seh tin a phunphun in a chimrelmi, bia dawhdawh a chimmi cawnpiaktu hna kha Bawipa nih a thangchiat hna. 

Dawtmi u le nau hna, Khrihfa kan si. Sihmanhsehlaw Khrihfa kan sinak ah a chimtu lawng maw kan si (asiloah) Bawipa a cawnpiakmi te kha dai tein, kan thilti khawh ning tein, kan thazaang tak tein, kan lungthin tak tein a zultu kan si taktak maw i chekhlat ṭhan hna usih. “Kei cu Khrihfa ka si ko. Kei cu zeibantuk bu ka si ko. Vanram ka kai ko lai” tinak sawhsawh in maw daithlang ngaiin kan um? Asiloah Bawipa nih a duhmi nunzia tein a nungmi kan si? Farasi mi hna zong nih Pathian cu an zumh ko, Pathian bia cu an cawnpiak ko hna. An cawnpiak hna ning khan an nung lo, an kal lo tikah Bawipa nih a thangchiat hna. 

Dawtmi u le nau hna, Bawipa thangṭhatmi si kan duh a si ahcun Bawipa duh ningin, a cohlan ningin, um khawh dingin kan i zuam ve ding a si. Cucu zeidah a si? chimrelnak sawhsawh in a si lo, tuahsernak zong a herh. “Ka zumh” ti sawhsawh lo a si lo. Nan zumhnak kha na tuahsernak in na langhter a herh. Kan zumhnak kha kan tuahsernak in kan langhter a herh. Cucaah zultu hna nunzia kan hun zoh ṭhan tikah a chimphuan sawhsawh lawngin maw an chim, a si lo. An chimmi hrimhrim kha anmah nih an nunnak in an langhter caah theipar tampi thlarau tampi an tlaihnak a si. Paul hrimhrim zong nih nihin ah Thessalon cakuat ah a chim ko khah! “Keimah hi ka zoh ulaw, keimah nih thathu lo tein keimah tein rian ka ṭuan i keimah tein kaa cawm i nan sinah thawngṭhabia ka chim e” tiah a ti. “Mi thathu hna le kan in canwpiakmi hna Jesuh Khrih kong a zum lomi hna kha cu hrial hna uh” tiah a ti. 

Cucaah Dawtmi u le nau hna, Keimah hi Pathian bia a zul taktakmi ka si maw (asiloah) a theih sawhsawh lawng maw a thei i a tuah duh lomi ka si, timi te kha nihin ah ṭha tein i ruat ṭhan hna usih. Kan tuahsernak hna cungah zeitindah thil kan tuah, cun zei ruang ah dah kan tuah, timi lungput te kha fiang tein kan theih a herh. Dawtnak lungthin he kan tuah a si ahcun a leng parpavuan tuahmi he aa lo kho lo. Lungthin tak tein tuahmi cungah, dawtnak lungthin tak te’n tuahmi rian cungah, chimrelnak cungah tluachuah a um. Thil tampi thei a tlaitu an si” timi te kha thei zungzal hna usih. 

Thazang petu /- Fr. Fidelis Maung Sein