Bawipa cu kan Lungthin le kan Ruahnak a zohtu a si

(2Thesalon. 2:14), “Pathian nih an kawhnak hna cu kan Bawipa Jesuh Khrih sunparnak i hrawm ve awk ah a si”. 

Dawtmi u le nau hna August (25) ni caah thlarau thazaang lak ṭi dingin sawm kan duh hna. Nihin hi Mithiang Louis puaini zong a si i, Louis min a ngeitu nan dihlak in “Happy Feast day” tiin nan kut kan tlaih hna. Nihin ni caah Bupi nih a kan timhpiakmi kan Bible cathiang hna cu (2Thea. 2:1-3, 14-17; Mt. 23:23-26) chungin an si. 

Nihin kan Bible cathiang hna nih a bik in zeidah a kan cawnpiak kan ti tikah “lenglei i langhnak si loin kan lungthin chung i chek dah in Pathian hmai ah dawh tein nun a herhnak kong” kha nihin i kan thawngṭhabia hna nih a kan cawnpiakmi a si. Mithiang Paul zong nih, “kan Bawipa Pathian nih an kawh hna nak cu kan Bawipa Jesuh Khrih sunparnak i hrawm ve awk a si” tiah a ti. A thianghlim lomi cu a thiangmi he an um ṭi kho lo, zaangfah a thiammi le a puarhrangmi um ṭi khawh a si lo. “Cucaah a thianghlimmi Bawipa sunparnnak i hrawm ve ding caah Pathian an kawhmi hna nan si e” tiah (2Thesalon) kan hmuhmi cu a si. 

Cun lenglei i thil sining lawng zoh i, a parpavuan lawngin nun zia a ṭhatlonak, cun Bawipa nih a duh lomi nunzia kong zong kha Matthai thawngṭha nihin kan relmi ah fiang tein kan hmuh. Bawipa nih zeitindah a ti tiah cun, “nawlbia nih biapi taktak a si a timi dinnak le mi zangfahnak le zumhtlakmi sinak hna cu zeihmanh ah nan rel ṭung lo” tiah khan Farasi mi hna le phungbia cawnpiaktu saya hna kha a ti hna. Dinnak, zaangfahnak le zumhtlak sinak hna hi Bawipa nunzia kan zoh tikah minung hna a kan zaangfah caah, minung hna khamh kan si nakhnga ding caah Van Sunparnak kha chiahtak in vawlei mi kanmah bantuk tein harsatnak a rak ing i, a rak kan khamh. Mah hmanhah mi nih zeiah an rel lomi hna, mi nih an urthlar lomi hna, ngatlai hna, anmah hna kha a kawh hna i, a timh hna i mikip nih amah an panh ngam nakhnga ding caah mi sawhsawh bantuk tein hi vawleipi mission rian a rak ṭuan lioah thawngṭha a rak chimmi hi kan Bawipa Jesuh Khrih a si. Zei caah Bawipa cu a ding a felmi, a thianghlimmi a si caah a si, mi zaangfah a thiamtu a si caah a si. Cun zumhtlak bawi a si caah a si.

Zei caah amah nih a kan cawnpiakmi vancung ramnuam a pennak i thil sining kha hi vawlei minung hna a kan cawnpiak duh caah, cun minung hna zong a pennak vancung ramnuam ah nuamhnak hrawmh a kan duh ve caah a rak kan khamh / a rak kan tlanhnak sullam cu a si. “Cucaah Pathian nih a kawh hna nak sullam cu kan Bawipa Jesuh Khrih sunparnak i hrawm ve ding caah a si” tiah khan Paul nih a timi cu a si. 

Farasi mi hna nunzia te kan zoh tikah Bawipa nih a thangchiat hna. Zeicahtiah a parpavuan in zei thil dah kan i hruk lai, zeidah pumhnak ah kan hman lai, timi tuahnak lei lawng kha ruat in anmah i miphun hna chung hmanh ah harnak a tongmi si hna seh, cun zohchuk deuhmi hna hmanh kha Jesuh Khrih nih a zohkhenh hna bantuk khan le a panh hna bantuk khan si loin anmah le dang tein an um tikah Bawipa nih khakha a thangchiat hna nak cu a si. 

Nihin nang le kei zong Khrihfa kan sinak ah mi thleidannak lungthin kan ngei maw, Siangbawi, Pastor, Khrihfa upa, cun Khrihfa chungkhar pakhat sinak in mi thleidannak lungthink an ngei maw? ti hi i tuak ṭhan hna usih, i chek i hlat ṭhan usih. 

Ninih cu Mithiang Franch ram i Siangpahrang Louis i puaini a si. Amah hi Siangpahrang a si caah “Mithiang” tiah Bupi nih a kawhmi a si lo. Mithiang timi Bupi nih a khiahmi pedan nunzia he a nung khomi Siangpahrang a si caah a si. Amah hi (1214 -1270) kum karlak i a rak nungmi Siangpahrang Louis a si. Amah i a nunzia te kan zoh tikah mi hna cungah zaangfahnak lungthin a ngeimi a si, theihpiak thiamnak lungthin a ngeimi a si. A rammi hna si hna seh, cun mah i uknak peng i a pinlei ummi tiangin anmah cungah dawtnak lungthin a ngei khomi a si caah a si. A parpavuan sinak lawngin le Siangpahrang sinak lawngin a nungmi si loin Khrihfa nunzia dawh, Khrih cawnpiak ning he dinnak, zaangfahnak, cun zumhtlak sinak he a nungmi Siangpahrang a si. Cucaah Bupi nih amah cu Mithiang a si, tiah a ti i nihin ni ah upatnak a pek ni, puaini caan zong a si. 

Dawtmi u le nau hna Jesuh Khrih nih a upatmi si kan duh ve a si ahcun zaangfahnak lungthin ngei ve hna usih. Zumhtlak sinak lungthin ngei ve hna usih. Dinnak nun he a nung khomi nunnak ngei ve hna usih. Cu lawng ahcun Bawipa nih sualphawt loin a pennak Vanram nuam ah kannih vialte caah hmunhma a kan timhpikmi hmun ah kan phan kho hna lai. “Bawipa nih a kawh hna nak a sullam cu Jesuh Khrih a pennak hrawmh ding caah a si” tiah Paul nih a timi te kha theih in kannih Khrihfa hna khawh kan sinak, Khrihfa kan sinak cu Jesuh Khrih i a pennak vancung ramnuam hrawmh ding caah a si, timi theih bu tein nifatin kan nunnak ah mi vialte cungah ṭhatnak lungthin, zaangfahnak lungthin a ngei khotu si khawh i zuam zungzal hna usih. 

Thazang petu /- Fr. Fidelis Maung Sein