Democratic Republic of the Congo(DRC) ah Ebola zawtnak ruang i hartongmi hna bawmhnak pek awk ah Pope nih international sin ah nawlnak a tuah

DRC ah a cang cuahmahmi Ebola zawtnak ruang ah hartongmi hna le Central African Republic ah suikhor cawhnak a cimh ruangah har tongmi hna bawmhchanhnak pek dingin vawleicung ramkip fonh phu sin ah Pope nih forhfialnak a tuah. Pope nih Zarhpini Angelus thlacamnak ah Democratic Republic of Congo ah Ebola zawtnak a karh cuahmah cu zawtnak nih minung nunnak a liamternak kong a chim i an caah thla a campiaknak kong a langhter. Hi zawtnak a karhmi chin lengmang caah ramkip phu fonh(internation) bawmhchanh, chanhchuahnak tuah dingin nawlnak a tuah. Atu tiang theih khawhmi ahcun, minung 5,300 sin ah hi zawtnak hi hmuh asi i  2,500 leng an thi cang nain cu zawtnak caah thlopbawlnak le a khamkhotu sii a um rih lo tiah theih asi. Hi Ebola zawtnak cu DRC le Uganda ah zawtnak a ngeimi an rak hmuh hna caah kan hnu May 2026 ah khan Vawleicung Ngandamnak phu (WHO) nih zawtnak ṭhalo chawnh khawhmi raichia asi tiah thawngthanhnak an rak tuah.

Ebola zawtnak phun caah khamhnak sii (Ervebo) 16,000 hrawng bawmhnak kan hmuh cang tiah DRC ngandamnak vuanci nih a chim. Khuapi chung a uktu hriamtlai phu hna le acozah kar ah a chuakmi i tukdohnak nih Ebola zawtnak a karhlonak ding le i runvennak rianṭuannak caah dawnkhaantu an si tiah an chim. Central African Republic ah sui khor cawhnak ruangah a thi mi hna chungkhar le har tongmi hna caah thlacamnak zong Pope nih a chim i, “Bawipa nih nunnak a liammi hna kha cohlang hna seh law sui khor cawhnak hmun ah himnak le phungning tein um khawhnak ding caah rianṭuannak pehzulh ko hna seh,” tiah a ti. Zamboye khua ah a ummi sui cawhnak hmun ah August 18 ah khan vawlei a cim i minung 100 leng an thi. Cozah lei nih cun cu sui khor cu a cimh hlan ah khar a rak si cang tiah an chim.